Previous Story
Bien felis i planon NMC
|
Posted on Mar 06 2001
I Asunto: I NMC kabesanten programan mahayon (training) kualidat na hutnaleros gi halom natibo.
I Opiñion: Primera besis este na kinimite gi kinalamten mahayon natibo gi katkuet bokasion.
Gi tinilaikan deste gobietnon Trust Territory gi 1977, ta adopta un` sisteman lai pot hutnaleros, un` sistema `nai mas attension pot empleao ginen hiyoñg ke mahayon natibo.
Gi karera mona, guaha siha chochu` ta polu komo para taotao hiyoñg. Este na atetu mafañago sa` bula chochu` gi uttimon sitienta (70s) yan ochenta (80s) siha na sakan.
Esta pago ennao na lai tana` sesetbe. Deste ayo na tiempo (20 años malofan) taya` `nai talie` guaha sustansiao na tinilaika pot para ta prebeniye antao na programa pot para ta adelanta i taotaota gi katkuet chochu`. Estegue` pago na ta fafana` un` asunto `nai ta soda` na megai gi taotaota munesessita na u fan mahayo osino mafana`gue (training) pot para u prepara siha gi checho` `nai mangai interes.
Guine gi mapos na semana, humalom i Kolehon Sankatan na Marianas (NMC) pot para u kabesaye un` programa `nai u guaha finana`gue gi taotao tano` gi katkuet bokasion. U daña` yan todo atmos banda–gobietno yan bisnis–gi un` programa pot para u adelanta i kualidat hutnaleros gi halom natibo.
Este na programa siempre benefisiosu para megai na natibo ni mumalague` umadelantan maisa siha gi un` offisio `nai siempre u soda` futtunan niha sa` enfin esta mahayo (training) ya mababa mas appottunidat para uma-emplea gi laguaguan na sueddo.
Tananae` i Presidente NMC as Señor Joaquin (Jack) Sablan nu este na mauleg programa. Ta diseseha lokue` na todos ahensia yan bisnis guine u fan daña gi hilo` antao na programa siha pot para uma-adelanta i tiniñgo` natibo kosake u metgot mas kualifikasion niha gi bandan chochu`. Un` mauleg na programa para todo natibo. Si Yuus Maase` yan ghilisow!
