Chenot Lasarinu

Todu humuñgog lau memegaiña ti kumomprende na i primera defektun i tanu` gaige gi baban kinalamten ekonomia. Kada ma-atan halom mali`e na namasa` kulan mohon pipinu` na chenot lasarinu. Todu lumetke kase pot mapot na asuntu. Guaha probleman miyu man-manaitai?

Yangin un` diskuattisa papa` sustansian ekonomia siempre un` tunog gi monedan familia yan kau suffisiente ginanan niniha para uma-akude nesessidat siha diariu. Gi mismu tiempu, kada sumeha hau ginen offisiat na checho`-mu kumu representanten i tautau pues kontodu hagu sumasaunau muna` chatsaga linala` familia.

Hafa ma`añau miyu humala halom i toru gi pastahe para in` ketuñgu haf` nesessidatña? Kau ha nesessita hanom pat pastu? Haf` taimanu unna` mansu `nai ni hagu ma`añau hau humihute?

Priniponen Sueddu

Todu atmos banda, bisnis yan gobietnu, debi u apase empleau sueddun mafanana`an “prevailing wage” (sueddu gi ora) yangin man-emplea hutnaleros ginen hiyuñg (CW), segun i priniponen aktu ni inentrodusen Sen. Paul Mangloña gi mapos na semana.

I puntu para uma-asegura na matatiye lai sueddu `nai kabales ma-apase empleau disiente. Ginen este ha soyu` siempre tautau tanu` manhanau guatu gi praibet pot esta añgoghuyun i sueddu. Mas fitme na pisu para tautau-ta.

I otru attikulu i para uma-espiha, gi halom dos años, mana` parehun sueddu gi todu atmos banda gi parehu na offisiu siha. Yangin ma-estudia hau engineering pues i sueddun este na offisiu gi todu dos patte, bisnis yan gobietnu, debi u parehu. Hana` guaha mas amtau na modun sueddu `nai i man-ma-eduka na tautau umasoda` añgoghuyun na sueddu gi praibet.

Adumididi` siempre mas megai tautau-ta gi bandan praibet pot mas bali yan parehu sueddu gi todu atmos banda. Mauleg na appottunidat para i mas man-animu na tautau-ta piot i mauleg edukasion niha. Mas siempre u guaguan sueddun praibet. Mas lokue` tasoda` i man-paire na professionat gi bandan bisnis. Mauleg na prinipone i ginagau Sen. Manglona guine na puntu siha.

Disposision Fondu

Mauleg umakomprende ensegidas haye gai atoridat man-dispone fondun publiku antes de umayuma i salape`. Gaige este solu gi ramas lehislatura. Debi u tutuhongue` gi sanpapa` na guma gi hechuran lehislasion. Estague` klaru na mandatun i konstitusion.

Kontodu fondu ginen i casino debi uma-entrega guatu i lehislatura para u dispone antes de disposision gobietnu. Huñgan esta maseñala usun este na salape`. Lau debi u komplidu gi hilu` disposision lehislatura para u ligat.

Estague` layeye i huna` halom na keha gi kotte. Mauleg sa` i gobietnu mismu kumonfitma na dinanche i puntun lai atoridat man-dispone fondun publiku. Debi umadanche chachalaña para muñga manadan birada pot che`chu` diskuidu!

Diskriminasion

Sige mas te`ug i geran entalu` man-atiluñg yan man-a`paka` giya America. I neguru ilelegña na megai gi tautau niha man-mapake ni polisian man-a`paka`. I faktu na rekot ilelegña na megaiña a`paka` pininu` atiluñg pot usun pake.

I muebementun “Black Lives Matter” (gai bale linala` man-atiluñg) siña ha` lehitimu `an un` bira tatte i asuntu gi estorian iya America antes yan `nai pa`gu ma-establese kumu nasion. Klaru na esklabu i atiluñg `nai guaha manmafa` benta kulan attikulu gi estanten tenda. Chatpagu na tinatte kontra i los probes.

Ginen inaligau todu rasan tautau pot justisia para todus mina` dispues adumididi` manma-aregla parehu na tratamientu gi maseha haye. In` hasu estorian Dr. Martin Luther King? Guiya mas afamau na kabisiyun inaligau justisia para todus. Ahe` ti ha limitte checho`ña gi man-atiluñg na ha inklusu todu rasan tautau.

Inadahen Fiñkas

Sige machukan kuentos na guaha mas fondu gi kaha para otru sakan, 2017. Gi mismu tiempu propriu na in` adahe gastun nuebu na fondu. Atan haf` mamamaila` `an magpu` maseden tautau hiyuñg na empleau.

La fotte este na linau kontra ekonomian i tanu` para u destrosia. Poresu na get adahe ya in` fan mamo`lu para `an mattu ennau na mattiempu yan didog na mattirun eskases. I tautau manlulupog hanom gi tiempun uchan ahe ti `nai añglu` i tanu`.

Sattun na sensian responsablidat i inadahe gi fiñkas gi ti asigurau na karera mona. Muñga mabatga hamyu gi kadu` na adelantu siha sa` siempre kada unu u dimu `an magpu programan CW2 na hutnaleros. Lamegai na bisnis para u huchum. Ha transladague` este guatu gi menos na aduana (tax) para i kaha. Gaige este na obligasion gi dos patman kanai miyu!

Amotsan Eskuela

Man-suetten famaguon na tiempu sa` guaha amotsan oga`an yan talo`ane gi eskuela. Man-mattu gi eskuela dispues mañugu` gi cafeteria man-amotsa. Programa ni mana` guahaye para estudiante siha ni numesessita ayudun alimientun neñaknu`. Man-suette!

Hame antes, tat grifu yan drinking fountain ti in` falague man-gimen antes oran estudiu. Magradua-yu` kontodu diploman mañoplan hanom grifu. Dios mihu! Dispues i bento` mame mabalulutan gi halom hagun choda ni mafalulun pañeles. Tat halom tañgantañgan ti in` fatoigue umusune bento ginen i gima`.

Animu na estudiante i mañasaga gi chagu` tat kumu Susupe yan San Antonio ni man-mamomokat diariu achog para amotsan talo`ane. Konsidera i mattiempu `nai man-e`ensinahyau entalu` fina nahgoñg estake man-mattu gi eskuela sino gima` niha.

`An bomento` hau pabu (satdinas) lamegai problema-mu sa` ni habun paupau taya` gi kemun eskuela. Debi un` yilulog hagun hayu mientras madadandan i kampanan eskuela. Lau paire na finapos sa` hana` fan eyag ham manla`la` gi guinahan mame. De hemunos kau balutan hagun choda. Fan hakut sa` un` atrasau!

Huntan Lehislatura

Hu baba i Channel 23 para bai ekuñgog huntan lehislatura. Sige hu akanteha haf` madiskukute pot todu man-finu` E`Eñglis ya ti fafayi-hu finu` Amerikanu. Ai na animu ham yan Magoo `nai sige umensinayau para bai`n komprende i madiskukute na attikulu. Anog na memegaiña ti man-lagse` gi finu` Eñglis hombre kada ratu ma`tut haf` makeke sañgan.

—

Mattu fañata`an `nai todu man-tostus na hagun cha`guan matutuhon man-palapa. Tres dias dispues todu betde i cha`guan gi oriyan guma`. Magahet na dañkulu na difirensia i naturat yan rinegan tautau hanom grifu. Mauleg para i lancheria finatton fañata`an.

—

`An un` katdun niyog i guihan na seguru na ti bollan. Kumu un` diskuida hau pues humuyuñg hagu bumenenuye familiamu.