Direchon Indihinau (Natibu)

Guaha siha sustansiau na asuntun indihinau (natibu) ni debi ta atetuye umina, ebalua, analisa, yan dumeskute gi hilu` antau na inadiñgan.

Yangin ta diskuida hit, pues mas abarambau hinanau-ta gi halom manadan asunto-ta siha ni dumimanda lokue` attension-ta.

Lai federat yan mit pot mit na regulasion kada sakan man-malagnos ginen iya Washington, D.C. Tatnai ta huñgog i delegadu as Kilili ha mente haf` ennau siha na areglu. Sumen impottante na u listu umatan lai federat yan regulasion siha para una` seguru na ti ha aminasa i inakonfotman gi papa` i Covenant. Mas ke sientu tantus na lai federat para u fan mapreparaye regulasion. Hafa este siha? Mampos udu i delegadun Marianas guine na puntu!

Adahe para u guaha man-mapresu tautau-ta pot man-mañgone` fanihi. Haye na pelun chichichu fanihi? Na ti patte i neñkanu` natibu gi kutturaña? Haye dumeklara na piligru makone` i fanihi? Hafa i motibu? Guaha `nai ma-atan halom i pachot hagas botkan giya Alimagan?

Na ti este na disision umaminasa hafa patte gi sentadan natibu? Haf` na masede este sin kabales na estudiu `sino hinisga? Debi i natibu umatatñga gi direchoña! Gigon ta fatkeluye, humalom i ahensian federat man-dispone. Kada lokue` umentalu` ha utut direchon natibu gi guiya solamismu siña dumispone.

Yangin membron lehislatura hau, dididi` kulan ñaba` hau gi ininan este siha na asuntu. Gi kada biahe `nai losus hau, un` yute` mas direchon natibu gumubietnan maisague`. Poresu na debi gume`luluye komite`an federat u listu rumikohe haf` humuhuyuñg ginen Washington sa` sessu lanan lokue` si Kilili` gi lamasaña.

Puntu: Un` membron lehislatura sumañgan na debi i publiku u tuñgu` kabales todu pot planun usun iya Pagan. Ya haf` na inna` silensiu konsiderasion, sin pattisipasion i publiku, i asuntun casino? Sen ti umaya i man-sañgan yan i man-chogue entalu` alacha yan pa`gu. Haf` mohon?

Gastu: Ayu na apas hospitat i mafanana`an “deductible”, entalu` $500-$1,000 pesus, depende gi minedoñg familia inipos na makat kontrariu kontra monedan familia. Huñgan ni unu umañega attension setbision mediku lau haf` i man-sabiun hegsu` I Deni` na satbasion para ayudun familia gi este na higante? Na ti magahet na pot 20 años taya hatsadan sueddu guine?

Atgoya: Kanaha` dies años kumuleka i CUC gi asuntun para umarebaha apas kandet. Ginacha` induktu hombre ni otden kotten federat gi `nos kuantos asuntu ti siña ha komple. Humalom pa`gu i EPA para uma-espihaye tahguen CUC chumogue i makat hana` fonhayan.

Tantu de humugandu huegon politika yan man-sabiun I Deni`, ginacha` todu klasen induktu na ni para u aregla i power plant gi Lower Base ti ha lañgag sa` ni fondu taya`. Debi maseha haf` para u chogue para mona na umaguatdia gi sinsiyu na eskalera pot no ginen otru diskuidu para u sapet mas i pbliku gi apas kandet.

Suena: Gi suenan tatalu` pueñge, hoñgga pineduñg trosun uchan gi atuf i gima`. Hu hala sabanas-hu para bai onno`yu` siakassu hinilat i lasas kueru ni maneñgheñg pueñge.

Gi chatagmag, suena gi chagu` katen gayu ni sige ha fatta finatton oga`an. Kahulu`yu` chumupa para bai tagam kinahulu` atdau yan primet pusuelon kafe.

Fresku na oga`an piot sa` inichane i tanu` gi paiñge. `Nai sige muma`lag ininan atdau, sige lokue` adumididi` maliñgu i sirenu. Gofha`an na ha`ane.

Hu deka` i gafu` gi tronku lau `nai hu puta`, na`gao. Pues hu usune dumeka` i mas tagpapa` na pontan. Hu kacha`, kamyu para bai` leche ilun laggua yan gualafe. Paire na sentada dispues.

Kustumbre? Kasse hayun isla i para tafan lodu` yan masegat diariu. Ta kanu`e gi kada sentada estake man-haspog hit. Lau `nai sige natibu man-chetnot korason ta bira hit ya mas guaha inadahe gi haf` ta sumumuke pachot-ta.

Tai malefaghu `an mali`e hit mayaye man-mamaisen kau malañgu hau. `Nai kulan loddu` sinturamu mañguentos ta`lu na adahe i “stroke”. Taya` linachiña medision medianu yan dididi` inadahe gi sentadamu. Todu mampos ti mauleg. Pasensiaye pot hinemlo`mu mismu!

Presetbasion: Gi antigun na komunidan tautau-ta, entre matala`, ha`me `sino ma-asne i guihan yan katne pot taya` guihe na tiempu kahun ais (icebox). Estague` dos manera `nai mapresetba pininu` pinegsai pat kineni` buyada na guihan.

Guaha lokue` tumuñgu` presetbasion agu`un haya deste mahafot gi papa` tanu` esta ineskomen mai`es. Kasse eskomen mai`es mas ma`ug. Otru siha agu`un tat kumu choda, suni, kamute, dagu yan nika mana` fan gasgas ya man-mapega estake listu para umana` lagu.

Paire na mirienda atulin harina, dididi` finadeni` asnen tukun, alaguan, atulin kalamasa, pat atmayas mai`es. Tamales aga`, suni, mendioka, saibog yan buñelos dagu piot gi tiempon ha`anen gupot siha. Mina` dagu i usun este na tiempu layeye pot estague` tiempoña makusecha.

Guaha siha na agu`un natibu manñge` lokue` `an malomug. Lau hasan lusuñg para man-lomug lemai yan suni. I mitate para manguleg mai`es. Pa`gu `an tatnai un` chage usun manu, pues ni un` falag manu, ti u famtu` ginilegmu eskome.

Ña`ot: Guiya `ste i chada` guihan yan pañglau. I guihan mamigan, i pañglau mañgulales. I tatatte malag i kantun tasi ya ha sotta chada`ña. Dispues de man-mapulakes `nai ha bira siha halom gi tanu`.

Hu chage mamigan kichu ni gatdun gi tekin. Ti hu nesessita totche. Namase` i hagmañg `an para u e`suette gi sepblaghu. Paire mañgulales na pañglau maka`et.

Pa`gu `an guahu munagasgas kachu`, pues kasse haspogyu` antes de bai dibana i sensin para sashimi. Dididi` na asiga yan doni` sale nahoñg para bai` nafagpu` nobenan kanton labadot.

•••

Kada ratu mañguentos i membron lehislatura na debi problema siha u fan masatba. Dispues, ha bira siha ya mapatek i lata papa` gi hegsu I Deni` sin u atrebi siha mañaunau gi satbasion problema. Anog na siha i mas dañkulu na problema ke problema mismu! Dios mihu na che`chu` kabron!