Congratulations Pale James

Gi mapos na semana ma-otdena pale si James Salas Balajada, un` hoben ni umayeg humidde na bokasion para u fan ayuda gi ma-adelantan linala` famaguonta siha espirituat segun i tinagu` i Saina.

Este i espirituat na patte gi linala`ta sumen presisu gi inestablesen ineyag dichu che`chu` tautau ni sumetbe kumu pisu gi sibilisau, pas yan trañkilu na kinalamten komunida. Estague` na añkla i mas presisu gi finapos kada unu.

Gigon un` pega añklamu papa`, ni kuantu na napu yan chubasku un` finatoigue siempre i botimu u kilulog ya u gini`ot ni puntan tali pot no u lailai yan mafondu gi halom lañgat gi taduñg na tasi.

Ha pañgun tatte esperansiaghu disision este na patgon layeye pot gineftauña man-ayuda gi otru. Estague` na pisu i Sainata `nai tumachu ya hana` fan manhassu hit na muñga ma-tailayiye i namase` ya unna` geftau hau gi nesessidat i timuna` siña.

Dañkulu lokue` na bendision para i dos saina pot ma-entrega lahen niha gi Saina para u petsige mamana`gue haf` siha tinago`ña deste antes gi tiempun Yuus Tata.

Anaku` kareraña si Pale James ya manlistu ham umayuda hau gi nuebu na bokasionmu. Bien felis Pale James gi ma-otdenamu pale`. Motmut bendision yan tinayuyot ginen hame! Congratulations!

Che`chu` tailaye
Mafattu mina`ase`hu gi un` lahi-hu ni todus numesessita pot batidan eleksion mas ke dies años malofan. Esta man-bebela gi fihon katren tataña gi hospitat `nai umagoninias.

`Nai gai chinatsaga yan lai, ensegidas masoyu` para u resigna-gue` pot no u fan kahaga`. Ma-abandona i prohimu yan makat kilu`osña.

Mañgge sensian kilisyanu yan ma`ug na amesta gi este na sinisede? Kulan un` abandona gi taduñg tasi `nai mafondu i bote pot no un` fan ayuda sa` pumalalapa ya kumeke matmos.

Anog na solu pot interes ayu na attension. Ti namatman i chumogue sa` hagas hayuña man-usa tautau kumu pot interesña.

I mahasñgon na sinisede siempre u birague` tatte. I Saina sen man-apase ya u fattu tarehamu `nai un` diseseha dispues maseha dididi` konsuelu gi halom taduñg hoyun sasalaguan ni hagu mismu gumuadog.

Nobenan Familia
Buente pot megai familia dumiñgu i hagas soñgsuñg na kulan maliñgon ñaihon lokue` nobenan familia ni sessu ta tucha gi tiempon ha`anen gupot siha.

Tai malefaghu `an lumiliku` nobenan Niñi Perdido gi todu guma` bisinu. Mangaige lamayot patte deste patgon yan amku`.

Deste tinayuyot, kanta yan fina` sena gi finagpu mina` tres dias sumen antau na dinaña. Estague` tutuhon finanague yan adelantun linala` espirituat gi famaguon. Nina` fitme mas este `an mandottrina dispues de finagpu` eskuela.

Mas lokue` hana` fitme pogse` inafamauleg gi entalu` todus. Guaha ha` buente kumilili` nobenan familia para i nuebu na soñgsuñg. Mauleg `an makontinua gi hilu` pattisipasion bisinu. Mas fitme inafamauleg yan proteksion todu.

Amot Natibu
Hu li`e antes defunta biha-hu sige ha lomug pugua` mahetog gi halom dikiki` na achu` lusuñg (lomug). Dispues ha pega hagun tinanom siha ya sige ha lomug. Ha pega gi halom hanom ya ha kula. Hana`eyu` para bai gimen. Mala`et!

Hana hassuyu` inasoda` mediku siha ginen enteru elmundu. I kuestion: Haf` na mampos anaku` ha`aniña i Chinu ke otru rasan tautau. Na tautaugue puru amot ginen tinanom magigimen. Tatnai magimen amot pedulas taimanu i Amerikanu.

Dispues `nai ha diñgu ham si bihahu gi idat 84, sige hu arastreha haf` sessu sentadaña `an matachoñg chumochu. Diberas, sessu ha offisiona kafe, dididi` asukat yan hinegsa`. Taimanu na anaku` ha`aniña ti komprendiyon. Magahet na hagas makalamya na biha.

I hinemlo`ta kada unu kunsu kuat. Mauleg ta atetuye eksisiu yan metgot na inadahe gi haf` ta kakanu`. Sentada regulatmiente sin magulusune i paire! Finu` man-amku` todu inipus ti mauleg. Dispues, hagu i kapitan galaide` tatautau-mu.

Lastron Tata
Sige hu dibina finattun fañuchanan yan fañumnagan. Gi mismu sakudida sige ha` halom gi hinasoghu button amku` gi kantun tasi ni tinatitiye ni lahiña.

Maseha achagu` pasun tataña esta man-galolope pot para u ke hagu` mona anaku` pasun tataña. Dispues kinata`uma ya sige i dos tatte gi kareta.

Ayu na patgon u finanu`e as tataña manu ha hananague. U fattu gi china felis. U pinipet gi halom piligru ya nina eyag fitme na mocun satbasion para guiya mismu.

Pasensiaye famaguon gi haf` propiu para umatatiye. I felis na kareran patgon i guaguan yan sumen namagof na premiun saina. Na`e animu pot futtunan niha.

Niyog yan tuban mames
I kompanian amot (US Pharmaceutical) madestroai amanu siña usun niyog pot mantika. Dispues `nai masoda` na dañkulu benefisioña usun niyog gi tautau. Lau mahasñgon che`chu` tinailaye pot man-mamatitinas miyon pot miyon pesus na ganansia gi sakan ginen mabenden amot niha.

Pa`gu iya Filipinas mafabrika tuban mames gi hechuran pedulas asukat. Fahna mampos na produktu giya Japon espesiatmente gi halom man-daibetes. Sa hafa mohon? Mames na klasen asukat ni tai asukat! Guaha besis na debi hita mismu ta estudiaye haf` mauleg para hita mismu piot gi bandan hinemlu`.

Lokue, guaha un` Samoan giya Houston, Texas, inadite prohimu daibites. `Nai tantu mafogsiye amot hospitat hana para. Humanau man-gagau fafalun choda. Ha sotne pot kuattru oras ya ha gimen. `Nai mariseta dispues maliñgu i daibites. Mafaisen ni medikuña haf` bidaña lau sen tiha sañgane. Finu` i prohimu tat tiniñgu` niha i para umachule`guan i natibu ni amotña pot para u fan mama` kepble.

Hagas i natibu hanasetbi niyog gi sentadaña ya sumen brabu. Lau estague` saikilulog kompanian amot pot para ta fahan produktun niha. Siha man-mama` kepble hita mañgilulog pot manadan lache na espantu pot niyog. Haf` achamauleg alimienton kadun guihan ni maleche niyog pat cereal para i famaguonta?

Ñahlalañg
Sige amiguhu biudu ha deka` gitalaña mientras kumakanta. Dispues, hu li`e na mesgu mataña. Ha atrebigue` sumañgan na mahalañg-gue` ni defunta.

Hu faisen kau guiya ayu na palao`an i ha fababa `nai man-liles as Konchita. Ai, hihot ha panagyu` ni gitalaña mientras ha usune chumaleg tuyan. Buente magahet ginacha` binalutan ni baban bidaña.