Previous Story
Primet Agua De Abrit
|
Posted on Mar 25 2009
Duranten tiempon somnag, i lancheru siha matutuhon madismonta yan aladu gualo niha. Preparasion este para finatton tiempon uchan. Kontodo simiya siha sige man -matanum gi halom fina sahguan para u matransplanta gi propio tiempo.
Pago gi tutuhon Abgrit na mes `nai poduñg i mafananaan ni mañainata Primet Agua de Abrit (beginning of Spring). Man-matanume i fangualuan siha deste golai, gulusina yan aguon haya.
Makat na offisiu para lancheru lao tradision natibu deste antigu na mañainata kiñientos años antes. Ginen i tano yan tase `nai ta prebeniniye mantension familia. Famaguon lalahe siha man-maluluk `sino kreansa gi todo offisiun tradision tano`.
Megai gi man-acha`amkohu man-malofan guine na chalan. Ayo mina ti estrañgheru offisiun gualo yan tase esta pago na tiempo. Guaha ha umusune mas hafa finanaguen guelu yan guela. Esta pago man-guagualu para metkao yan mantension familia.
Taya sinetsothu nu i mafanagueghu chechu gualo yan tase. Esta pago, maseha dididi esta ñaba` i temu, sisiña ha` hu suhon fusiños, uson kama, kuha yan machete. Banidosuyu` ni tradision tanota sa` todo i tiempo guaha para mantension familia.
Hasso pot un`ratu `an ta kadu dos poya gi lanchu. Man-daña hit komo familia manmamatinas mientras sige ta sañgan grasiata siha. Mas fitme i pegse` ni muna fan dadaña hit komo taotao tano.
I relasionta tai tinituhon sino finagpu. Namagof i dinaña familia maseha ñgaian. Mauleg ta kreansa famaguonta gi dinaña nu este na tradision maseha pot para ta fanue` siha sensian himidde yan fitme na sensian moralidat. Estague dos attikulo `nai siña ta ayuda famaguonta manpatte gi chechu disiente na chechu komunidat. Bien felis i primet Agua de Abrit.
Si Yuus Maase.
[B]John S. DelRosario Jr.[/B] [I]As Gonno, Saipan[/I]
