Asun Hinimidde

Bes inkuando sumuguyu` man-bisita gi tiahu gi fina` lanchu. Dispues sige hu dibina haf` na mampos-yu` satton nu ayu na lugat. Era i asun kusinaña gi fina` lanchu kumombibida-yu` tatte. I asu muna` ma`a`aggem sentimentog-hu katkuet finatog-hu.

Sumen mauleg na amko` fuminu` Chamorro ya todu inapagatña tomtom yan motmut pinasensia. Ginen dopbladan fino`ña siha `nai ume`eyag-yu` mas to`a na finu` Chamorro.

Deste usun kanastran mama` yan kombetsasion bisita guaha tinateña. Dispues de ha afgue-gue` i bisita nina` batbaru sumañgan haf` sessu finatoña. Matutuhon i fotmat na kombetsasion.

Satton na biha gi gima` Yuus yan che`chu` linahyan tat kumu lisayon matai pat nobenan patron i señgsoñg yan familia. Hu atrebi fumaisen haf` sustansian relihioña.

“Estague` ihu `nai gaige añklan linala`ta. Sin este siempre u lailai botimu esta hiyoñg rubentasion `nai un` mapua yan dimalas”. Gai sustansia yan tadoñg este na fino`ña.

Para i atbansau na idatña (86) trabiha kabales manhassu yan makalamya. Hu faisen haf` na brabugue`. Ilegña, “Todu para un` chogue kahulu` ya hagu un` petsige. Cha`mu fan añgoñgog-hu”. Diariu chumochu regulatmiente. Hana` fañochu i pinegsai siha ya manrega gi halom hatdin.

Kontentu i amko` ya sentai molestia pot television pat ipad, telefon `sino haf`gue` na trastes modetnu na kombiñiente. Guiya fumagagase magaguña, ta hala` yan inkola dispues `nai ha prensa. Mamomo`lu dididi kinisechan hatdin para ayu na patgoña i mas chatsaga ni sessu binisita. Magahet, satton yan mauleg na sensian saina.

Mattu ham gi kuttura yan tradision. Ilegña na todu ha chogue pot satbasioña deste mananom, mamogsai yan otru siha. “Ti siña hu birayu` tatte sa` tatnai hu diñgu i riku na tinateg-hu”. Estague` i mas sustansiau na fino`ña na esta pa`gu sige ha` di hu dibina. Ha kone`yu` tatte bumisitan ñaihon si Iku para bai`n kombetsasion.

Kasi pot manmahayu ham gi feggun guafe na mafattu-`yu` manbisita gi amko`. Estague` na foggun `nai man-na`lagu ham amotsan oga`an antes de bai`n tilus ham para i gima` Yuus para bai`n fan mañetbe kumu tanores. Mauleg na tiempu `nai in`chegue este antes. Poresu na mafattu-yu` manbisita kulan ume`emahalañg yan marinueban sensian hinimide.

Gi ha`anen gupot siha
Gi katkuet birada, guaha manginacha` triste na biahe. Guaha lokue` manlibre. Este na finapos ni unu soplu. Todu u fan ginacha` pot rason na todu sinisede gai tiempu. Guaha oran chaleg, kati, chomochu, yan otru siha.

Ni unabes `nai hu kuestiona este na sinisede sa` i pañgpañg napun linala` un` klasen sakudida gi maseha manu hit guatu. Poresu na mana`ana`e` hit felisitasion gi ha`anen gupot pot ni unu gumugu`ot ha`aniña. Gaige pa`gu, agupa madispone ni Saina.
• • •
Deste antes dehemunos-yu` regalon Christmas sa` ti in` lañgag kumu famaguon mamopble. Tatnai hu tagam si Santa Claus ginen i mafanana`an “chimney” sa` ni unu guine mapegaye nu este na modun fasilidat. Ti bai` rikonose regalo gi papa` troñkun Christmas sa` ni tronku ham taya`. Nahoñg na regalo ginen un` dikiki` na kahita ni nina`en i Red Cross gi todu estudiante.

Lau gi katkuet finatton este na okasion todu i tiempu gaige gi nanan mame ni umasegura na mañaunau ham manmanagam ni finatton Jesus gi misan gayu yan `nai mattu gi gima`. Maseha haf` pinadesisimu añgoghu na siempre un` mana` libianu gi finatton i Metsia pa`gu na sakan.

“Ti humanau-yu`”
Megai na tautau isla ni mañasaga gi papa` areglon otru nasion tat kumu Hawaii, New Caledonia yan Tahiti sessu maplaiteha chumule` tatte `nai mangai sistema gobietnu antes de finatton Amerikanu yan Franses.

Este na diniseha oppan na tiempu gi tinige` mantitige` siha na tautau isla. Unu mañge` pot kinalamten natibun Hawaii ni dumiseha kumechule` tatte i sisteman antes ni fuetsau madestrosia ni militat yan manrikon industrian asukat.

Ilegña, “Hu guiguife pot antigu na tiempu ya ti siña-yu` hu bira tatte. Mananom-yu`choda yan sune gi tanu`. Ti siña hu bira-yu` tatte sa` tihu diñgu”.

Kase i sustansian fino`ña pot relasion satbasion gi natibu ginen i usun tanu` niha deste antigu na tiempu. I estorian man-antigu na mañaina-ta mismu komomfitma este. Solu i tanu` `nai manla`la` pot mas ke 500 años. Esta pa`gu mangagaige ha` este siha na tanu`. In` kemprende sustansian relasion-ta yan tano`ta? Ti siña ta bira hit tatte sa` ni unabes `nai ta diñgu!

Estague` mina` presisu na maseha hafa guaha gi chagu` na karera-ta mauleg bes enkuando ta rikononose haf` tinatte-ta. I tanu` natibu mina` guaha aidentifikasion Chamorro ahe` ti asunton sudadanu `sino haf`gue`. Gaige nanata gi tanu`.
• • •
Gi kanton tasin iya Laulau, huli`e` man-mamigan na umañg yan ayuyu gi halom tasi. Era halom tasi `nai mapulalakes ña`ot niha dispues `nai manhanau halom gi tanu`. Ti tufuñgon i kantida na pinilakes niha.
• • •
Inadayao sensian niha `nai makonsidedera i kestat betde. `Nai mattu gi asuntun publiku kulan mohon manmamokat halom gi un` kansadu na lugat. Ma-atan dispues ma-abandona i lugat lau man-estaba hit guihe man-e`ensinahyau. Dios ihu!