Chafleg gi tasin ekases

Mampos na chatsaga i appenas moneda gi kahan iya Marianas. I rinikohen aduana mas menos mientras sige ha` hulu` obligasion siha. Estague` ta padedese pa`gu.

Gi mismu tiempu tatnai ta huñgog na guaha planu para uma-aregla i te`ug yan sige ha` mafondu na chinatsaga.

Este na chinatsaga siempre ha sapet i tautau siha gi señgsoñg gi bandan monedan familia. Pot mas ke dies años taya` hatsada mientras i presiun nesessidat siha sige ha` hulu` haf` na pagpag kakaguetes feria.

Manadan pagpag kakaguetes na kontodu i hapechau na cha`ka esta ti espantau. Sumaunau gi feria kulan kombite mientras ta tutufuñg sientimos siha ginen halom pottanmoneda-ta.

Debi u mueba siha i man-ma`gas gi mafotman planun satbasion yan adelantu. Makat i para tafan a`afatane` haye gai che`chu` fumotma mauleg na planu para adelanton linahyan.

Haf` Tinanom-mu?
`Nai un` tanom i simiya, un` chule` aksion; `nai un` tanom aksion un` rikohe bisiu; `nai un` tanom bisiu un` gu`ot sensia; `nai un` tanom sensia un` kusecha i chimu. Ti mapot na kuentas mapula` gi matamtam haf` tinanom-mu.

Estague` `nai humalom obligasion saina gi haf` tinanomña gi hatdin familia. Hagu dumispone it plaset hatdin gi katkuet manera. Poresu na mauleg un` bira hau tatte gi katma na hinassomu para un` li`e` haf` finaposmu. Sumen presisu piot gi krene`ansan man-innosiente na famaguon. Ti mapot. Gaige enteramiente gi dos patman kanaimu.

Guinaiya gi famaguon-ta guaha `nai masge`. Ta letke umonra `nai mauleg bidaña dispues ta onra `nai lumache pot no ta insutta siha. Lache na inapagat. Uttimoña ni para u ekuñgog finu` saina esta ti hana` presisu. Lastima sa` guaha `nai tinetpe ti amtiyon i chetnot `nai tafalalague.

Rikonose tinanom-mu. `An guaha ti man-doku` simiya pues disembra. Cha`mu mamasa` gumuaguat i patgon gi linachiña. Siempre ha komprende haf` finono`mu sa` guiya lokue` malagu na una` mauleg-gue` na patgon gi mañainaña.

Seguruyu` na kumu saina malagu` hau lokue` dumeskansa mauleg. Ayu mina` tanum mauleg na sensia sa` siempre un` kusecha i chimu kontentu.

Tomtum Na Hobensitu
Ha bisitayu` un` tomtum yan menhalom na estudiante. Fuera de kalagtos hu tamtam na taduñg man-hassu. Era interesau kumetuñgu` `nos kuantos asunto-ta siha gi mapos na kuarenta años yan manu na patte `nai kulan sumehayu`. Huñgan, i idat sumede hit mas pinasensia lau guaha un` asuntu `nai man-aka`yu` mahetog.

Pot patgon tanu` dañkulu na diniseha i para bai` gai bos gi kinalamten tano`-ta. Bai` fama i mauleg yan fan apagat gi ti mañgombene siha na pinetsige.

I hinalom kuattru na nasion guine tat ti chumoneg kumefunas modun linala`ta natibu kontodu liñguahe. Tailaye na heñiu i para u safe kulan basula i dignu yan onrun natibu lau hita i man-dueñu yan petmanente na tautau este siha na islas. Estague` un` paladañg gi espirituhu i malañgag tratamienton ga`ga` gi natibu. Na ti man-tautau hit lokue` taimanu ha` siha?

Fuetsau luma`la` i natibu gi halom ñañgon na fina` liheñg pot no umapunu` pot fuminu` Chamorro. Gi todu kinalamten ni unabes na pot adelantun linala` natibu. Taya` respetu gi haf` modun linala` antigu na mañainata. Ti dispensayun este na finatinas kontra tautau-ta. Estague` muna` malala`et paladathu.

Gi halom inkabukau na modun lina`la` umeyag i natibu inadaptan otru kustumbren lina`la` pot proteksioña. Este ha` `nai siña hana` safun maisague`.

Sige mona, hita gumu`ot talen disposision gumobietnan maisa hit. Gi hilu` chatfitme na kabisiyu, sulun halom programan federat siha ni kumatsu i fatsu na disision kabisiyu. Poresu na i kinalamtenta haf` na chalan pagyu `nai ti tuñgu`on manu ha falalague.

Ha faisenyu` kau gai esperansayu` gi hinanau iya Marianas? Hu oppe huñgan pot mampos i sisteman demokrasia ñaba` tumo`a gi ramas troñku. Tinaka` tiempu yan edukau na sudadanu para u ma-esgaihon mona fitme hinanau-ta. Lau dididi` triste ni guaha siha na sinisede gi rimulinon politika guine. Masusesede ya hita ha` ni publiku siña tumulaika. Umadespide ham ya kontentuyu` sa` fahagot na estudiante i malagu` lokue` mañgge` pot tautau-ta yan tano`ta.

Maliñgon Tradision
I usun chenchulu gi makone` atulai, mañahag yan otru siha salungai guihan patte gi kustumbren tanu`. Makatga i chenchulu gi boti para uma`aligau i salungai. `Nai masoda` matampe, marikohe ya machule` halom gi kanton unai.

Mapatten ñaihon gi haye mañaunau yan gaige. Gi señgsoñg, man-mapatte i bisinu siha gi hilu` kustumbreta komunida i ina`ayuda unu kumu i otru. Guaha tetcheña i familia fresku na guihan. Maseha dididi` lau enfin mana` fan manage.

Humalom dispues areglon federat ni pumunu` este na kutturan natibu. Ni unu tumachu para u kontesta man-baban areglu ni direktamiente ha funas hagas kustumbre guine. Tinatiye este ni maprohiben fanihi pot umappenas.

Man-malefa na i natibu gai konsensia ya ti atrebisau gi destrosiun minan tanu` ni hana` sesetbe kumu mantension. Libianu masueta lau ni unu malagu` umatisa direchun natibu.