Tinituhon Edukasion

I edukasion famagjon-ta ha tutuhongue` ginen halom guma` familia. Deste ke man-mafañagu estake listu para u fan eskuela “pre-school” `sino primet gradu, gaige na mafana`gue esta ni liñguahiña yan otru siha man-presisu na krineansa.

`Nai sige mona gi halom konbetsasion familia, mafana`gue kutturan yan tradision natibu. Chetton ennau na leksion deste otdinariu na lina`la` esta guatu gi espirituat tat kumu dottrina. Maseha haye na patgon, ansianu para unna` mauleg-gue`.

Ayu mina` sumen sentidu haf` tinituhoña ginen halom guma`. `An mauleg ya felis, siempre u mauleg ennau na patgon. `An chat-makreansa pues siempre lokue` u anog ennau gi kustumbren i prohimu. Estague` mina` sumen paska i asuntu. Na` guaha pinasensia ya un` esgaihon mona.

Yangin in` hassu un` saina `nai ha hatsa hulu` i neni ni pa`gu ha tutuhon mamokat. Guiya este na pasu i husasangan na ayudu gi gada` na patgon. Pasensiaye!

I modun pinegsai-mu u lachog gi hatdin ha`animu kumu i mas man-gatbu na flores asusena gi linala`mu. Hagu i pipulan diariu. Fanayuyot ya un` manae` pinasensia yan sensian antau na disposision siha.

Dañkulu na obligasion gaige gi apaga` maseha haye na saina. Piot sa` tatnai hulie` leblu matuge` haf` obligasion saina taiguihe leblun kareta.

Hagu `nai gaige todu. Dispues, finu` man-amku` debi un` sahñge para un` tuñgu` haf’ fattamu. Kase guiya ha` este yan responsablidat saina.

Bastara ke guahu mas amku` ti tropan 14 na mañe`lu, tat che`chu` palao`an tihu tuñgu` fuera de mapotget yan man-diskatga. Deste che`chu` kusina, mamagasen magagu, man-inkola yan man-prensa todu hu chage gi hagas bateha yan foggun guafe antes. Ayu mina` finuyu` gi asuntun halom guma` kontodu trahe.

Makat na mattiru i hiniyuñg i Navy guine gi 1961. Megai mañainata manmadispacha ginen che`chu` niha. Ensegidas, todus bimira siha tatte gi gualu yan offisiun tasi. Ayu na tiempu `nai hu dimimoria haf` kustiyasña hayun tañgantañgan. Ayu `nai hulie` difirensia gi hayun tañgantañgan yan gagu gi hilu` foggun.

I suetten mame guihe siha na tiempu i fifitme ha` sensian kabales na komunidan natibu. Tat ti umatrebigue` man-ayuda gi che`chu` linahyan `sino muna` fañage bisinu kinisechan gualu yan tasi. Adumididi` i mattirun tiempu fumunas este na sensian ina`ayuda gi señgsoñg siha. Mauleg ta pañgun tatte este na patte gi tradision man-natibu.

Nae` animu gi obligasion familia. Pasensiaye i patgon sa` guiya lokue` malagu` na u felis mona kareraña. Pipet `an presisu pot para u siña fitme mas gi disposisioña.

`An un` fanague i patgon manayuyot, siempre ha pega papa` gi fondun tasin linala`ña i fitme na añklan espirituat. Estague` na patte gi makreansaña sumede umeyag haf` dinanche yan lache. Kanaha` makat para u abarambau mona gi kareraña.

Gigon ha pega papa` gi halom tasi añkalaña, siempre u fitme lugat botiña gi halom katma yan pagyu. Ti u falagu ennau na boti ya u pinanag kinibrutu ni kurente yan lañgat sa` esta ma-añkla fitme. Hagu mismu ni saina u felis siñientemu `an un` impatta ineyag espirituat gi famaguon-mu.

Mauleg na tiempu `nai man-chiliguagua` ham `an tumalaya antes bihun mame giya Puntan Muchot. Sige in` dalalake ya kada ha tantan i tiau yan maninenng gi hilu` unai, in` rikohe ya in` saguan gi lagua`. Dispues hafana`gue ham mana` gasgasña gi mayilulog halom unai pot para u suha gonafña.

`An mattu gi gima`, kumelaguen ya hana` daña`e galag ma`sun yan manadan doni` sali. De dios ma pairen amotsan taloa`ne. Ni unu kumekuentos pot no u madiñgu man-hala patteña kelaguen. Guaha lokue` ma-aflitun pattun ni dinanche yan finadeni` yan maipen hinegsa`. Diberas, man-homlu` ham guihe na tiempu deste che`chu` gualu` esta i tasi.

* * *

I linala` poble fuetsau nina` eyag hau lumala` gi hilu` animu mañoda` satbasonmu. Deste pinegsai yan tinanom un` usune pot lamasan senan familia. Tai finagtos este na patte gi ha`anen mañaina-ta piot gi 1961 `nai humanau i administrasion i Navy.

Sessu man-afagcha` ham yan otru siha famaguon bisinu gi kareran para i gualu`. Man-gigigu ham ha` ta`lu tatte gi gima` gi minachom atdau. Ai, makat lau tat ti malulog mauleg guihe na tiempu. `An ti unnae` animu, pues todu dia siempre magap hau mamañot mañglo`. De dios!

* * *