Leksion ginen as nana

Kada mattu gi hinasoghu si biahu (nanan tatahu) hu lie’ nina’ siñan un’ poble, humidde yan namase’ na prohima ni hagas numae’ animu gi halom plaset pineble.

‘Nai hu bisita un’ biahe, sige ha fasensine ilun guaka. Ha asne dispues ha kana’ gi alamle gi hilu foggun para u ha’me. Hu faisen kau mamakanu’ ayu na sensin siha. Chumaleg i amku’ ya ilegña para u pika i tetehnan na to’lañg teñgu ya para u kaddu. Hana’ chageyu’ dispues.

Ha birague’ ya sige ha etsis i linasasña choda para tamales yan titiyas. Mientras mamasa pinada’ña, humalom i amku’ na guaha umestototba hinasoghu. Era hu dibibina kau magahet na mamakanu’ sensin ilun guaka yan kau siña mafa’ titiyas i cheda.

Ilegña, “Ihu, gi antigu na Chamorro, ma-apprubecha todu patten ga’ga’ ya mana’ ginachuñge finatinas ginen i gualu siha”. Sige ha lista tat kumu atmayas, atulin harina, atlulin mai’es, tamales choda, sune yan medioka ni makakanu’ yan tininun hina’men sensin ilun guaka, babue ‘sino guihan.

Hu usune un’ biahe huma’me sensin pechu gi sumen dispasiu na guafe. Ha hoñgañgyu’ sa’ mumañaña dispues de hu tunu. “Todu tiempu este katne, dispasiu na guafe ‘nai unna’ lagu pot para u huyuñg sabotña piot gi halom kaddu”. Hu hassu i manñge’ na kaddun to’lañg guaka yan kustiyas yan ñiañggon babue. De dios na pairen sentada.

Sige mona, hu soda’ man-inkokola magagu. Hu ekuñgog hafa i rason na ma-inkokola piot a’paka na magagon familia, kontodu ma-atbidon chinina yan kasunes. Kase i mas yahu na tiempo yan bihahu ayu na patte ‘an uma’adiñgan ‘sino umestotoria pot antes siha na tiempu. Ginen guiya ‘nai hu komprende kuttura yan tradision natibu, kontodu usun liñguahe ni ma-u’usa ni man-amku’.

Ti hu tuñgu haf’ na sessu mattu gi hinasoghu na tiempu. Buente pot estayu’ malalañgu ya megai ‘nai hu diseha tatte i hagas fuetsaghu. Gaige lokue’ buente pinitiña giya hame pot esta mañasaunau ham gi tropan kalun temu yan ti fitme na fangu’ot mame. Esta pagu hu chachage ha’ man-ha’me katne ni ineyaghu ginen i sinantusan na biahu.

* * *

Mañaunau ham yan mañeluhu man-mañetbe kumu tanores gi misan mona pot kuattru años na tiempu. ‘An monhayan ninalagun mame ‘an chatagmag, in’ tilus ham para i gima Yuus gi kase oran ‘las kuattru. In’ tutuhon gi man-apañgon yan man-primun mame siha.

Mayamag yori’, matiteg kasunes yan chinina trahen mame memegaiña besis guihe siha na tiempu. In’ lilie’ man-gachoñg mame yan nuebu na mudan niha piot gi pueñgen Noche Buena yan Añu Nuebu gi oran kumuñion yan ñgiñge’ Niñu. In’ pañot todus i mantaya’ mame sa’ ennau na estau ‘nai mangaige ham. Ya maseha taiguine, manfelis todu hinanau mame.

Lau todus pot todus, ni unu lumie’ hafa gaige gi tatautau mame sa’ tinatampe ni sutanan tanores. Ha tampe ham i Saina gi este siha na tiempu ya ni unu tumuñgu’ kuantu chiña chinatsagan mame. Magahet i Saina na libianu ha tampe yan hana’ fan ma’agim i mas mamoble siha na famaguoña.

* * *

Este siha na klasen finapos fumañagu yan muna’ fitmet i pegsi hinimidde gi maseha haye na kilisyanu. Enfin, un’ fina’pos ‘nai umeyag hau mama’ tautau sa’ ninae’ hau leksion para un’ tuñgu’ ginen manu hau mage. Sinede hau umatan i prohimumu kumu hagu mismu. Ha lulug gi korasonmu sensian yine’ase’ yan mina’ase’ gi peble yan namase’.

Pot essu na makat giya guahu i line’hu guine gi alacha ‘nai ta butleha i otru pot binibu ‘sino ti parehuta lau tautau lokue’. Kau un’ agradese madulalag ginen Guam, Hawaii ‘sino manu na estados pot ti ginen ayu hau orihinat lau un’ disidi kumu petmanente na lugat familiamu?

Sotta ya i lai u dinikta hafa para u fan masusede sa’ guaha areglon federat pot hutnaleros ginen hiyoñg. Famatkilu ya muñga mana’ oppan mala’et siha na palabras piot ya hagas man-mirese hau sitbision muchacha ‘nai sessu lotgun hau gi bandan sueddoña. Na fan ma’agim korason miyu sa’ todu asuntun linahyan gai arelgu.
n n n
Pot Ositan: Dinilalag dos amigu ni galagu gi gima’ bisinu. Fuetsau malagon matai lau matompu’ i dos gi fihon kusina. Estaba gi sanmena prestan taki’. Mamaisen i unu kau enfin prestan taki’ i ma-ñgiñgiñge’. Ineppe na huñgan. Ilegña, “Taña fan pot prueba”. De dios mihu!