Si Tata: Padre de familia

I tatan guma` guiya ayo na petsona i silensio gi halom familia. Ti mefno`, lao guiya i prohimo i muna` tacho i pisun yan haligen fanliheñg familiaña. Fitme tumacho pareho ha` gi halom katma yan pagyo.

Manhula` gi haanen `nai umakamo` yan asaguaña para u katga kiluos`ña gi entre tiempon chinatsaga osino abundansia. Maseha makat i hafafana`, sin ditension ha muebague` para u prebeniye nesessidat familiaña. `Nai tinanahoñg chiguan`, ha tulosuge` gi finagpo` chochu` para gualo, mananom yan mamogsai gaga` para unna` nahuñge lamasan sena.

Buente pot mampos silensio lao fiet gi obligasionña. Ayo buente na ti sesso talie` hafa nina` siñaña gi halom chubaskon osino mattiron linala`.

Hulie` un` amiguho gi 1994 giya San Diego (finatton pot malañgon asaguaña) gi ritiradaña ginen hospitat. Ha alulaye mama`tinas, dispues mamagase magago, sumena ya ha birague` tatte gi hospitat.

Deste ke hu tuñgo` este na taotao, diberas solu guiya siña baiho` ayeg komo modelon halom mantata sa` tatnai hulie` satton gi asaguaña, deste antes. Kontodo guiya lokue` i prohimo sumen malañgo pago. Lao ni este na chinatsaga ti nina` seha gi obligasionña umasiste asaguaña.

Diberas, este na amiguho solu mumirese un` dañkulo na premio ginen Nanalibreta pot satton yan likido na modelo komo padre de familia. Malañgo esta i amiguho ya hu tayuyute diaramiente na umanae` minetgotña gi presente na chinatsagaña.

****

Mafatto lokue` mahalañgho gi santusan na tataho as Francisco ni muna` dañkuloyo` yan mañeluho gi hilo dibi. Guiya domobla i baban kustumbregho gi duranten `nai sutteteroyo`. Magahet na sin fitme na disposision ginen guiya, ti baiho hineñghañg yangin kada ratoyo` halom yan huyoñg ginen i pettan i presu giya Susupe.

Esta tutuho` lago`ho nu i binibuho guihe na tiempo `nai guaha i Student Body President gi ginen Hopwood Sr. High School. Lao ti siña hu attende aktibidat estudiante sa` debi baiho dalalag si tataho para lanchon Tagpochau. Lao dispues `nai hu agradedese hafa kinahulo` un` patgon sumen poble.

Dispues de matai tres años malofan, humanaoyo` para i pategho tano` gi gualo` Tagpochau muna` gasgas. Sigeyo` man-desmonta gi entalo` choda. Dispues de huna` manana un` banda, hu tutuhon rumikohe matai hagon siha. Lao, kada hu hala i munton, guaha lokue` gi un` banda manhahala osino kulan man-ayuyuda.

Manfugoyo` sa` kulan hu tuñgo` haye ayo i gaige gi un` banda. Hu soñge chipaho pot ennao finanagueña nu hame yangin guaha ti ordinario siñientemo. Dispues hu adiñgane na polu basta ya maulegña buente `an sumagague` gi madisponiña. Lao buente nina` maase` si tataho pot guaguaho ha` na maisa gi chago` lugat. Kao matton para u pulan ñaihonyo` pot no baiho ma-estanae.

Magahet na satton na tata ya umadispide ham gi un` guinefiho, magof mataña, sige de chumaleg `nai ha a`atan i famaguon famaguonña. Ayo na guinefiho `nai hu komprende na todo felis i hinanaoña.

****

I satton na finana`guen` tata mauleg ta atetuye gi bandan masimiento i hagas mañge` na dinaña familia `nai gaigegue` yan si nana gi entalo`ta. Pot todo i konkariño, un` sumen na`magof yan felis na haanen mantata para todos. Happy Father’s Day! Si Yuus Maase`!