Dañosu i industrian casino

Tantu de man-baila hit yan diskuidu, uttimoña masuhun un` sumen destrosiau na asuntu gi hechuran casino. Mana` silensiu gi sigidu na inapprueba gi lehislatura. Dispues mafitma lai sin annunsiu as Gobietno Eulogio S. Inos.

Haf` na machanda direchun i tautau man-pattisipau gi este na asuntu? Na ti sustansiau yan dañkulu i attikulu poresu na debi u saunau i publiku? Kau pot dos biahe i botadot Saipan ha punu` este na ginagau na mana` silensiu finaposña gi dos na guma` lehislatura?

Todu i tiempu i sikretu i primera simiyan dañkulu na che`chu kriminat piot `nai mafattu ginen chatdisposision offisiat publiku siha. Estague` primera defektu gi hasupag na inapprueban lai casino guine gi alacha.

Tat ti tumuñgu` na mampos tumunog rinikohen kontribusion tax guine. Hafa na taiguine masusede? Na ti magahet na pot diskuidon man-ma`gasta na tat familia pa`gu ti nina` gagalileg gi halom fache` miserapble na pinadese?

Hagas planun i administrasion yan lehislatura para umapunu` i programan man-ritirau pot para u fan obra kumonduse halom lai casino. Enfin, masoda` ginefsagan niha ya sin ditension machoneg sin konsiderasion sentimenton botadot Saipan ni pumunu` i casino pot dos besis. Estague` na mañan offisiat i man-gaige pa`gu kumu man-sabiun hegsu` I Deni` ni sumen tai respetu gi disision publiku.

Gi finu` atpahon man-amko`ta: Todu tinituhon ni ti mauleg siempre baba uttimoña. Poresu, debi hita mismu ta choma` dañosu na lai pot no u yamag yan destrosia i pas yan trañkilidat ha`anita kumu tautau isla. Man-magof yan mañgontentu hit gi hilu` hinimidde gi haf` guinahata. Taya` motibu na para ta sede mañan kriminat ginen hesgsu` I Deni` na u destrosia modun linala`ta.

Destrosiu: Luta yan Tinian

Pa`gu matutuhon mañgalamten iya Tinian yan Luta, mafitma lai i Saipan Casino ni umafuetsas i nuebu na dueñon Tinian Dynasty para u gu`ot tatte planun niha. Kontodu iya Luta nina` kikilulog lokue` para u fan inbiette (investor) casino guihe.

Mañgeha publikamente na man-madage siha gi hilu` planu para uma-adelanta ekonomian dos tanu` yan enteru iya Marianas ginen industrian casino. Sumen dañosu na dinage piot `nai machalapon este na gaseta halom Japon yan Asia. Ha huchum man-inbiette guine pot klaru na taya` fitme na areglu ginen man-ma`gas i tanu`.

Hu komprende afulu` politika gi halom este na te`ug fache`. Lau haye in` represesenta; na ti tautau ni hagas man-ñgaha` ayudu ginen hegsu` I Deni`? Kau i destrosiu gi adelanton ekonomian iya Marianas ni para u sapet mas i tautau i primera regalon miyu? Kau destrosiu tinagu` i publiku ni in` represesenta? Haf` na infa` pigu` fache` i publiku gi asuntoña? Dios mihu na che`chu` muron!

Mauleg mohon i chatdisision areglu ni muna` dimu yan fuma` basula pa`gu Tinian yan Luta? Haf` gaige gi gueku na konsensian miyu? Dalai na ma`lag ha`ane ya homhum lini`e miyu?

Taya` respetu gi publiku

Ti hu komprende i taya` respetu gi disision publiku pot dos besis. Lau komprendiyun haf` na mana` esgin mutuñg na sisonyan karisu huyuñg i gotpe na inapprueban lai casino para Saipan.

Anog na man-tai konsensia espirituat i bumota casino piot sa` todu atlibes aksion niha. Ma-apprueba sin kabales na inestudia. Dispues ha bira siha tatte ma-amenda mas i lai casino. Hombre ni este memegai ha` sustansiau siha na asuntu ti mana` fan halom.

Man-hinatme kutturan “Apas Baila” piot sa` kontra kostat pot kostat na pupulu. Anog na maseha manana i ha`ane, ni unu lumi`e haf` gaige gi sanmena sa` kulot betde ha malili`e ni hinemhom? Manana ya infa` man-bachet hamyu?

Ni taimanu na atlibesmu, taigue i futturon i tautau gi lai Saipan casino soluke interes i Chinu ni esta monhayan ma-ayeg ni man-sabiun I Deni`.

Siña ha` guaha apas gi immidiatmente gi halom kadada` na tiempu. Gi dispues man-afana` hit pot kuestion futturon programan man-ritirau yan ayu i manhuyuñg gi programa. Puru sakudidan me`nan gui`eñg `nai Hassan ma-atan mona haf` mamamaila` dispues de gipot fina` mames. I mames siha gumulusune mientras i `ansobla man-mana`e hit para ta apprubecha.

Maseha haf` u guaha, maila` tafan arikohe unu yan otru ya ta chule` tatte futturon famaguonta gi hilu` motmut na inestudia yan ma`lag na planun finatton chatagmag. Ta mirese este mina` hu fafaisen kada unu para ta fan apipet umaregla tatte i mampos machalapon na halom salan gima`ta. Ha mirese famaguonta mit pot sientu na animu ginen hita pa`gu. Maila` ta ayuda prumutehe futtunan niha. Felis Pasgua!

John DelRosario Jr. is a former publisher of the Saipan Tribune and a former secretary of the Department of Public Lands.