Industrian Turista

Guaha `nai tataitai estoria na mauleg kinalamten industrian turista. Hinegse este ni otru gaseta na iya Marianas ha susteteni i kinalamteña fitme.

Buenu! Yangin homlu` este na industria haf` na taigue benefisiu gi sueddon i tautau siha? Yangin i paska na ekonomia ha susteteni mauleg kinalamten pa`gu, haf` na taigue `sino ti talili`e` adelantoña ennau na sinistene gi kinalamten guine?

Dispues, arastreha tatte haf` sessu diariu masusesede gi industria ni tapopo`lu na homlu`. Kanaha` todu bisnes monhayan mafahan gi mafanana`an “coupon” entalu` Japon, Korea, China yan otru lugat.

Manhuyuñg mage Marianas `nai kontodu neñkanu` niha monhayan ma-apase gi tanu` niha. Gi hilu` este na modun bisnis, manu `nai nina`e` kampu i tautau-ta bumenefisia kinalamten este na industria? Ha huchum pattisipasion bisnis i tanu` ayu na taya` sumasaunau gi este na patte gi ekonomian iya Marianas.

Siña mohon i manma`gas uma-estudiaye este na industria para tali`e` haf` na diariu maletke pattisipasion bisnis tautau tanu`? Siha man-apatte ni trosu, hita i ampodoñg sopbla gi hilu` satge, haf` mohon?

I puntu: Ti mattu china man-inosenteta gi haf` masusesede. Huñgan guaha siha cho`chu` lau puru offisiun mantagpapa` `nai hita rumikokohe anpoduñg granum hinegsa` gi satget.

I manmaseñala siha na adelantu siempre ta kahate silensiu para ta estudiaye kau magahet benefisiosu para i tautau-ta. Mientras ke gagaigeyu` bai` sige ha` yumeñgyuñg i troñku pot para bai` li`e` tinegcha` i ta añgoghu na sombra para hita lokue`.

Kinententu Yan Pas
Buente pot ume`emahalañgyu` silensiu yan katma gi ha`anihu mina` hu senagradese `nai hu bisita un` amku` gi lanchoña giya Talofofo guine gi alacha. Sumasaga i prohimu gi fina` fitme na lanchon siguale. Kontentu gi lugatña.

Mitinanom gi hatdin yan `nos pinegsai siha para mantensioña. Tiha u`usa kandet `sino hanom siuda. Nahoñg ni kandet falut yan finagteña hanom gi `nos kuantos tañken 50 galon. Ni usun television tiha offisiona.

“Nahoñg ni chalamlam miyon na pution gi lañget `an pueñge, katen paluma yan manog gi taftaf oga`an yan minachom atdau”. Hagas talayeru yan peskadot. Guaha `nai manyotte talaya `sino lumulai gi kanton kantit para u tulaika sabot sentadaña.

Ha atanyu` ya chumaleg, ilegña, “Cha`mu e`esun mañgge` sa` ennau mana`imu na katgu ginen hilu`.” Ti mapot na offisiu sa` hagas fafayihu. Sige ham dispues umayote pot appenas fondu gi kahan iya Marianas.

“Kulan ha ige hit manadan gastu yan maribahan kontribusion aduana”, ha apunta huyuñg. “Debi u guaha satton na inadahe gi todu riñkon obligasion yan dibi”. Huñgan guaha inadahe lau tinanahoñg chigu`an pat gaige mohon i problema gi bisiun dispiddisiau na gastu?

Huli`e dispues kelaguen tiao gi hilu` lamasa yan tininon tinala` katnen babue. Ha repara dispues na sigeyu` mamañot. Ilegña, “Guaha piniloghu dididi` para chinile`mu kontodu fina` golai yan gulusina”. Huli`e` `nai manhoka masan mañga na hana` fan sahñge i manlañayon para i babue. Ha po`lu i manmauleg na pinedoñg para chinile`hu.

Hu faisen prontu haf` hinassoña pot tinilaikan modun linala` natibu entre antes yan pa`gu. Ha mensiona maliñgun sensian komunida, kuttura yan mdtgot na sensian kilisyanu. “Puede ti maliñgu lokue` finu` Chamorro sa` kanaha` todu famaguonta pa`gu manfinu` E`Eñglis”. Ensegidas ha apunta huyuñg na i presetbasion espiritun natibu gaige gi mañaina gi haf` ma-impatta ginen halom guma` huyuñg”. Konfotmeyu`.

Ilegña na ha komprende liñguahen ineyag yan bisnes “lau chatmiyu fan malelefa ni riku na tradision natibu ni ha intrega hit si guelu sa` ayu muna` likidu espiritun natibu”.

Fresku magahet lugatña ni inarendonduye manloka` troñkun mames. I cheflan mañglu` yan katen ga`ga` mina` katma mas sinienteghu piot kada ginapot i hagon niyog ni mañglu` haya. Hu diñgu gi lemlem tautau magof i amku` pot finatoghu yan konbetsasion haf` manmasusesede.

Man-ñahlalañg
`Nos kuantos mansabiu guaha `nai matuka pot “presetbasion” kuttura. Gi kada huhuñgog este na palabra hu hahassu modun natibu gi presetbasion inasnen guihan, tinala` katne yan konsetban papaya.

Hu konsidedera kau makomprende haf“ sustansian yan signifikasion “presetbasion”? Kau usun kuttura yan tradision diariu i modun presetbasion? Na ti sinparat ta praktitika modun linala`ta diariu? Kasi dinancheña `an ta usa sin ditension tat palabra kumu “petpetuasion”.

Kuttura pot kustumbreta kumu natibu. Tradision i ma`ug na patte gi kutturata ni ta impatta gi famaguonta hinerasion pot hinerasion. Yangin presetbasion ta fafama pues kasi usun kuttura gaige na tapega gi kombiñiente-ta kulan sinahguan jam papaya yan mañga gi halom taru.

•••

Lastromu: Sige ha fatta un` prohimu na muma`gasgue` gi este yan ayu na offisiu. `Nai ma-arastreha tinatteña, ti masoda` lastruña gi puestu `nai ha faman maisague`.

I finapos tautau kulan deñgdeñg gi halom hatdin. Manu `nai malofan siempre mamega lastru gi santatte. Ayu `nai hatdineru ha li`e` dispues na guaha manbisita. Lau siempre u anog klaru lastroña. Ti siña na para un` soplu ginen haf` lastromu. Haf` i kontribusion-mu gi ma-abiban finu` Chamorro gi enteru iya Marianas? Guaha tinige`mu benefisiosu gi este na puntu?