Apenas appottunidat

Kase siete años malofan mas ke 4,000 na tautau-ta madiñgu Marianas pot apenas (taya`) appottunidat cho`chu` guine. Este na sinisede ha kontinua-gue` esta pa`gu. I ginen Tinian man-hanau hulu` Saipan. Mañeluta ginen Luta man-hanau papa` Guam.

Oppan un` ratu na guaha adelantun ekonomia. Lau megai esta pa`gu man-tai che`chu`. Gi alacha man-huyuñg tautau-ta manman dimanda cho`chu` pot mampos megai Chinu guine ni chumule` appottunidat niha man-ma-emplea.

Kulan inipus diskuidun man-ma`gas guine na patte. I kuestion: Kau i empleau depattamentun gobietnu ni debi u choneg direchun sudadanu man-inige ni tiempu? Haf` taimanu na man-halum un` manadan Chinu `nai megai gi tautau-ta mantai offisiu?

Tinayuyot: Gi inai Puntan Muchot huli`e gi chagu` un` figuran tautau ha fafana` bonitan minachum atdau. Sige halum i pueñge. Sumaga i prohimu estake homhum. Guminen I Tata antes de u hanau.

Hu komprende tinayuyot silensiu `nai mamaisa i tautau. Sahñge na eskalera `nai gaige attensioña. Mas klaru hinassoña sustansian hineñge gi Saina. Umasoda` yan Nanalibreta gi hilu` sinsiyu na konbetsasion.

Este na eskalera libianu un` soda` kau esta un` fondu añklan espirituat pat trabiha lumalailai gi supin tasi. `Nai un` yute, siempre u gaige galaide`mu ni kuantu na napun Agustu u fattu fitme gi sagaña. Estague` sustansian añklan espirituat.

Guaha difirensian tinayuyot otdinariu yan espirituat. I tatatte hagu yan i Saina umadiñgan sinsiyu gi asunto-mu siha. Tat ti basnag gi halum fina` homhum yan makat na asuntu siha. Lau ni unabes `nai ha abandona hit i Sainata. Gagau ayudu para siña un`li`e klaru asuntomu siha gi hilu` esperansa.

Dispues de todu `nai un` bira hau tatte gi regulat na petsona. Mas gai induthensia (minagof) hau guine na eskaleran tinayuyot.

Santa Biblia: Guaha `nai in`taitai i mas mauleg na lepblu mapublika gi enteru i tanu? Kase siñku biahe hu taitai i Santa Biblia kontodu inestudian biblical scholars (commentaries) haf` hinassun niha gi kada patte gi estorian tinagu` yan fina`pus i Sainata.

Kase dos `sino tres biahe mamensiona pot i sinantusan na nanata as Santa Maria. Los dimas, pot tinagu` Yuus Tata yan sakrifisiun Lahiña as Jesukristo. Ni unu yumeñgyuñg si Jesukristo haf` dichu finatoña pot para u komple tinagu` Yuus Tata.

Todu modun estoria yan ihemplo man-mamatuge` kontodu inadisgustu gi entalu` familia. Tat masusesede esta gaige gi biblia. I Santa Biblia ginen siñku na lepblu `nai matuge` gi unu haf` estorian i Sainata. `An mangai tiempu hamyu mauleg in` tutuhun tumaitai pot adelantun linala` espirituat para hagu yan famaguon-mu.

Adios Nan Nena`: Ha diñgu ham i matriakan familia as Nan Nena` Pablo (Igitol) gi mapos na semana. Esta hana` mesgu` lagohu i amku` `nai huhassu tatte i motmut pinasensiaña, hinimiddi, konkariñu, suanu yan ma`ug na akonsehu ginen i korasoña.

Guiya yan tiahu Marikita numa`eyu` esperansa yan manatma na sensia fumana` fitme karera-hu gi halum barañkan katsada.

Todu i tiempu gi finatog-hu siempre ilegña, “Enague` mage si Elias. Nayane lahihu kafe”. Hu fatachuñge yan Tan Pablo mañgombetsasion layeye pot para bai huñgog finu` ansianu na amku`.

Ti apasiyun sensian pinasensia, man-ma`ug siha na akonsehu, yan konkariñu ginen matriakan mame. Si Yuus Maase` Nan Nena`. U fresku kareramu hulu` i lañget i Saina. Bien felis yan adios. I tinayuyot-hu. Si Juñan Denañg.

Nunu: `Nai pumeska-yu` ayuyu un` tiempu, dumeskansan ñaihon-yu` gi papa` un` dañkulun troñku. Hu repara na papa` troñkun “nunu” `nai matachoñg-yu` de hemunos kau fafañague pat gai tautau. Dispues hu kontinua ume-ayuyu.

`Nai mattuyu` tatte gi gima`, hu hassu ayu na troñku pot magahet na figu` ya lamegai na pagyu yumilulog sin felis. Gaige ha` na man-babaila hagoña gi katkuet tiempu. Para i man-fuetsudu siha na mattirun pagyu tatnai nina` echuñg troñkoña.

Dispues ti mi-atburotu na troñku. Gigong ha tulusgue` hulu` sotta sa` siempre u tachu sakan pot sakan, tunas hulu`gi lañget. Haf` na tatnai ta hassu man-mama` simiya pot para ta tanum este na troñku gi kantun tasin san-me`na? Na ti mas figu` este ke troñkun gagu?

•••

Pinegsai: Guaha pinegsai gi hiyuñg guma` kulan tane` mame yan asaguahu. Yan mame mañge` na katdun manog fresku mina` in` usune mamogsai. Tat mas ke este na katdu para alimientu. Esta hu fafahan gi un` cheluhu ni mipinegsai.

Mauleg na offisiu para `an kulan malago` hau katdun poya. Megai pinegsai mame antes gi hagas lanchu pot gai tiempu `an man-achaikag ham yan saki. Cha`mu hinahalañg konsige mamogsai. Siempre i saki manrepara ya ha chugua`gue`.