Previous Story
Presetbasion Hanom
|
Posted on Apr 24 2001
I Asunto: Man-tostus i cha`guan siha, un` señat na hafatoigue hit un` didog na tiempon maipe.
I Opiñion: Ti presiso na ta fan ma-abisa, hita mismo maila` ta presetba i uson hanom publiko.
Ilegña un` menhalom na amko` na i taotao munana` sahñge gi tiempon abundansia. Ti `nai hokog esta i guinahamo `nai para un` e`ensinahyao muna` sahñge. Atrasao!
Pareho este na fino` un` menhalom yan i ta fafana` kada dos, tres años `nai ha fatoigue hit un` fotte na tiempon somnag. Sumen presiso na hita mismo ta presetba uson hanomta.
Muñga hit munañga na `nai taya` esta humuhuyoñg ginen i grifo na para ta fan e`ensinahyao manmanlotge. Taya` presiso na hita mismo para ta sa`pet maisa hit pot diskuiduta.
Mauleg ta komprende na i isla, kao Saipan, Tinian osino Luta, mampos dikiki` i sagan hanom gi papa` tano`. Este na hanom mafatto ginen milag i hegso` siha guine gi tano`ta.
Mientras i minedoñgña ti matulaika, i numeron taotao ni umu`usa este na mina (hanom), sige ha` dumañgkulo piot `nai mababa mas homestead subdivision giya Saipan, Tinian yan Luta.
Esta pago, guaha siha na lugat deste antes manma-o`ora hano–taftaf gi egaan` yan pupueñge pot una ora kada biahe. Este na pinadese makat para i mañasaga siha tat lugat komo iya Kanat Tabla.
I otro asunto ni sesso ta fatañgaye i ma-umentan uson hanom gi kemon sanhalom gi megai na guma` siha guine. Buente i lancho `nai tana` sesetbe kemon sanhiyoñg. Lao, uson hanom gi kemon yan bañon sanhalom otro `nai sesso ta usa i hanom diaramente.
U fatto ayo na tiempo `nai debi, obligao, uma-kula uson hanom tase taimano i mapropone guine gi alacha. Mas siempre guaguan este na setbision hanom ke hafa ta apapase pago. Lao, ennao uttimo manera `nai siña u guaha sufisiente hanom para i nuebo siha na residente ni ta establelese gi papa` i programan homestead.
Pot no u guaha mamadese sin presiso, maila` ta fan daña gi presetbasion uson hanom kosake ta upos este na tiempon maipe sin didog na chinatsaga pot hanom. Si Yuus Maase`!
