‘Nai dumimu si Mariana

Apmam tiempu man-ensinahyau hit pot pesu. Ansiosu na pinetsige piot ‘nai esta ta embrasa ekonomian salape. Ta tulaika hagas hayuta—gualu yan peska—sa’ man-ma-emplea hit gi Navy yan dispues TT.

Ta atotga kinalamten dinaña Guam gi sisienta siha na sakan ‘nos pot parehu na rasan tautau, lau pot un’ pesu gi ora i sueddu guihe. Guine, $.16 sientimos sueddota gi ora. Ta apprueba lau maluñu’ nu i mañeluta giya Guam.

Gi duranten negosiu gi 1972, hu mente ma-inklusun este na attikulu—proteksion direchota gi todu minan halom tasi. Ti man-malago’ pot no u diniteni ma-apprueban kontratata yan America. Hu choneg este na asuntu sa’ sumasaunau depositun laña deste enteru strechun Marianas papa’ esta iya Yap yan Palau. Nahuñg na fiñkas para u kubre Marianas gi todu nesessidatña. Lau a’gañg mampos i losus taloane!

Dispues, man-lotgun hit gi siete años na garentia gi mafondun fasilidat siha. Umafagcha’ yan hinalom kantidan salape ginen Japon. Duru hit man-gupot diariu ya ni unu lumie’ ‘nai ha tutuhon kimason i atuf gima’ta. De dios na diskuidu! Magahet, haye u fan hahassu kimason piot ‘nai duru esta i iñgag lateria.

Na’ pinite sa’ sessu ta sede para ta fan magraderu katnada gi haguet ni tinatitiye mas dañosu na konsekuensia pot che’chu’ hasupag. Estau-ta pagu, hita mismu sumufan ya dudayu’ kau enfin estague’ guinifin miyu para futturon famaguonta. Despide i sulu’ pesu ya ta bira hit tatte gi fitme na tradision tanu’. Siña ha’ ti lamlam karetamu lau sufficiente mantension para familiamu.

—

Tinanom gi hatdin

Gi fina’ lehñgun, estaba inasahan chodan Taiwan. Gaige lokue’ man-lasneg siha na papayan Hawaii gi oriya yan gadu’ gi halom tañgantañgan. Gi kanton tañke, esta man-to’a i lemon kanu’un (guiya este na lemon i sessu man-lache hit ya ta fanana’an lemon riat).

Esta lokue’ i tinanom amiguhu sunen agaga’ listu para i metkau. Mañule’yu’ ‘nos kuantos hagon sunen agaga’ para golai faka’. I ya guahan mohon fresku na mai’es. Paire para ilotis ‘sino atmayas. Lau ti pagu na biahen tinanomña. Suetteyu’ kinisechan gualu’ siha.

Gi otru lanchun amiguhu, suetteyu’ guihan ni ma-tala’ gi hilu foggun. Kontodu hina’men katnen babue yan mantika na katnen guaka. Diberas, esta papagpag sekoshu kulan babuen Buninas dispues de hu tunu.

—

Gi mapos na semana, man-estaba kase trenta na tautau gi offisinan CUC para u fan mamaisen ‘nos kuantos dias talu antes de u fan man-apase. Era, mananañgga finatton pagamientu dispues ‘nai para u ma-apase kabales kuenrtan niha.

Hana’ ma-ase’-yu’ finaisen niniha, lau kontodu i empleau CUC na’mase’ sa’ ha komprende hafa finaisen i los prohimos. Ti siña ha sede unu ya u berague kontra i pumalu. Yangin ha sede unu, pues todus lokue u fan libre. Esta chathinagoñg i empleau ni inigoñg tauau lau ni unu ha sede soluke’ ma-apase mediu dibi esta’i Bietnes.

Hu sen agradese i antau na mañan ayu na empleau i sumuñgun umekuñgog iniguñg tautau lau guaha ha’ lokue areglu ni ti siña ti u tatiye.

—

Gi kada finagpu’ ora santa ‘an pueñgen Dameñgo, sessu hu soda’ un’ biha mamaisa, sige manayuyot dispues de manhanau i linahyan. Hu sosoda’ ‘an hu huhuchum i gima’ Yuus. Hu faisen dispues hafa na mafatton atrasau.

Ilegña, “Laihu, pot este ha trahihu ni todu aplacha’ yan mancha ya mamahlauyu’ malie’ taiguine. Lau ti bai’ seha bumisita i Saina maseha taiguine pinebleghu yan arastrau-hu”. Hana’ sen humidde korasonhu sa’ ha suñgun i taya’ña para u fan bisita. Leksion ayu para guahu gi krineansan i Saina pot mañan hinimidde.