Bentan Botu `18

Pa`gu na botasion gobietnu mauleg na salape` para u kilulug guine gi halum botadot. Motibu: para umasusteni i paire na linala` niha.

Ti sumaunau i futtunan i publiku guine na kuentas. I publiku katsun i dañosu na eksisiu ni debi tana` para ginen fuetsan botun mamopble. Ta chule` tatte gobietno-ta!

Siempre u fan liliku` i tropa `nai un` ma-ofresi $150-$300 para un` tatiye haye malagu` niha na kandidatu. Yahu tumuñgu` haye man-apapase kosake baina listu kestathu para i pueñgen Noche Buena. Magahet na tai fuetsa amtau na sineyu` kontra trosu na finiyut pesu.

Guaha listan haye manma-apapase. Siempre un` dia bai lagnus para infotmasion todu. Kulan ha konfitma suspechog-hu haf` na mampus silensiu i tanu`.

Personatmenti, insuttu para guahu para umafahan konsensiag-hu. Magahet na un` lañgag fuma`yu` i fektus? Haf` kinemprende-mu pot dignun tautau?

Guaha lai kontra mamahan botu ni lafotte kastiguña parehu para i mamahan yan mafahan. Hassu mauleg yangin siakassu na guaha umofresi hau salape` pot botumu. Debi un` gu`ot yan susteni dignomu kumu sudadanu.

Gatbon Isa: Hu e`ekuñgug un` bonitun kanta pot “dispues de isa”. Bonitu i pineduñg palabra layeye pot uttimu na karera gi galaide huyuñg gi minachum atdau. Era kantan uttimu despedida.

Ma-deskribe i katma na tasi, kandet pution gi chagu, i hinanau pajaru gi lañget tatte gi lugat niha yan fitme na agu`ut kanai yan man-atuñgu`. Dispues ma`udai hau gi galaide para i uttimu karera esta i minachum atdau. Bonitu na sunidun despedida.

Espiritu: Un` lemlem tautau gi fina` konbetsasion yan famaguon mame mafaisen-yu` pot espiritun man-mofona. Hu establese na siha man-estaba guine antes de “hita ya mangaige gi hechuran espiritu diariu”.

I manadan chat-estoria fuma birak i man-mofo`na lau man-añghet dispues de man-madispone. Mauleg este in` kemprende para ke siña in` esplikaye i famaguon miyu.

Dispues, i tafanana`an mafatoigue kulan este ti mahasñgun pot nesessidat orasion—tinayuyot. Tekun un` ratu ya un` tayuyute. Abundansia induthensia (bendision) para hagu gi kareramu. Cha`mu sesedi na u birague` para un` finana`gue respetu. Huli`e este masusedi ya huñgan na`mañau.

Man-mafattu gi hechuran guinefi-ta `sino kulan ti mahasñgun` `nai durante ha`anita mattu gi hinasso-ta. Ti maput madispacha—tekun ya un` tayuyute.

Guaha lugat siha ni trabiha ti mana` kilisyayanu. Un` siente ha` na ti akseptau hau na bisita ya debi un` fangagau dispensu antes de un` hatme lugat. Kau para un` peskan ayuyu pat binadu. Fangagau dispensu ya un` ma-ayuda `an haf` chinatsaga-mu gi taduñg na halum tanu`.

Un` guma` guine klaru na ti akseptau-yu` na bisita maseha ñgai`an. `An aksidente mattuyu` hugagau dispensu. Hinalululayu` dumiñgu i lugat gi primet appottunidat. Hu siente na esta pa`gu mangaige i orihinat na man-dueñun i tanu`.

Dispues, ni achog mismu lugat-ta i finattun bisitan espiritu (kau mañaina `sino hayegue`) masusesedi. Sin ditension hugagau dispensu yan huna` tinatiye ni tinayuyot-hu. Felis dispues deskansog-hu `an pueñge. Kulan siha dispues guatdian i lugat familia.

Hipokritu: I man-mananaitai epistula gi Guma` Yuus siña in` ayeg kau casino pat che`chu` i Saina? Man-malefa hamyu estorian i Santa Biblia `nai i Saina ha dulalag i mantailaye na tautau siha ginen gima` tataña? In` sapot-ta casino dispues manfotmat hamyu tinaitai ebañgheliu `an Dameñgo? Haf` na insuttu este kontra i man-mañgomprende na mañgilisyanu?

Parehu: Tantu de mama`yu` professot karisu kontra ayudun federat para i man-namase`, hana`e-yu` un` patgon hagahu ice cream un` talo`ane. `Nai hututuhun kumanu` ilegña i hagahu, “Grandpa, ginen inyun` mame food stamps coupon este na ice cream”.

Ai, dehemunus de food stamps coupon hu fuegu. Acha-mañge` yan ice cream ni mafahan ni prefektu pesu! Ai na grasia ham guihe na konbetsasion. Hombre man-hoñgeyu` gi nina` siñan tautau-ta na siempre u prebeniyen maisague`. Kase dinanche finu` man-amku` na guaha `nai maulegña mamatkilu!

Lau metgut lokue` sensian kilisyanu giya guahu mina` `nai mattu gi nesessidat man-chatsaga na tautau-ta mauleg u fan mana`e ni ginagagau na ayudu. Taya` kampu sino tiempu para tafan a`setmune filosofian karisu!

Respetu: I hinanau unu yan todu mau`udai gi hilu bittun respetu. Ti maput na kuentas. I mayamag basu ti famaulikun kontodu i ka`ka`. Un` adahe pot no u poduñg ya umadesgrana `sino mayamag. Estague` inadahen respetu. Sentidu!

Yangin un` hasñgune i otru ti kilisyanu na disposision siempre ha adahegue` gi otru birada. Mafañagu minasa` gi entalu` miyu. Makat un` gana tatte korasoña muchumas, respetuña.

Huli`e metgut na sensian respetu gi as nanahu. Bastara ke sumen popble yan dibota ha suñgun todu i mattu giya guiya. Tatnai fatta hafaisen i Saina minesñgun, hinimiddi yan pinasensia para bendision famaguoña. Magahet ha lulog ham respetu estake in` diñgu i pettan sanmena.