Felis noche buena!

Gi mamamaila’ na Dameñgo i selebrasion Noche Buena, kompliaños i Niño Jesus ni numae’ hit taihinekog na esperansa, konfiansa, inañgoghu yan sumen ma’ug na bendision. Tafan adiseha dinuebu gi hilu sumen namagof na felisitasion ginen i korasonta.

Un’ ha’ane ni maseñala, deste antigu na tiempu, para tana’ oppan i mauleg na sensian kilisyanu yan inafamauleg espesiatmente gi halom familiata mismu.

Mafañagu i lahen Yuus gi un’ poblen liyañg ga’ga’. Pot esso na todu i tiempu hana’ o’oppan i para ta trata i mamoble yan man-namase’ parehu yan hita mismu. Ekuñgog este na finaisenña para maug’ na bendision gi famaguon miyu. Fanague linala’ espirituat pot para u fan siña umañkla sasyan niha gi katkuet chubaskon lina’la’.

Tafan man-nae’ mit grasias pot todu i bendisionta siha. Ta tayuyute lokue’ ayu i esta mangaige gi naftan yan ayu siakassu man-matai gi nuebu na sakan.

Sumen namagof na ha’ane piot guine siha nas islas ‘nai i familia man-arikonose ya man-adiseha dinuebu gi hilu’ satton na dinaña. Maseha guaha dididi’ chinatsagamu, namagof hau nu todus i bendisionmu na sakan. Fan gagau lokue motmut bendision para i otru sakan. Felis Noche Buena para todus!

***

Estague’ na haane lokue’ ‘nai mafattu mahalañgta ni man-mofo’na yan ayu lokue’ i man-gaige gi chagu’. Ta diseseha felis na ha’anen gupot para siha yan familian niha. Tafan adiseha di nuebu para i 2012 na sakan ya puede u soda’ hit mas yanu ke mampos barañka na finaposta pagu na sakan. Esperansa i fitme na pogse’ natibu. Na fitme mas ya in’ geden te’chuñg ennau na pogse’ para i sakan 2012!

***

Hu hahassu lokue’ un’ echu Noche Buena ‘nai hu bisita si biahu. Estaba i amku’ man-aflilitu guihan gi feggun antes. Man-ñgiñge’yu’ dispues ha plantayu’ senahu. Ha faisenyu’ nu i mañeluhu dispues sige ha ulus iluhu. Era, sumugu’yu’ un’ ratu gi karerahu para i Misan Gayu.

Hulie’ gi un’ bandan mataña na tutuhu lago’ña. Hu pañot ales sa’ hu komprende signifkasion ayu na misin lagu’. Ha echa-yu’ bendision dispues ‘nai humanau-yu’ para i gima’ Yuus. Ti hanae’yu’ regalu sa’ sumen poble si biahu. Lau katgaduyu’ sumen guaguan na balutan bendision ginen un’ sinantusan na amku’. Tat mas ke bendision ginen sainata.

***

Gi otru eskalera, in’ hassu manma-estoriaye hit pot si Santa Claus ni mafattu yan manadan regalu gi echu pueñgen Noche Buena? Ai na manñge estoria pot si Santa Clau ni muna’ fan guifeyu’ kumu eskuelante antes pot regalu siha.

Lau ni unabes ‘nai mattu si Santa Claus. Esta hu suspecha kau pot taya’ chimineha gi gima’ mame na ha letket sumugu kada sakan. Kase ‘nai estayu’ echu tautau ‘nai hu komprende na estorian famaguon si San Nicolas para umana’ gatbu mas i haanen gupot siha.

***

Dispues guaha muna’ lagse’ mas i estorian Santa Claus na pot taya’ ais (snow) guine, ayu mina siempre u halom gi Puetton Tanapag ya umau’udai gi un’ dañkulun galaide. Kada malofanyu’ hu ñgelu’ kau gaige galaide’ña. Puru batkon yan boten katga yan para Mañagaha mangaige gi oriya. Ai hoñggiyon na estoria.

***

Ilegña lokue’ i amku na si Santa Claus ayu hananae’ regalo i man-mauleg na famaguon. Siempre ‘an man-maigu’ hau u fattu antes de ‘las dose ya u pega i paketi siha gi papa’ troñkun Christmas. Dispues hu sosogne i taya’ troñkun Christmas gi salan mame na ti mattu si Santa Claus. De dios mihu. Hu dagau tuayahu!

***

Lau i mas tai achaigua yan mañge’ na regalu i nina’en i Saina ni un’ faisen gi namase’ na tinayuyotmu. Nina’ fatuye hau sa’ satton hau nu guiya. Ti diniñgu hau sa’ u faisen para in’ hamyu gi kareramu mona. Un’ onrague’ kumu Yuosmu ya unnae’gue’ fehman agradesimientu sa’ ha mattitgue’ pot hagu yan i mañgilisyanu siha gi enteru i tanu’.

Esta misen lagomu ‘nai un’ konsidera todus i pasuña piot si nanaña as Santa Maria ni sumuñgun todu mattiru yan mattrata kontra i lahiña lau tai nina’ siña gi halom man-enemigu. Pot sinsiyu hineñgemu mina hinassu hau satton na regalu piot gi oran didog na nesessidatmu. Fan nae’ mit grasias. Felis Noche Buena!

***

Bumakasiosion dos umasagua giya Roma ‘nai matai i lahe. Masañge i asagua na siña mahafot asaguaña guihe ‘sino u kone’ tatte. Tres dias dispues mafaisen hafa disisioña. Ilegña i prohima na malagu’gue’ na u mahafot asaguaña giya Roma. Lau ha huñgog pot un’ tautau ni matai ya luma’la’ tatte gi mina tres dias. Ha disidi para ukone’ tatte asaguaña pot no la’la tatte ya u sinapet talu. Ai de dios!