Sumen makat na karera

Sessu na tiempu man-fofu hit pot guaguan apas utilidat, hinemlu’, gaselina yan prebension familia. Inatisa este ‘nai ma-utot oran cho’chu’ ‘sino guaha mana fan para ginen i offisiun niha. Komprendiyon i minala’et gi publiku. Mas lokue’ mala’et ‘an talie’ man-brabu na setbiente siha gi Hegsu’ I Deni ma-usune man-losus dispues de amotsan talo’ane.

Hu komprende na ni unu siña tumulaika presiun bariles laña gi metkau elmundu. Lau kau este ha’ uttimoña i asuntu ginen i man-sabiu gi hegsu’? Taya’ magahet otru chachalaña este pot para u ma-alibia i sapet gi publiku?

Ilegña i amiguhu Magoo na buente propiu yangin umekuñgog ham palabras siha ginen i umatrebi siha man-kandidatu na sakan. Ke lau yangin fatsu, magahet na u guaha lamauleg na ineppe ginen siha? Na ti man-yayas esta gi maripiten mismu gueku siha na offresimientu?

Lau yahu este na karera sa’ siempre lamegai gumotde hila’ niha gigun magu’ot i tubu. Oran chaleg ya nihe ta fan hita man-mata’choñg ya ta ekuñgog i man-fatigau siha na kandidatu. Tarehata mañaleg na biahe; pues namafñot sinturon miyu!

—

Ha faisenyu’ un’ hobensitu hafa sustansiaña kutturan man-ñgiñge’ gi tradision natibu. Tatnai magahet ‘nai hu guadog i meritun asuntu fuera ke respetu para i man-amko’ta. Ha sablasusyu: na ti magahet na i respetu mafattu ginen dos chalan gi hechuran fan respeta ya un’ marespeta? Buena! Na ti finañagu este ni Dies Na Tinagu’ Yuus: Onran mañainamu yan muñga machogue’ gi otru haf’ tiyamu na un’ machogue mismu?”

Ha luñu mas i kuestion: Yangin i respetu debi un’ gana yan mirse, haf’ na kulan mohon man-ninae’ i man-amku’ tai achaigua na atoridat? Fotte ‘nai ha estomaguyu’ i prohimu. Lau hu esplika gi taiguine: I sensian respetu guahu lokue’ hu hoñge na debi un’ gana ya un’ mirese. I kutturan man-ñgiñge’ ala kuenta para uma-echa i patgon bendision ya u felis kareraña estake u echu tautau. Estague’ kulan un’ sensian yine’ase’ gi man-amku’ para i famaguon siha.

Ya i kumomite che’chu’ kriminat tat kumu man-estane minot na idat patgon? Hu oppe na haf’ bidaña ayu na amku’ sahñge yan i faktu na amkugue’ ke hagu. Ti destrosiau i relasion miyu yan lokue’, seguruyu’ na guiya mismu i prohimu dañkulu na sinetsut gi kada biahe ‘nai tumekun hau man-ñgiñge’. I mauleg na intensioña un’ nesessita ti hafa makondenaña.

Magahet na gai ginaddon i kuestion siha ni ha dagauyu’ pot man-ñgiñge’. Lau konfotme lokue’ na mauleg na tradision natibu ya debi u mapraktika diariu. Estague’ sumepara patgon yan amku’, un’ pisu ‘nai un’ rikohe mas bendision para fitme na karera.

—

Mampos malahyu i chaguan yan tinanom siha maseha manu guatu. Para hafa hit nu i hinemlu ekonomia sa’ kakantu l para ma-enteru. Un’ adeñg gi hiyoñg ata’ut, i otru gi sanhalom. Gigon lotgun i adeñg sanhiyoñg magpu’ i nobena.

Taya’ remediu pagu fuerake para ta fan ñgaha’ hulu’ gi Saina ya u esgaihon i batkota mona para i halom katma na tasi maseha gi hechuran konsuelu. Todu klasen atte guaha pagu deste propositon para umabenden ñaihon tanu’ publiku yan mapatten ti’au i ganansian MPLT.

Sen umaya i man-mapropopone pagu sa’ puru puntan gui’eñg na atte siha. Ni unu malagu’ matachoñg papa’ yan satton na diniseha plumanuye futuron iya Marianas. Puru pagu kontra bende yan patten ti’au. De dios mihu! Na ti ta apapase este siha para u hasuye hit antau na programan benefisiun mayotmente?

—

Haye’ ha’ un’ soda na empleau gobietnu na tiempu mampos atalag, suspichosu yan espantau. Hu akanteha hafa guaha na taiguihe mañan niha. Ilegña i unu: “Hu espipiha hafa na prinsipiu ha praktitika i gobietnu ‘sino ha dulalag talo’ane-yu’ taimanu ha’ i bidaña gi alacha ni dos sekretarian depattamentu”. Sinañgane ni amiguña, “Muñga nina’ puti estomagumu. Dililiñg un’ mantikan mahoñgañg yan katnen guaka ya un’ tampe sekosña”. Lamegai na empleau pagu’ marikononose haf’ na galun gaige gi mañgas chininan niha.

—

Guaha un’ patte giya Tokyo, era tres pisun achu’ gi papa’ tasi, mapupulan pagu pot mapredikta na gigon man-atotpe siempre u fattu i mas dañkulu na linau yan hinalom tasi. Este i tres pisun achu’ ‘nai ma-u’udai iya Filipinas, Asia yan Pasifiku.

Yangin u atotpe, pues pot miyas na lineka’ paderon para u poduñg esta i fondu. Gigon ha danche i fondu, ha choneg fuestsau napu ni man-loka’. Mas ke 30 pe linaneka’ niha este siha ya u falagu halom gi tanu gi kase 500 miyas gi ora. Kontodu Marianas debi u satton pumulan este na asuntu pot preparasion.

—

Hu e’ega’ un’ pueñge Discovery Channel pot siklun linala’ satmon. Mapulakes, dispues sige papa’ gi tasi, luma’la yan dañkulu. ‘Nai tiempun mañada, sige hulu kontra finalagon sadog estake mattu gi chiña. Gigon mañada’, umatlibes ya matai. Un’ finalagu ha’ este na karera para i satmon. Ti numa’lu tatte gi tasi estake oran mañada’ ta’lu gi otru sakan. Matai!

Mampos fuetsudu munañgu hulu’ kontra i milag sadog ya ti papara estake mattu gi chiña. I chada’ ni ha lagnos ti apmam man-mapulakes dispues duru papa’ para i tasi. Megai kuestion gi hinasoghu haf’ na taiguihe ayu na guihan. Lau naturat na finatinas i Saina ya taya’ ni unu siña tumulaika taimanu ‘nai ha pega i Amku’ i satmon siha. Magahet na namatman i siklun hinanau satmon.

—

Pot Ositan: Malie’ ni polisian i White House un’ tautau ni gumalope i kelat ya duru malagu. Madulalag ya mamantene. Masoda’ na i presidente as Obama. Mañañgon na cha’ña falalagu sa’ fafatta un’ añu ha’ tetehnan tetminoña. A` Saina!

—

Man-repot un’ palao’an na gaige i buttun Jesukristu gi mita’ kandetña. Megai tumesteguye ayu na sinisede. Dispues ma-agañg un’ electrician para u rikonose i mita’. Finaisen ni palao’an hafa mohon kumeke ilegña ayu na sinisede. Ilegña i electrician: “Kase malago’ i Saina na un’ apase dibimu sa’ mampos esta megai ya munana’ setbe hau dibatde elektrisida”. A’ Saina!