Previous Story
‘Para I Tåotåo CNMI’
|
Posted on Sep 14 2004
Gi kåosan Sabangan kontra si Powell, i Mina’nuebi na Eskaleran Kotte put Manapela ha disidi na si Sabangan yan otro siha na tåotåo hiyong ni manmafañågu desde Ineru 9, 1978 asta Nubembri 3, 1986 manggai direchu na u fansiudadånon i Estådos Unidos sa’ i Mina’katotse na Amendasion i Konstitusion America aplikåpble gi Notte Marianas parehu yan unos kuåntos Unidos desde i fekcha anai ifektibu i seksion 505 (a) gi Covenant enlugåt di i Covenant Attekulu Numiru Tres (3).
Gi prisente guaha mås ki sinko mit (5,000) na indibiduåt mafofotma un gurupu yan manmanrikokohi salåppe para åpas abugådu sa’ siha hon lokkue’ mankinikibri nu i disision kottte put si Sabangan ya debi lokkue’ di u fanpetmanente na siudadånoniI Estådos Unidos.
Debi di ta fanmatmåta ni tåotåo Marianas (Chamorro yan Refalawashe) ya ta na’a’gang i bos-ta put este na asuntu. Esta manminot hit ni siudadånon Notte Marianas sa’ ta na’åncho i pettå-ta para i tåotåo hiyong. Hasso håfa mås para manhuyong-ta yanggen mansiudadånu este i sinko mit 5,000) na tåotåo hiyong?
Guaha ayu siha i umå’ålok na ti ya-ta yan manma’ñåo hit ni tåotåo hiyong. Bai hu atmiti na guaha minagahet-ña este na sinangan. Låo yanggen i rason ni munå’siudadånon Estådos Unidos i indibiduåt siha gi Kåosan Sabangan para u ma’usa yan kontesta na i Mina’katotse na Amendasion i Konstitusion America debi di u nå’fansiudadånu lokkue’ este i sinko mit (5,000) na tåotåo, pues mås ki na’mañåo este, prublema mås para hita yan i kuminidåt-ta.
Put fabot tåotåo Notte Marianas, ågang i manma’ilihi na ofisiåles. Ågang i Ofisinan Attorney General gi 664-2341. Faisen este siha na ofisiåles ya u masupotta i Pusision i United States Attorney put i kåosan Sabangan. Esta ti ayu ha’ i tres sientos (300) na mantai nasion na famagu’on. Kontodu siempre i sinko mit (5,000) ni mankekesiudadånon Estådos Unidos ginen i lachi na disision i Kåosan Sabangan.
Gregorio C. Sablan
Garapan, Saipan
