Bien saludu para i sindaluta

Gi mapos na semana selebrasion Memorial Day gi enteru iya America. Un’ ma’gas na ha’ane maseñala para todu sindalu ni man-dimalas gi gera deste antes. Estague’ na sudadanu i umatotga suprimu na sakrifisiu pot para una’ fan libre hit diariu.

Man-gai familia, asagua yan famaguon, ni madiñgu pot para u madefende interes tanu’ niha gi katkuet gera. Ni unu sumeha. Konsidera ’an dinanche i prohimu bala ya duru mahag’ga’ sinparat. I mediku yan infetmera todu atte machogue’ para u mana’ la’la’ lau dimalas.

I lagu’ i asaguaña sige milalag sinparat gi entalu’ kulot patte agaga’ na bandera siha ni man-mapega gi otru ata’ut ni parehu man-dimalas. I plaset ’nai man-mahafot ha signififika un’ likidu na hatdin pas ya pisun linibre pot sakrifisiun niha. Si Yuus Maase’!

Gi todu pot todu, kada sindalu unu ha’ gaige gi inagañgña gi halom estrakada, “A`Saina ayuda-yu’”. Ta tayuyute siha yan familian niha sa’ mamirese gineftau bendision ginen i korasonta pot suprimu na sakrifisiu ni machule’ pot para tafan libre.

—

Dibinan man-ritirau

Sige man-adulalag i administrasion, lehislatura yan aktibu na membron progeraman man-ritirau gi oriyan sasyan gi disposision kontribusion membro.

I administrasion ha disidi, sin konsimienton i membro, na para u transfere i los prohimos halom gi sisteman US Social Security. Ha nesessita i salape’ membro pot siakassu man-masede man-mamahan halom gi un’ programa ’nai siña mañaunau siha.

Komprendiyon i intension, lau kau man-mafaisen i membro pot intension para umana’ fañaunau gi USSS? Huñgan, mauleg na intension lau kau i yinauyau pot ti man-malagu’ i membro mañaunau?

I para u fañaunau gi USSS ha sedi i membron man-gai keble para apas i mas man-presisu siha na nesessidat ’an man-ritirau. Yangin ti man-halom pues siha u kinatga futtunan niha gi hafa mana’ sahñge para ’an man-mattu gi idat 65 años.

Pagu yan maulegña siha gi disposision kontribusion niha mismu, pues debi umakonbinse i administrasion yan lehislatura ni intension niha dibuenamente.

Guaha programa gi papa’ USSS ni siña mañaunau i man-aktibu na membro. Estague’ un’ appottunidat ni debi uma-esplika ni USSS. Seguruyu’ na yangin makomprende kabales, siempre faborable na disision u huyuñg ginen aktibu na membro.

Gi pagu, kulan todu atmos banda mamomokat gi hilu’ trosun ais ’nai man-hasulon pot taya’ kabales na infotmasion ginen USSS gi hafa ’nai siña mañaunau i aktibu na membro. Pinasensia yan esplikasion pot este na programa debi u satba maseha hafa na dinida gi membro.

Ti tuñgu’un haf’ mamamaila’

Animu i che’luhu mananom yan mamogsai. Trabiha pa’gu ha tututuhon offisiun tradision. Macho’chu’ gi halom hatdin deste oga’an esta’i minachum atdau. ’An pupueñge hu dañae’ gi man-grasiosu siha na konbetsaion. Dispues de mañgahulu’ yan man-mamatkilu i pinegsai siha gi sagan niha nai hu tulusyu tatte giya hame.

Sumen na’ trañkilu hinassu i silensiu yan gatbu na minachom atdau, i anineñg ramas troñku kontra i diffirientes kulot mapagahes gi sanlagu yan uttimu katen pajaru gi lañget. Mas un’ siente i fina’ lanchu ’nai guaha dispasiu na asu ginen kusinan sanhiyuñg. Esta na’mahalañg ’an ha kone hit tatte gi un’ poblen guma ’nai man-malulog hit sensian hinimidde yan fitme na pisun espirituat ni mañainata.

Matompu’ hinasoghu ’nai sige hu adibina hafa mohon mamamaila’? Todu kinalamten guine entre mamatmos gi taya’ fondu ’sino pagu madeklalara emerensiha. Klaru na taduñg na tasin chinatsaga pumalolopu’ ha’anita. Hokog fondu gi kahan publiku. Gi mismu tiempu mas ti apasiyon i gaston nesessidat setbisiu siha tat kumu hinemlo’. Guaha na asuntu komprendihyon, guaha na’ fatigau, yan kontodu ti satbayon.

Todu pot todu, i siklun lina’la’ parehu na eku deste antes. I pañgpañg napu gi rubentasion u oppan diariu, i atdao u kahulu’ gi sagaña ’an oga’an ya umachum gi pupueñge. I nesessidat i tautau tai finagtus. Gaige gi patman kanaita hafa dinisehata para futturon famaguonta. Gaige gi patman kanaita!

—

Sige kuentos akacha gi entalu man-amigu siha ginen Luta, Tinian yan Saipan. Malabla Luta pot magotde ruplanon dikiki’ gi primet biahe ’nai tumunog. Masaulag Tinian pot todu man-mamatcha maseha para i kemun sanhiyuñg. Era buente pot hinalom Marinu guine gi alacha. Mafa’um Saipan haf’ na kada Bietnes pagamientu man-huyuñg i troñkun atbot siha gi Beach Road? Tabla!

—

Mafaisen si Pedro Malas haf’ ya ti sinede as kayu para u halom gi pettan i lañget. Ilegña, “Nañga ayu na ha’ane ’nai miyon pot miyon na Chinu man-matai. Tohge gi kanton potta ya gigon sumikat si Duñg hagu halom sa’ libre hau”. Nañga Duñg sa’ guaha ha’ kameran mubi (movie) guihe hulu’ lokue’. De dios!