Dibaten Direchu

Dañkulu na mubimientu giya Guahan manala`la` kuttura yan mas impottante, dinisehan eksisiun direchu para u gubietnan maisa siha.

Umatotpe i segundu patte yan posision federat ni ilelegña na iyoña iya Guahan desde 1898. Kumeke ilegña na gaige tautau Guahan gi papa` banderan Amerikanu poresu na i asuntu kanaha` makat makomplase.

Huñgan ha sosoyu` i UN na u masede natibu eksisiun ditetminasion futtunaña. Lau i asuntu ligat `nai sin konsimientun gobietnun federat siempre este na diniseha gai tiempu estake u guaha inapprueba ginen Washington.

I Organic Act tiha sede Guahan gi katkuet manera pot eksisiun direchun para u gobietnan maisague`. Gaige este na pudet gi disposision i US Congress. Lehitimu na ginagau lau anaku` na karera estake para u guaha suanu na disposision faborapble gi natibu.

Achog iya Puerto Rico esta 72 años desde ke ha plaiteha para u estadu. No siakassu i US Congress piot pa`gu na biahe `nai pinesun ni pagyu. Lau ta daña`e mañelu fumama kutturan natibu sa estague` `nai gaige pisun sustansian man-Chamorro.

Tinilaika: Hinalum modetnu na teknalaye (technology) ha tulaika modun mamahan nesessidat gi tenda. Tat trastes kumu iphone, ipad, yan laptop manma-usa gi inenkatgan kosas siha “online”.

Pininu` kareran para i tenda. Puru hoñu` batunes! Ti mabisita i shopping mall yan tendan otru siha trastes. Poreso na guaha 900 tantus na shopping mall giya America para u fan mahuchum na sakan.

Kontodu konsuttasion yan mediku puru ginen trastes modetnu. Unna` hanague notisia pot pinadesisimu. Finaisen hau dispues `nos kuantos kuestion dispues `nai dinispacha hau amot. Ha utut bisitan hospitat yan mediku.

Usun laptop giya Japon yan man-atbansau siha na nasion giya Uropa i estudiante ginen makinan komputa `nai machuchule leksion niha. Esta ti manhahanau para i eskuela. Estague` otru modu ni tinilaika ni modetnu makinan teknalaye. Ayu `nai mabisisita eskuela `an para fina` huegu yan eksisiu.

Este na tinilaika siempr u fattu mage guine. I sisteman edukasion debi u tutuhun umatan este na modun finana`guen leksion gi estudiante-ta siha.

Antigu: Gi mediu sisienta siha na sakan unuyu` gi kehanten para umana` para mahatsan hotel (Continental) gi Puntan Muchot (Micro Beach) `nai gaige pa`gu i Hyatt.

Este na lugat soñgsoñg peskadot antigu ni mahatsaye fanliheñg familia guihe na tiempu. I sustansian aksion mame dignu na presetbasion lugat antigu para i manatatte na famaguon natibu. Peskadot ni monhayan mana` gasgas guihan niha giya Managaha man-halum Puntan Muchot `. Mapatte dispues kineni` niha guihan gi señgsoñg.

Magahet na kada mattu-yu` guihe gaige ekun piniten konsensiag-hu pot uttimoña maliñgu un` antigu na lugat peskadot tautau tanu`. Huñgan, ma`lag na kandet gi ge`halum, minachum atdau gi lemlem tautau `nai maliñgu dispues gi puntan tasi gi sanlagu. Parehu na minachum atdau yan `nai masohgue ginen natibu iya Puntan Muchot.

Antes sessu ta gonaf tiau, faya yan manineñg gi inai mientras tumalalaya si tata. Pa`gu puru kulot amariyu na buttu man-gagalileg gi hilu` unai mientras finagagase lañan tatautau niha ni rinisaken tasi. Dios mihu na tinilaika desde tiau esta tautau!

Man-ñgiñge`: Sumen agradesiyun kustumbreta man-ñgiñge` gi mañaina-ta siha. Tafana`gue lokue` famaguon-ta nu este na kustumbre.

Tumekun i patgon, ta echa sinsiyu bendision na u felis kareraña, dispues `nai ta dispacha. Umeyag sattun respetu gi mañainaña ya esta namagof `nai ta konfitma giya siha i guaguan na bittun bendision saina. Mina` kontentu-yu` sa` tita fan masogne na hita bumende si Jesukristo dispues de chikun pagpag taimanu malabidan Judas!

Liñguahe: Esta abarambau hinasog-hu `nai huhuñgog usun Eñglis gi finanaguen finu` Chamorro. Si Pale Eric Forbes ha esplika hafa lañget `nai ilegña “sky”. Na ti lañget heaven, sky i mapagahes? Dispues, haf` na ti inna` setbe Chamorro gi esplikasion sustansian palabra? Na ti hamyu dispues mas muna` bulachu i finu` Chamorro?

Komprendiyon i mubimientun manala`la kutturan natibu. Lau guaha siha man-mafrabrika gi karera. Ni achog ta guadog estorian natibu ti un` soda` tat imbarasus kumu kantan anaku` (chant).

Debi in` komprende na i Chamorro pot kuatro sientos años makepunu` ni Españot, Haliman, Japones yan pa`gu Amerikanu. Tai kampu kumantan esalau pot kumakahat pot no umapunu`. Haf` mohon?

Inaguaiya: Pot mas ke siñkuenta años i dos umasagua magualu`e un` dañkulun lancheria. Ayu na lanchu inyun familia pot mas ke 200 años. Siha uttimu i dos chumahlau ya mananum yan mamogsai pot mantension niha.

Gi halum pastahe gi fina` yanu gi hegsu` sessu i amku` hana` fañochu katdumin binadu fuera de ga`niha guaka. Ha chogue este kase tres biahe gi semana. Dispues ha tulusgue` para i hatdin ha assiste tinanum niha hanum yan abonu.

Fietmenti i dos asagua machogue che`chu` niha diariu. Dispues de sena matachoñg i dos gi baranda kumonbetsasion ñaihon antes de oran deskansu. Un` dia dimalas gotpe i palao`an. Mampos inestotba i asaguaña pot mampos hihot i dos gi todu kinalamten niha.

`Nai esta i amku` ti halañgag didog mahalañg ni sinantusan na asaguaña ha bende enteru i gualu` ya humanau para i siuda. Lau antes de u hanau ha bisita pot uttimu besis i katdumin binadu. Ha togtug un` tatneru, ha chiku ha despidi. Sige ha sausau lago`ña `nai ha huchum i pettan i lanchu pot uttimu besis. Fiet yan sinsiyu na inaguaiya.

—

Lache: Ha fama un` professot karisu na iya Marianas gaige gi papa` “guarded sovereignty”. Malagnos este gi alacha gi Isla 63 radio giya Guahan.

Hu agañg halum na taya` konseptun “guarded sovereignty”. I palabra (sovereignty) ha signififika na independente i nasion. Ti independente iya Marianas sa` gaige gi papa` banderan Estados Unidos De America. Iya America i independente na nasion. Patte Marianas gi papa` gobietnun federat.