Chepchup Lina`la`

Gi un` konbetsasion yan un` menhalom na primuhu, hu mensiona na hu huñgog pot dies segundu komplidu silensiu ni muna` senchatsaga siñienteghu. Hu susedi este ya esta pa`gu ha estototbayu` pot ti anog kau i mamamaila` mauleg pat tailaye para iya Marianas.

Kasi guiya este i finu` manamku` “Chepchup Linala`” `nai pot dies sigundu kulan hau prefektu tañga ya sige umensinahya un` keketuñgu` haf` masusesedi. Estotbu na sinisedi ya mas ha estotbayu` i esta tres biahe hafatoigue hit ira ni chumalapon ha`anita sin ditension.

Kau guaha mas tailaye na ira mamamaila` fuera de matai sisteman komunikasion yan dos pagyu? Guaha `nai in` hassu haf` mohon mamamaila` para estake u fagpu` este na sakan? Mampos ha estotbayu` i siniseden “chepchup linala`” `nai silensiu mampos hiniñgoghu pot dies segundu. Mananayuyotyu` na ti kastigu para hita.

Pot fabot na guaha tiempon miyu manmanayuyot estake kulan manasegurau hit na todu felis para mona gi 2015 `sino pa`gu na sakan. Chegue pot satbasion todu!

Pagan: Liyañg Guelu

Gi un konbetsasion ha mensiona un` tiuhu sineda`ña liyañg antigu gi kanton tasi giya Pagan. Ti bai` diskute manu guatu. Era, ume`epupulu `nai ha soda` un` potta ni humanau halom gi liyañg. Dañkulu na liyañg ni sumen gasgas.

Ilegña na todu kosas yan trastes antigu manma-aregla propiu gi sagan niha. I satgen unai sumen gasgas. Kulan mohon mangaige ha` gi halom liyañg i manguelota pot ni unu anog. Bonitu na lugat yan sagradu kumu lugat espiritun manguelota.

Piniloña i amiguhu na libregue` bumisita i lugat maseha ñgai`an `nai malagu`. `Nai mattu i batko ginen Saipan, ha kone` unu na amko` para u fanu`e` ni sineda`ña liyañg. Taigue i petta `nai humalomgue` un` mes antes. Puru ha` kunanaf alalag yan ñiete. Taya` potta. Kasi mana` abag i amiguhu. Espiritun guelu humuchom i pettan i liyañg!

Esta nina` titisu pilun kanaiña `nai sige ha sañgan haf` lini`e`ña gi halom liyañg. Guaha `nai matman haf` na para umachoma` bimirague` tatte. Che`chu` guelu ya kasi mas kombene ke para umadestrosia i lugat.

Guiya ayu na lugat `nai chetton inatanhu gi minachom atdau. I ligan potput alalag estaba deste sanpapa` esta`i sanhilu`. Hu atan dispues hulu` i hegsu` gi katan plaset Regusa pot ayu sessu i amighu `nai hali`e` achon guelu antes gi minachom atdau. Era ha supopone na kareran para u fan lulai.

`Nai taya` lini`e`hu chumaleg tuyanyu` pot imbelekeria. Hana` hassu finu` man-amko`: “Yangin para hagu siempre u fattu”. Seru! Kontodu kinine`hu medianu na ayuyu masohgue gi bira birada. Mamatkiluyu`!

Despedida: Hu deside para bai` pega lapeshu papa` entre mediu `sino uttimon otru sakan. Presisu na baina` fonhayan tumuge` dos lepblu: unu gi finu` Chamorro i otru Eñglis.

I primet pot “estoriata” guine siha na islas entalu` morat `sino grasiosu na finapos. Finu` tanu` pot para ta abiba usun liñguahe, kuttura yan tradision Chamorro.

Pot ihemplo: Un` saina ha taitai un` estoria ginen este na lepblu. Gi karera mona `nai ha petsige fumana`gue famaguoña finu` Chamorro siempre ha hassu tinaitaiña lepblu pot estoriata. Ha espiha tatte ennau a lepblu para u introduse gi famaguon. Estague` puntoña matuge` komplidu finu` Chamorro i primet lepblu: sineyu` usun haf` naturat yan ma`ug gi sustansian Chamorro.

I segundu pot asunto-ta siha gi mafotman amtau na disposision pot para tana` metgot eksisiun sisteman gobietnon demokrasia guine. Guiya este i mesklau na kinalamten natibu `nai guaha na pinelota na hulu` ta fafana` pot apmam de manalag papa` hit. Gaige este siha na asuntu gi dos patman kanaita.

Esta `nos kuantos biahe ta prueba giya hita na siña ta afuetsas tinilaika gi haye rumepresesentqa hit gi hegsu` I Deni`. Estague` na puntu debi ta guatdia diariu pot proteksion tautau gi todu kinalamten guine. Guaguan na pudet ya hita solu mandueñu nu este na direchu—direchon botasion yan disposision.

Laulau yan Muchot: Kinemprendeghu na iya Laulau i uttimu na soñgsonng Chamorro. Naturat na lugan proteksion i dos kantit gi todu atmos bandan rubentason gi sanmena. Mauleg siñienteghu kada finatoghu gi lugat. `An chatseguru hau, fangagau dispensasion yan bendision konrespetu gi manmofo`na. Laulau i señgsoñg antigu.

Kulan hulili`e` luchan gima` higai yan siguale gi kanton tasi. Fresko na guma`, i higai gai atuf tinifog hagun niyog; i siguale mahafot gi papa` tanu`.

I Puntan Muchot otru lugat `nai guaha mas inadahe giya guahu. Hu sesiente espiritun manamko` guine na lugat piot gi lemlem tautau. Kasi ladañkulu na komunidan peska i lugat antes. I inaiña `nai mana fandaña todu kineni` ya managasgas antes de otru disposision kau umapatte pat maprisetba.

Otru unai gaige gi papa` San Vicente mafanana`an Taigomat. Un` tiuhu sumañganeyu` na tatnai hinalulague` malag ayu na unai. Gi uttimu biahe `nai manrikohe alileñg sen tiha birague` tatte dispues. Otru kanton unai gi santatte siha dispues ha rikonose. Hafa no kau guaha ha` ti para hita na lugat?

Hu tuñgu` yan komprende na ti un` mana` tailaye lau ni ñgai`an lokue` `nai un` mana`e suettemu. Hu li`e` gi un` che`luhu. Parehu finatton mame gi un` lugat. Guiya ha` mana`e. Hu birayu` tatte gi gima` kara` yan mahlog todu i dos papaghu. Dios mihu!

Inosiente: Guaha siha halom tanu` yan hogsu` hu fatoigue `nai ume`ebinaduyu` antes. Bonita na isla Saipan ginen hegsu` sanmena yan santatte. Yahu i sanhaya pot ayu `nai dodoku` i atdau `an oga`an `sino chagchag oga`an. I otru banda i minachom atdau, despedidan fingapu` ha`ane.

Hu komprende dispues relasion finatai famiia yan chechu` peskan maseha hafa kau tasi pat halom tanu`. Adahe na hihot binadu in` fuegu gi hegsu i Edot lau ha chaole dadalagña, manatan dispues ma`pus. I numberon bala ni pakpak gi un` sigidu nahoñg para u diniskareta iluña. `Nai klaru na guaha mabebela guihe na pueñge in` pega papa` paken mame sin ditension.