Selebrasion Noche Buena

Tradision relihion tanu` i selebrasion Noche Buena gi enteru iya Marianas desde kiñientos (500) años antes. I Españot umetablese este na tradision. Ginen finana`guen dottrina haf` tunas, dinanche yan justisiau para todus tumutuhon mas fitme na areglun komunidat natibu.

I Españot ha tulaika hagas kustumbren tanu` `nai i Manachañg (i mas tagpapa` na rasan Chamorro) ti masede gumai tanu`. Antes de este, debi u fan mamaisen petmisu ginen i tatkilu` na rasan Chamorro (Acha’ot yan Matua) usun tanu`. Hanae` tanu` niha i Manachañg kumu tautau. Adumididi`, sige mas guaha ineyag justisia gi papa` sisteman demokrasia. Bes enkuando, mas antau hinanau natibu.

I tradision relihion tanu` muna` sumen ma`gas i selebrasion Noche Buena yan Pasgua. I areglu ni mafattu gi linahyan sumen bali. Mas mauleg relasion todus gi adelanton komunida.

Gi katkuet manera, sige i preparasion dinaña` familia para i ha`anen Noche Buena. Guaha preparasion mañge` na putahen neñkano` siha. Un` okasion `nai marinueba inafamauleg todus gi hilu` sumen namagof na felisitasion. Matutuhon i amotsan taloane `sino sena dispues de bendision lamasa ni matriatkan familia.

I dinaña familia muna` fifitme pogsi` inagoflie`, respetu yan inaya gi halom mane`lu, enfin i enteru familia. Sumen bonito na kustumbren tanu` ni tumanom fitme na pas yan inaguaiya gi halom todus. Estague` lokue` na tiempu `nai i amku` ha rikonose i mas chatsaga gi halom i tropa pot akonsehu yan konsuelu. Sumen namagof i pasensia yan motmut esperansa na inapagat nana yan tata pot para tanae` animu.

Un` manadan dinaña familian mame mismu `nai sumaunauyu` antes gi gima` biuhu yan biahu. Un` okasion lokue` `nai hu rikonose otru siha mañainahu ni man-senpoble lau motmut bendision ginen korason niha. Estague` na regalu i mas guaguan ke haf` na regalu—bendision mañaina.

Trabiha memetgot ha` i mañgiñge` Niño Jesus gi ha`anen Noche Buena. Sumen dañkulu na bendision para kada familia ni binisita ni Nanabreta. Maseha mamatmos hit triniste yan chinatsaga, gigon mattu gi gima` ha hatsa ensegidas sensiata esperansa yan inañgoghu na un` dia “este lokue` u fa`pus”—pinadesisita siha.

Gi halom fresko na mañglo` minagof, ta hahassu lokue` i man-yinamag lina`la` niha giya Filipinas yan tinayuyot para familiata ni esta man-gaige gi naftan. Sen mas, bien felis na Noche Buena para todus!

Desde minachom atdau, esta si nana hagas ha tutuhon mamatinas sentadan Noche Buena para i tropa `an man-mattu ginen i Misan Gayu. Antes este na tiempu.

Todu klasen putahe ha prepara desde pinada` titiyas mai`es, hinegsa` balensiana, tininun guihan yan katne; katdun manog fresku ni mañañada`; flitadan babue yan guaka; kelaguen manog yan guihan; atulen harina yan atmayas; motsiyas yan inaflitun manog yan guihan.

Lau megai na familia guihe na tiempu man-ginacha` ha`ilas gi hinanau i Navy. In` usune tumotne i guafe ya in` nalagu i kafe ni inna` dinilalag papa` sinetnen sune yan kamute. Dispues sige estoria estake man-maliñgu maigu` mame. I sigiente dia in` prepara para i finatton i Niño.

Dispues de hinanau i Niño `nai in` bisita i mañainan mame yan bisinu siha.

Antes de ha`anen Noche Buena, sige lumiliku` nobenan i Niño gi gima todu i bisinu siha. Kada tres dias mamueba para i otru guma`. Mañaunau lamayot bisinu gi ma-assisten nobena.

Tai malefaghu i paire na fina` sena gi dos guma` ni sessu maplanta hinegsa` balensiana yan inaflitun manog. Hombre, dispues de tres biahe na plantadan sune yan kafe `sino asiga yan doni` sali paire i inaflitun manog potlilu.

Guaha na fina` mames ha` i gai gima` ha pega ala kuenta para i man-nobebena na famaguon. Hombre este estaya tinilaika ta`lu i sabot sunen Honolulu. Kase siña bai` sañgan na dumañkulun sune Honolulu si Iku. Binaya`yu` sune. Esta pa`gu tatnai hu tañga.

***

`An ta hassu tatte i komunidan Chalan Kanoa yan Susupe, man-hihot i tautau ayu mina` taya` minasa` gi inadahen todus. Man-listu i mañaina mañaunau gi areglon famaguon siha. I maestro yan maestro siha mapinitiye i pineblen familia ayu na mañaunau gi satton na edukasion todus guihe na tiempu. Esta este na tiempu, sessu familia man-anae` kinisechan gualu yan pineskan guihan `sino pininu` pinegsai. Buente pot matulaikan i tiempu na mafnas este na kustumbreta.

***

Hu konsidedera kau u parehu mamesña i hanom `an masaguan gi halom gotgureta pat kase maulegña gi halom tetmosu? Cha`mu pineredidika pot hafa gotgureta sa` esta ti mana` sesetbe na tiempu. Maulegña fan aligau tuban mames ya ta lasan ñaihon hit gi bespiran Noche Buena. Felis Noche Buena! Si Iku.