Malate’ kontra tomtum

Guaha ‘nai ta huñgog i mañainata man-adiñgan pot malate yan tomtum. Guaha na malate’ naturat, guaha lokue’ malate’ leblu, lau taya’mas paire ke i tomtum.

Megai hu lie’ man-malate’ man-paire edukasion niha.  Todu matuñgu’ i offisiun niha ya ti u lache gi hafa machocho’gue. Yangin kabesanten tropan empleau, pues unu seguru: Tai edukasion ‘sino ineyag taimanu masatba probleman empleau ni guaha diniskontentu giya siha.

Guse’ña ha esphiha taimanu para u manda i sichuasion pot para una’ fan manuñgu todu empleau na i otdeña i dinanche ya debi umatatiye. Lagse’ yan libre guine na patte. Lau i probleman diniskontentu ti ha satba. I empleau ni mañega sensian dignoña mas mala’et sa’ ti masatba ni unabes problemaña. Lastima sa’ magahet na malate’ i ma’gas.

I temtum na ma’gas ensegidas ha agañg i ma’aminasa na empleau ya ha adiñgane. Ha sedi i empleau sumañgan dibuenamente hafa problemaña. Umekuñgog dispues hafa i magasña sentimentoña ya uma’ayuda satbasion. Magof i prohimu sa’ manae’ tatte ni dignoña ya ha tutuhon talu man-ayuda animosu para minauleg todus. Estague’ i temtum na ma’gas.

Hu tuñgu’ na rektuyu’ na magas piot gi depattamentun tanu’. Rason? Taya’ kampu para babarias sa’ debi u ya hululu’ i integridad kada empleau. Dispues ‘an hu choneg i empleau, unu ha’ intensionhu: i para bai’lie’ na ha chogue nina’ sinaña ya ha fanue’yu’ ni mas mauleg na chicho’ña. Hu soyu’ na u fan eskuela ‘an pueñge gi NMC sa’ ti apmam yan pagu siempre i mas tagpapa’ na asuntu i debi empleau u gai galun AA degree. Estague’ preparasion gi ineyag propiu asuntu siha pot para proteksion niha kumu empleau, gaige ‘sino taigueyu’.

Memegaiñ man-mauleg na manfafacho’chu’. Guaha ha’ lokue’ kulan hayun niha machansa che’chu’ babarias ‘nai megaiña pagu sinetsut. Guaha manchatgun lau fotte lokue’ baban higadun niha. I tautau ni ti ha preparague’ siempre gaige gi uttimun i fila. Hagu solamismu siña ennau tumulaika. Yangin ti umeyag hau pagu ginen leksion siha gi kolehu, pues esta giya hagu dispues.

Lau un’ dia ya manae’ hau responsablidat kabesanten un’ grupon empleau, cha’mu malelefa nu i dignon kada unu. Na geftau hau numae’ siha ni onru ya in’fan hamyu man-mamokat mona parehu. Onra kumu tautau sa’ parehu hamyu na dos.

***

Kuttura yan tradision

Sessu mafa’ fagas pachut tanu’ yan kuttura ‘sino tradision. Dinanche i palabra yangin antigu na komunidan natibu ta sasañgan. Mauleg ta aberigua relasion tanu’ yan kuttura.

I tanu’ natibu antes ‘nai ma-establese kutturan gualu’. Ginen i tanu’ i natibu ‘nai ha prebeniniye mantension familia ginen tinanomña yan pinegsaiña siha.

Taya’ antes cho’chu’ ‘nai siña ma-emplea i natibu. Pues fuetsau u gualu’ para u pega sentadan familia gi lamasan chumochu.

I tasi lokue’ sumetbe gi mantension familia. Ayu mina’ i natibu (Chamorro) pumepeska esta kiñientos miyas huyuñg para u kone’ i dañkulu na guihan. Gi todu atmos banda ‘nai ha sosoda’ i natibu prebension familia.

Ginen direktamiente na usun tanu’ gi gualu’ ‘nai mau’udai i kutturan natibu, kontodu i tasi. Faisen maisa hau mismu, kuantu pot sientu gi tautauta man-guagualu’ ‘sino man-pepeska na tiempu? Kau propiu para ta sige ha’ fuma’ sengne i tanu’ yan kuttura? Na ti magahet na maliñgu esta i sustansian kutturan natibu ni ma-establese gi hechuran fangualu’an? Kau propiu na para ta kontinua umusa i lache pot para usun kombiniente i tanu’ yan kuttura?

****

Dispues de humanau i administrasion i Navy guine, megai mana’ fan para gi offisiun niha. Fuetsau, ta bira hit ta’lu tatte gi fangualu’an. I sisienta siha na sakan uttimu ta praktika ta’lu un’ biahe hafa magahet na kuttura yan tradision natibu. Dispues de ennau, maliñgu ta’lu i ta fafama pot impottansian tanu yan i mafnas na fafayen natibu–fangualu’an.

Man-nahalom hit dispues tautau para hutnaleros gualu’. Ya gi uttimu biahe ‘nai hu rikonose, hu soda’ i Chinu, Koreanu yan Tagalu gi fangualu’an siha. Siha pagu prumaktitika i hagas kutturan natibu gi gualu’ mientras ta dedeka’ i computer gi offisina. Dinanche este mohon?

****

Yangin para tafa’ frente i tanu’ kumu satbasion kutturan natibu, fatsu ennau na puntu piot ya ti sumasaunau hau gumualu’. Siña ha’ tafa’ eskusu dinaña’ familia gi hagas lanchu, lau man-guagualu i familia fuerake lugat dinaña para fina’ tininu yan gupot?

Guaha minapotña i para ta tanom maseha sune, mendioka, kamute yan ‘nos kuantos tinanom choda para ta sosoda’ mona? Mapot mamogsai para mantension familia tat kumu manog fresku, babue, ñgañga’ yan chiba?

Muñga chathinassu yangin i ineppemu “huñgan” sa’ bula lokue’ saki na tiempu. Hombre, tanum para metkau, hagu mismu yan otru dueñu. Dispues, ‘an mattu lokue’ mattiempu; sumen na’ disganau ya hu hoñgge sa’ hu chage antes.

Ai ‘nai esta listu i chetdaghu siha para u fan mahoñggu’, pinalopu’ Saipan un’ pagyun choda. Todu man-tinemba. Taya’ sobla fuerake tinanom aguon gi papa’ tanu’ tat kumu kamute, sune, mendioka yan dagu.