Disintunau Na Sunidu

Asolas, ma-annunsia na esta mas guaha adelantu gi ekonomia. Supin tasi `nai mañgekuentus kulan mohon inosienti i publiku haf` masusesedi.

I kuestion: Kau ennau na adelantu gaige gi monedan familia pa`gu? Haf` mas diberas ke pinadesin familia gi enteru iya Marianas?

Dispues, mas ke lamita sueddun chinatsaga (federal poverty income level) gi empleau enteru ya para in` sigi ha` tumalañga i publiku? Haf` mohon ya finu` integredat na biahe?

Yangin i intension pot eskusu, chatmiyu fan malelefa na kada unu gi membron familia gai estomagu. `Nai mamadedesi pot sapet tinanahuñg para mantension niha ni kuantu na annunsiu ni unu siña tumulaika haf` ume`esalau ginen estomagun i tautau siha!

Na ti magahet na esta pot mas ke 20 años taya` hatsadan sueddun i tautau siha? Kau pot este na diskuidu na kada ratu in` sablasus i publiku pot adelantu ni taigue gi pottanmonedan familia? Hombre, ti nigap ham `nai man-mafañagu!

Oran estrakadan politika

Gi tutuhon este na biahen estrakadan politika, `nos kuantos man-halum tatte gi pattidan republican lau memegaiña man-huyuñg. Dañkulu este na indikasion na ma`pi` i inetnun republican desde maposña na semana.

Mapgau i tropa: Guaha pa`gu Raffy na republican yan i hagas republican ni mampos man-inaminasa ni kabron na kinalamten i tropan i paire. Kasi nuebu na areglun disareglu! I man-malalagu na republican kada kuat kunsu kuat. Dios mihu!

Dispues man-asoda` mansabiu gi lugat kafe `nai kada unu ha sañgan pot kandidatuña. Ilegña i unu, “I kandidatuhu ni haf` bidaña ayu na malalagu ta`lu”.

Ineppe ni otru, “Ke i tai bidaña i tronu ni para u pinateg huyuñg na eleksion!” Dios tiampare na hunta.

Ti mapot ta pula` i madisgranan republican: mampos mañgontentu ni fuetsan niha ya manmalefa na gaige gi señgsoñg i tautau siha ni ma-upus pot madaña`e man-riku na kometsiante. Man-malefa haye siha pumega guihe na puestu.

I para un` malefa ni publiku un` dañkulu na insuttu gi tautau ni pumega inañgoghon niha giya hagu. Mafattu tatte un` kuestion pa`gu na biahe: Haf` che`cho`mu para un` adelanta ha`anen niha? Na la-agañg ineppe-mu sa` mampos ñañgun!

Gi halum este na estrakada guaha u fañguentos (ahe` ti edukau na adiñgan) kulan pale` totut. Guaha lokue` siempre lumapbla hila` niha gi asuntu ni ti makomprende ni mana` linimus manadan “biba”.

Kasi patte gi afulu` haye mas tarugu` yan dakun. Yangin desde tutuhon tai abilidat hau umekuñgog kabales sentimentun publiku, pues lastima kareramu na biahe.

Yangin para un` hasñgune cha`mu malelefa na ti nigap ham `nai man-mafañagu! Haf` mohon? Lau ta pasensiaye sa` estague` un` patte gi sisteman demokrasia na gobietnu—estrakada!

Fitme Na Kabayeros

Kontentu siñienteghu `nai huli`e man-anchu na ekspirensian nos kuantos kandidatu ni mañaunau na biahen eleksion para i lehislatura. Desde as Heinz Hofschneider, Antonio (Tony) M. Camacho, Ana S. Teregeyo yan Stanley Torres na tropan kabeyeros mangaige na`an niha.

Gi finu` niha esta nahuñg na kinalamten sin planu. Ti manlistu lumi`e galaide` Marianas masotta sin kapitan para u esgaihon hinanau-ta halum gi safu na puettu. Oran areglu! Guaha dañkulu inañguhoghu nu este siha na kabayeros. Huli`e fotmat che`chu` niha desde antes. Maila` tafan mama` i edut ke hapacha`.

