Previous Story
Señat yan dinisehan publiko
|
Posted on Dec 01 1998
Sumen namatman yangin esta pago guaha gi halom membron lehislatura ti makomprende hafa signifikasionña i poduñg ekonomian Marianas. Yangin seguro hao na espanto i un` lilie`, pues atan talo un` biahe kao dumibeberas hao pat matto gi ti siña un` taitai hafa primera didog probleman iya Marianas deste mapos na sakan gi Juñio.
Man-dañkulo yan piligrosu siha na señat fumatoigue Marianas deste mapos na sakan `nai i primera industria (turista) matompu` ya esta pago ti siña tumacho. Gi hilo` este, mas ke 1,100 na bisnis mahuchom pettan niha sa` mampos dañkulo maribahaña i numeron turista.
Dispues, man-e`ensinahyao i bisnis siha ayudo ginen i gobietno sa` makat i ha fafana` na kondision. Kontodo i administrasion ha rekommenda na u fan masuspende osino mapuno` `nos kuantos lai pot para una` sahñge fondu para setbision publiko. Gi mapos na semana mabebende dos hotel guine sa` mafnas i numeron turista gine Korea.
Yangin tinahoñg nu este siha na señat hafa sesso kondision ekonomian Marianas, pues hago ni ma-elihe ti un` komprende i asunto sa` trabiha gumugupo hao gi hilo` aire. Tunog` papa` ya gi hilo` tano` puede guaha tiempomo sumiente hafa na buruka guaha gi taisinahguan na kahan Marianas.
I asunto ni pinetsigen federat tai sustansia yangin un` pesa kontra hafa masusesede pago guine. Kao magahet na kalamten i Depattamenton Interior para u fan ayudo fehman sa` basnag i ekonomian Marianas? Pat mas ha` ha fatkiluye i asunto pot para u lie` para tafanai mano gi halom este na pinadese yan chubasko? Kao propio na este na atetu para in` giot` sa` matto gi man-espantao hamyo ya libiano in` sakrifisia futuron famaguon Marianas?
Señores, mammapega hamyo guennao na siya siha para in` protehe direchon taotao tano` gumubietnan maisague` taimano i mafitna na kontrata gi papa` i Covenant. Responsablidat miyo prumutehe fehman este na direcho dimas de sige in` bailaye hafa dinisehan i Depattamenton Interior. Ti mapot este na kuentas yangin in` faisen maisa hamyo: Haye in` represesenta?
Pot uttimo: Yangin makat i responsablidat ni in` gege`te pago, resigna hamyo sa` guaha ha` mas mankapas dumirihe i guinifen natibo gi dicho intension para una` fitme mas i direchoña gumubietnan maisague`.
