Buruka I Tanu`

Maseha manu na katsada `sino soñgsuñg, lologlug burukan i tanu` deste dibaten casino, botasion gubietnu, lehislatura, konsihiliun munisipalidat yan mayot.

Sumeha-yu pot para bai` ekuñgog haf` sessu i asuntu. Unu ti soplu: pinadese gi halom megai na familia guine. Deste apas kandet, hinemlu`, gaston neñkanu`, gaselina, yan otru siha obligasion familia. Mientras sige kulan pagpag kuetis, i suetdu masimientu gi fache` sisonyan sa` mama` pigu` gi fondu. Taya` hatsada pot dies años na tiempu.

Maseha makat, animu i amiguhu Magoo macho`chu` gi hatdin. Gi lemlem tautau man-uñgag laterian asut mientras sigeyu` mamañot. Guaha `nai ileghu haf` na ti taiguihe modun linala`hu kosake bai` kontentu gi oran deskansaghu.

Lau kada unu mapatte obligasioña. I mas miburukab i offisioghu. Dios mihu guaha `nai sososgunyu` masahalom maseha gofha`an lau inipus katma. Taya` konsuelu fuera ke katen paluman na`abag ni dañkuloña sekosña ke pidasituña.

Fan sehan ñaihon ya in` ekuñgog haf` i asuntu ya ni taimanu na buruka un` fagcha`e eksisiu katma na modun hinassu gi asuntu siha.

Fotte na gaston hinemlu`

I kumahulu` gaston insurance hinemlu` tat ti hana` gagalileg gi halom fache` miserapble na linala`. Mauleg na numeron ritirau lumagnos siha kontodu regulat na empleau ni ti lumañgag i guaguan na kobransa. Megai man-linachai i dididi` gi tetehnan na sueddon niha.

I muna` para mahalan sueddu para health insurance guaha fumagcha`e gotpe `nai debi umana` hanau para hospitat sanhiyuñg. Man-ginacha` induktu mauleg na gaige programan Office of Vocational Rehabilitation ya guiya numa`e ayudu i man-malañgu.

Guaha ha` ti kualifikau ma-ayuda ni Medicaid. Estague` na grupu i na`mase` sa` ginen betsan niha todu gastu yan apas hospitat yan amot. Guaha 52 pot sientu gi todu hutnaleru guine. I hinalom Obamacare dumesplanta ha`anen niha.

Ni si Kilili, lehislatura yan gobietnu no siankassu nu este na mattiru gi publiku. Masaulag ke sera, sera kulan pidassun atgidon ni mapada` ñaihon sa` ti mana` presisu. Lau megai man-sinasapet nu este na gastu pa`gu na tiempu!

Minaipen Tautau

Hu faisen un` biahe i defunta nanahu hafa “misan embidia?” Ha esplika gi ginagau inasi`i gi malabidan un` tautau pot no u hinegse ni minaipen tautau.

Hu dobla fumaisen hafa minaipen tautau? Era parehu yan matdision ginen pumalu ni ta hasñgun tumailayiye. Sige hu hassu haye uttimu huna` bubu. Lamegai! Lau puru estrakadan linahyan, taya` petsonat na dineskontentu.

Bes enkuando, sige lokue` hu pasalista hayeyu` muna` bubu. Lau gi karera mona umeyagyu` man-asi`i pot tinagu` i Saina. `Nai hu chogue bittun inasi`i Saina dispues dumispone ayu siha na tautau. Magahet na sen man-apase i Saina gi haf` na che`chu` tinailaye. Libreyu`!

Fan man-hoñgge na sen man-apase i Nanalibreta gi mahasñgon na sakudidan tinailaye. U fattu tatte giya hagu mas ke doble ya un` hinegse estake empas. Sin ginagau abiu inasi`i siempre un` tinatiye esta i naftan-mu.

Na guaha pinasensia yan motmut na bittun inasi`i gi maseha haye na prohimu! I mañglu` inagofl`e malofan sin ditension; mañglu` matdision sumaga ya man-rikohe estake nahoñg para un` binegbug haligimu.

Si Señor Respondot

Sige ham yan si señor respondot umakasse un` lemlem tautau pot tinanom yan ga`ga` giya Marianas. Era uma`afaisen ham haf` magahet tinanom tanu` guine deste antes.

Hu latigasu ni mañggan Chamorro. Ha atanyu` dispues mamaisen, “Haf` taimanu na un` sasañgan mañggan Chamorro?”

Huna` chadedeg umoppe, “Estabayu` guine kuattro mit años antes gi hinalom primet batku”. Sige dispues chumaleg tuyan. I otru tinanom i niyog. Sige manhassu dispues ha faisenyu` haf` tiniñgo`hu pot finatton primet simiyan pontan.

“Guahu tumagam gi puetton Saipan i lumailai halom na niyog entre ginen iya Filipinas `sino Thailand”. Sige ta`lu chumaleg pot ileghu na guahu tumagam linailai niyog.

Ha faisenyu` dispues haf` tutuhon finu` Chamorro “dambulu”. Ti siña hu danche lau este ilegña:

“Gi finatton un` batku, ma-espipiha un` Chamorro `nai man-masañgane na gaige i prohimu ‘down below’ gi halom sagan katga”. Magahet na hihot “down below yan dambulu”. Estaya.

Ha birague` gi na`an “galagu”. Ha esplika na `nai mattu i batku ginen lagu, estaba ayu na ga`ga` lau taina`an gi finu` Chamorro. Dispues mafana`an “galagu”, ga`ga` ginen lagu.

Dispues umafaisen ham haf` magahet na`an familian mame gi antigu na Chamorro. Ni unu kahulu yan na`an. Uma`atan dispues ya umakonfotma ham na guahu si ‘atiluñg toru” guiya si “babuen buninas”. Hombre, inipus homhum lasashu. Pa`gu i amiguhu sosopbla `anchuda` mantikan tiyaña. Tapbla!

Nuebu: Next Time!

Sige si Magoo chumaleg sa` ha huñgog anunsiun Christmas para i mes Juliu pa`gu na sakan. Era planun para umalagnos i tax return yan 25 pot sientu na apas dibin gobietnu gi man-ritirau yan hutnaleros siha.

Mauleg sa` para umanana`lu illigat na ma-utut pagamientun man-ritirau. Dispues de este u guaguaha` mohon para regulat na pagamientu pat mana`lu hit tatte gi 25 pot sientu menos ta`lu? Pues kasse ti Christmas i mamamaila` soluke Kadu`mas!