Hana` katma siñienteghu i guaha manatma na grupu ni siña rumeskata i linala` tautau-ta siha antes u fañogñug petmanente gi sisonyan diskuidu. Presisu na tana` seguru na manhalum pot nessesidat areglun tano`ta!

Signifikasion Tinilaika

Finapos modun linala` desde finagpu` geran dos dañkulu na tinilaika. Makat ta bira hit tatte gi tradision na modun linala`ta. Mampos ti umafagcha` yan i gaige na sistema ni maplanta desde ayu na tiempu. Matulaika kinalamten-ta desde tradision natibu esta guatu gi ekonomian salape`.

I gaige na sistema presisu na ta estudiaye haf` minetgotña gi ma-adelantan kualidat linala` natibu. Mampos te`ug na asuntu ya solu ta atetuye chadeg kumomprende haf` guaha `nai siña ta pula` karera-ta para mona.

Ti hita solu man-inaminasa nu este na tinilaika. Todu islas giya Pasifiku pumadedesi maliñgun tradision modun linala` natibu.

Un` sumen afamau na professot ni madisponi gi alacha umapunta este huyuñg na pasun tautau isla siha. Konfotmiyu` lamayot patte pot taya` otru para tulaikan i gaige na sistema. Yangin metgot i tradision pues megaiña gi entre hita manguagualu`. Lau lamayot mangaige gi moseria.

Gi todu estrakadan i presenti `nai ta gobietnan mamaisa hit ti baba bes enkuandu ta hahassu i dignun natibu gi todu pinetsige. Soluke gaige fitme dignota gi papa` sinturata `nai siña kabales magahet tana oppan na siña ta gobietnan maisa hit.

Gi mismu tiempu ti u na`lu tatte tradisionat na modun linala`ta. Kulan buttu gi espehos santatte ni adumididi` maliñgu `nai esta na upus.

Hinemlu` Natibu

Esta i nieta-hu kumeke binaya` materiat siha pot daibites yan chenot korason ni huna hananague kada semana. Layeye pot ansianu-yu` lokue lumi`e na un` dia ta tutuhon edukasion publiku haf` taimanu `nai siña ta ayudan maisa hit.

Listuyu` man-ayuda dibatde nu este na asuntu. Tat mas propiu ke mapribenin chenot ke `nai esta sala`. I umatisa interes-hu `nai umadiñgan-yu` yan mediku-hu korason dispues de ma-opera-yu`. Ilegña na taigue problema-hu gi modun linala`hu soluke ke gaige gi haga`hu. Ha pañgun-yu` ayu na finu` mediku.

I kuestion: Kau establisau na gaige chenot korason yan daibites gi haga` natibu? Haye gi halum apuyidun natibu `nai gaige este probleman korason? Kau siña makondukta un` estudiu pot konfitmasion yan haf` na remediu guaha para proteksion niha?

Gi chenot daibites komprendiyun i inipus na usun asukat ni sumaunau muna` fatsu fuñgsion parahiyan tautau. Gigon masusedi este pues ti siña tatautau-ta ha usa naturat na asukat (insulin) pot para umana` mamtu` kinano`ta.

I otru `nai umayunat tatautau haga`ta (red cells or corpuscles) naturat na asukat. Estague` otru tumucha mafañagun daibites. Lau masoda` na i manchichipa marijuana muna`lu tatte haga` niha mañochu naturat na asukat. Siña ha` ti konfotme hau as Mary Jane lau atan pot benefisiun hinemlu`.

Debi depattamentun hinemlu` u choneg ensegidas fina` estudiu pot para ta ketuñgu gi hilu` konfitmau na estudiu kau magahet na gaige gi haga` natibu probleman parehu ha` korason yan daibites. Bula fondun programan federat ni siña ta gagau para este na estudiu.