‘Nai Ma-letke i Obligasion

Deste tutuhon programan man-ritirau gi 1980 mana’ ke’yau pot diskuidu sa’ ti maprebeniye fondoña kulan simiya ‘ni siña mana’ fan doku’ yan adelanta para tinituhoña.

Deste ke ma-establese, lamayot patte gi fondun operasioña kinibre ni sentrun gobietnu. Lau gi entre sakan siha, tatnai maprebeniya kabales fondu para u tachu namaisa. Esta 32 años na tiempu deske maletke este na asuntu. Estague pagu na ha gacha’ hit induktu i hagas manunog na problema. Kulan mohon mana’ fan gagana interest lau higante na dibi.

I gobietnu ha didibi pagu i programa poku mas o’menos $300 miyon pesus. I presente na administrasion ti man-apase obligasion kontribusion deste 2006 na sakan. Guaha otru siha gobietnu antes de presente mañaunau maletke apas este na obligasion.

Umafagcha’ este na induktu yan dañkulun maribahan kontribusion tax ginen todus poku mas o’menos $154 miyon. Este na sinisede ginen mahuchum bisnis siha guine. Memegaiña esta ti mana’ siña apas utilidat yan otru siha gastu tat kumu gaselina yan nuebu na subridan sueddo ginen federat.

Hu katkukula na guaha mas ke $3-7 biyon pesus malagnos ginen iya Marianas ‘nai matutuhon i mas man-dañkulu siha na bisnis fumalague i plasan batkon aire. ‘Nai esta makat mamatinas ganansia, matutuhon ma-usa adeñg niha dumiñgu Marianas.

Gi maseha manu na sisteman demokrasia, debi i komunidan bisnis yan gobietnu de u hihot gi maplanehan todu kinalamten. Ha sede este katsu para manu na banda kulan lotgun. Lau taigue este guine gi tano’ta. Kada unu kunsukuat kinalamteña.

Tai planu i gobietnu ya ha sotta i otru banda gi kaprichoña. Este na diskuidu mas muna’ chatsaga kinalamten ekonomian iya Marianas sa’ mas menos rinikohen kontribusion tax ginen i bisnis siha guine.

Hokog salape’ i Fondu, brok (broke) i gobietnu ya mas inatisa probleman i Fondu. Una ha’ satbasioña este: U ma-otdin ni kotten federat i gobietnu ya u tutuhon man-apase de hemunos kau kuantu gi empleauña debi una’ fan para pot para u fatinas haf’ ma-obligague’ ni kotten federat.

Dalai ya deste tiempu malie’ na siempre u basnag i programa ya mafatkeluye sin una’ kalamten kalañgkeña para u ina kritikatmiente haf’ siña machogue? Kulan este i estorian un’ chaka yan paluma gi empi’ chandia gi taduñg na tasi. Mafondu sa’ sige ha’ i chaka chumochu estake ha dulog i fondu. Gumupu si paluma, matmus i cha’ka.

Todu klasen batida guaha pagu taimanu ‘nai para umareskata i programan man-ritirau. Hafa na kontodu hita ni ti mañasaunau gi disision administrasion yan lehislatura (pot 32 años na diskuidu) para ta espihaye satbasion i tailaye yan dañosu na disision niha? Na ti ta elihe siha para u chogue chechu’ linahyan?

***

Para todu probleman iya Marianas ni finañagun diskuidon offisiat publiku, manma-elihe yan apuntau, kase mas trañkiluña lina’la’ lancheru ke hafa na offisiu. Muna’ fitme na pisu ‘nai tumotohge sa’ ha u’usa i tanu’ ‘nai ha prebeniniye mantension familiaña entre hatdin yan pinegsai. Repara sa’ ginen i tanu’ ‘nai lumalala’, prefektu tradision natibu.

Guaha planuña deste muna’ doku’ pipitas, abonu, lugat golai, choda, gulusina yan tinanom papa’ odda’ tat kumu sune, kamute, dagu yan nika kontodu pinegsai. Deste ke manana si Yuus ha tutuhon kalamten estake kulan esta maipe i semnag. ‘Nai mapau ñaihon, ha birague’ tatte para una’ fonhayan checho’ña. Dispues hana’ fañochu i pinegsai siha antes de u tulusgue’ guatu gi lanchu.

Yangin pinegsai, ha asegura na fitme kelat guaka yan babue, kasiyas manog yan ñgañga’ ‘sino paluman mansu. Gi todu preparasion gi este na patte yan i hatdin todu ha asegura na kabales ha kubre i debi u fan machogue. Gi uttimon ha’ane ha repasa hafa siha linie’ña ni debi u fan malimienda gi sigiente dia. Ha embrarasa mapegan abonu, maregan hanom, ‘sino amot yangin guaha ga’ga’ gai chetnot.

Mina’ hu sen fama lancheru ‘sino peskadot sa’ na tautague ti man-mefnu’ ya memegaiña besis ‘nai grasiosu ke un’ nina’ bubu. Fotmat gi todu ha petsige ya brabu kalamten gi para una’ felis todu tinanomña ‘sino pinegsaiña. Sumen na humidde ‘an humamyu kumonbetsasion. Lamegai na leksion siña un’ eyag ginen siha.

Seguruyu’ na i hinalom primet agua de Abrit na sakan, man-senmagof sa’ inichane dididi’ i nuebu na plinantan tinanom. Dispues lokue’ de tiempun maipe, dañkulu na fina’ fresko i finaton primet agua gi fina’ lancheria siha. Estqague’ na tautague komomprende kutturan tanu’ sa’ siha umu’usa i tanu man-mananom. Fangualu’an i tradision Chamorro deste tiempon antigu.

Gi halom prefektu lancheru, ti u lache matuñgu ma-eskomen mai’es para titiyas ‘sino hina’men katnet yan guihan gi feggun kusina sanhiyuñg. I kusinan niha ‘nai a’anog hafa magahet sentadan Chamorro deste antes. Kontodu i pau asu ginen i kusina mañge’ pauña piot gi lemlim tautau ‘an maliñgu i atdau gi sanlagu.

Ti chathinassu i lancheru tinahoñg salape’ para u fondun man-ritirau ‘sino appenas sensiyu para i hospitat. Sa hafa mohon? Sa’ diariu machochu’ sinparat para u kusecha lamayot patte gi prebension familiaña ginen masahalomña. Puntu: Ha planeha, diariu ha’aniña deste ke manana si Yuus esta’i minachom atdau gi sanlagu. Motmut antau na planu sin ditension.

***

I O’Perlas Iya Pasifiku tanu’ Chamorro. Hagas lugat man-guelota yan guelata deste antigu na tiempu. Guaha kabales na kuttura yan tradision tanu’. Gai areglu i komunida maseha ti umafagcha’ yan hineñggen Españot, Haliman yan Japones. Taya’ lokue i antigu na Chamorro ‘nai man-estotba sa’ trañkilu modun linala’ guine siha na islas.

Deste aminasun ma’utot usun liñguahe yan otru siha otdin masuñgon pot para umana’ fan la’la’ i manatatte. Estague’ na man-gaige hit guine pagu pot sakrifisiun guelu yan guela. Yangin siña ha mattit siha pot hita ni manatatte, pues seguruyu’ na hita lokue’ siña ta sakrifisia hit pot famaguonta.

Hafa ennau siha na sakrifisiu? Gaige ineppe giya hagu solamismu. Hagu’ solu siña umoppe ennau na kuestion gi hafa finanaguemu gi famaguonmu pot para u fan mauleg na sudadanu yan kilisyanu gi halom komunidan iya Marianas.