Priniponen mabenden tanu’ publiku

Un’ propositu ginen i gobietno para u ma-amenda i Attikulu Onse (Article 11) gi konstitusion ‘nai para umasede mabenden tanu’ publiku guatu gi hotels yan golf resorts siha guine.

Ilelegña i gobietno na dañkulu na salape para u rikohe iya Marianas yangin masede este na ginagauña. Mampos megai dibiña i gobietnamenton iya Marianas: $300 miyon para i programan man-ritirau, $25 miyon na dibi gi mapos na sakan lamayot patte para i medical referral yan tinetpe poduñg kontribusion tax ‘nai gi mismu tiempu sige ha’ hulu’ i obligasioña.

I dichu asuntu gi este na prinipone: Kau enfin guiya este satbasion petmanente gi sumen chafleg na ekonomian iya Marianas para i man-mamamaila’ siha na tiempu? Kulan i ma-offrerese katsun temporariu pot para u satbague’ i gobietno ginen kantidan dibiña pagu. Haf’ ya ta padese mismu problema gi halom 10 esta 20 años na tiempu? Kau u guaguaha’ mas tanu’ publiku para umabende talu pot diskuidon manehante?

Gi mismu tiempu, estague’ na tropa i sumupopotta i Attikulu Dose ni umamot i mangai tanu’ praibet patte gi solu direchon niha dumispone propiadat niha.

I asuntu siempre umapresenta gi hechuran inekuñgog publiku deste Luta, Tinian yan Saipan. Mauleg ta huñgog hafa sentimientun linahyan pot este prinipone.

‘Nai chafleg kontodu hospitat

Mampos chafleg, tai fondu i kahan iya Marianas na kontodu hospitatta sumen malañgu gi bandan pottanmoneda. Taya fondu para uson setbision hinemlu’ gi man-malañgu siha.

Lau hagas mananae’ salape kase $27 miyon pesos gi sakan. Mapuge i nuebu na manehante $5 miyon pesos ya masotta para u ensinahyau puede ti matmos.

Hasupag na disision ginen i gobietno lau ti tinilaika asienton obligasioña umasegura na guaha alibiu para i solu na hospitat publiku guine.

I diskuidu ‘nai ma-abiba mage didog na tiempon ha’ilas mediu probleman man-ma’gasta sa’ todu lumie’ na kimasosson i atuf gima’ iya Marianas lau tinane’ man-politikan na’tatah kulan famaguon elementariu gi plasen eskuela.

Didog mampos i taya’ salape gi kahan iya Marianas na kanaha’ seguru na magpu’ i programman man-ritirau gi halom dos años na tiempu. Lau madidibi i programa kase $300 miyon pesus pot hagas maletke obligasion niha i hagas yan presente na administrasion.

Rason na ileleghu na ha fatoigue hit esta i tiempun ha’ilas sa’ teug’ mampos i taya’ salape’ para un’ manadan obligasion. I sigiente na attikulu i para u fan ma-utot oran empleau gobietnu papa’ esta i 56 oras gi kada dies dias.

Menos mas i pottanmonedan (family wallet or purse) familia mientras sige hulu’ i apas kandet, presiun nesessidat, yan otru siha obligasion. Megai lokue’ u fan ma-amot ni primet guma’ familia. Todu pot todu mas maribaha fuetsan fondun familia ginen hagas ha gagana na pagamientu.

Mampos lokue’ malahyu i  bandan bisnis. Megai humuchum pettan niha. Man-madispacha empleau ginen che’chu’ niha dispues man-pinalo’pu’ ni taya salape’ para nesessidat familia. Yangin u guaha rinibahan empleau gobietnu, amanu mohon ‘nai para u fan macho’chu’?

I mañan lamañana un’ fatsu na kustumbre ni sumasa’pet hit pagu. Ni unu malagu’ umatrebigue’ mumasahalom pot no u inestotba tisun chininaña ‘sino u doblau kotbataña. Pagu, kontodu kotbatan ñeti ta godde gi agaga’ta para ta fan e’gadu’ gi tadoñg na halom tanu’.

Mampos makat i ta pokakate pagu sa’ todu atmos banda kantit ya katkuet guinaifen mañglu siempre un’ chineneg guatu gi otru banda, ti un’ safu. Hoñgeyu’ na esta mananayuyot-yu’ na lache mohon este na tinige’hu sa bula para u fan mamadese.

***

Piniloghu na i hinanau i Naval Administration guine gi 1961 i mas baba na tiempu gi lina’la’ tautau-ta. Lau inipos te’ug’ i chinatsagan pagu na tiempu. Ni cho’chu’ taya’, kada tumalag hilu’ hau gumupu para i mapagahes i apas kandet. Gigon chumalamlam hau, kahulu i presiun gaselina yan neñkanu’. Gigon un’ lagnos pottanmonedamu, ma-utot oramu ni kumanu’ hagas pagamientomu. A` Saina!

***

Mañake un’ sutteritu un’ latan ham gi Payless. Ha na’na’ gi gua’ot hagas kombentun pale ya humalom kumonfisat. Dispues de ha sañgan todus, ninae’ as pale un’ anaku’ na pinitensia. Hum manau si pale’ ya ha pega halom gi kusinan niha i ham. Ha birague’ i mañake ha espipiha i latan ham lau taigue.


Mattu gi otru semana ya ha konfisat ñaihon putg un’ sumen bonita na palao’an ni ha soda’ gi kanton tasi. Finaisen as pale haye na’aña yan manu ‘nai sumasaga. Ilegña i prohimu, “Hmmm! Nañga pale, un’ hassu i ham?” Magpu’ i nobena!