Previous Story
Dañosu na sensian imbidio
|
Posted on Dec 08 1998
Guaha un` kustumbren natibo na mampos chatpago yan dañosu. Guiya este i kumtumbren imbidio `nai ta hala papa`, kulan grupon pañglao gi halom badde, i kahuhulo` na natibo. Taya` sensian inagoflie` yan pininite gi prohimuta. I para ta fondu ha` i prohimo amano i siña na chinadeg.
Tauguine na sensia guaha gi halom `nos kuantos na membron lehislatura pot asunton industrian garment ni sumaguaniniye pago kahan Marianas. Mampos petsonat ya esta nina` fan bachet hafa sesso i sustansian i asunto. Mas mabohao i petsonat na sentimento ke para umaprotehe i industria ni muna` fañoñochochu mas ke 3,000 na familia guine.
Mauleg ha` u fan manguot` mahetog yangin enfin esta guaha tahgueña i industrian magago ni listo kumatso i miyon yan miyon na salape` ni nina` halom este na patte gi ekonomian Marianas. Lao klaro na pot petsonat yan layeye imbidio na guaha este na sentimento.
Ti komprendiyon hafa na guaha este na sentimento giya siha lao kabales oppan na sumen chafleg pago i industrian turista ni hagas sumustetene ekonomian tanota. Solu sosobla na haligen ekonomia ni sumustetene Marianas pago i industrian magago. Hafa na para ta hogse mandañosu na areglamento este na industria i fitme ha sustene i kalu na pisun ekonomian Marianas pago?
Kao magahet na ayo siha na bisnis i mangaige gi distrito uno esta i kuatro (bisnis setbisio) siña ha saguaniye kahan Marianas maseha $1.5 miyon pesos gi mamamaila` na Enero? Yangin antao na ayudo tanae` pago i industrian magago, siña este na kantida humalom gi tutuhon otro sakan yangin ta plantaye mauleg na areglo pot para u fama` ganansia mas.
Yangin para u basnag ya umadestrosia este na industria pot imbidio `nai siempre maudai chatkonsiderasion na areglo, pues ta diseseha na manlisto lokue` i kontrarian adelanton haanen familia guine na patte gi ekonomia prumebeniye chochu` osino mantension ayo siha na familia i para u fan mamadese pot sensian dañosu na imbidio.
Hasso i hinemlo` ekonomian Marianas ya i taotaota siha ni sumosoda` pago kinano` familian niha ginen este na industria. Si Yuus Maase`!
