Previous Story
`Nai sulon i dos higante
|
Posted on May 01 2001
I Asunto: Para mona, mas dispasio kinalamten ekonomian entero el mundo, kontodo iya Marianas.
I Opiñion: Ta fan satton gi inadahen hafa tetehnan guinahata osino megai para u fan mamadese.
Gi ti mapot na manera, ekonomia kumeke ilegña salape` ni kumikilulog gi hilo` kinalamten bisnis yan industria siha guine.
Este na kinalamten mampos dumispasio deste siñko años malofan. Oppan na mas ke 2,000 na bisnis humuchom pettan niha. Humuyoñg, i rinikohen kontribusion tax ginen i komunidat bisnis mampos tumunog.
Ekonomista siha entalo` America yan Japon ilegniniha na siempre u dispasio mas i kinalamten todo nasion gi bandan ekonomia. Yangin masusede este, pues mas chumatsaga kinalamten iya Marianas para la anagho` na tiempo.
Ta diseseha na ti u masusede, lao hita lokue` mismo muna` tailayen maisa hit `nai duro i man-sabio gi hegso` i Deni` manman-apprueba akto siha ni mas lumuño` kinalamten i tetehnan na industria yan bisnis siha guine.
Yangin para ta batbaruye i asunto gi hilo` heñion dañosu na atetu osino maña kontra hafa sosobla guinahata, megai para u fan mamadese na familia piot `nai manmadispacha ginen checho` niha sa` mahuchom i kompania `nai manmachochochu` pago.
Homhum i ta hananague na karera ya mas u guaha didog na chinatsaga `nai guaha mas umatisa teug` na hinesguan `nai i tiempo ginagagao sensian kabayero pot interes yan proteksion publiko hinerat.
Esta klaro talie` na guaha gi me`nata un` tadoñg kantit. Sige hit man-lotgun gi mismo tiempo mientras, gi hilo` inkabukao na plaset sige ta dibina hafa para ta chogue. Sumen presiso na ta esgaihon i manatatte ginen un` piligro na kantit chinatsaga. Pago `nai debi ta bira hit tatte pot para ta fan a`ayuda umaregla haanita antes de u guaha mas didog na pinadese yan chinatsaga pot diskuido.
Maila` ta atetuye hafa mauleg pot interes i manatatte na famaguonta. Pago i tiempo `nai debi u guaha mas satton na inadahe gi hafa tetehnan guinahata. Si Yuus Maase` yan ghilisow!
