Probleman PSS

`Nai malagnos gaseta na 90 pot sientu gi estudiante ti mapasa i sensura gi NMC gi alacha hana` chatsagayu` sa` oppan na guaha seriosu na problema gi sisteman edukasion publiku guine.

Gi ti mapot na manera, umanog ginen sensura na seriosu probleman niha ayu siha na estudiante gi bandan numeru yan letra. Este na resutta debi todus i ti fumatinas u fan mañule` klase (remedial courses) siha gi NMC estake mapasa. Soluke mapasa `nai siña man-mañule` klasen dipotsihe eskaleran yan estudiun kolehu. Pot un` añu na tiempu siempre umachule` klasen remediu.

I chinatsaga un` dañkulun diskuidu gi PSS. Gastu ni sumen guaguan sa` debi uma`usa fondun kontribusion tax ni manana`e PSS pot para edukasion estudiante siha. Pa`gu, debi umarepite estudiun niha poku mas o`menos un` añu na tiempu.

Seriosamente, debi umaketuñgu` ni PSS manu sessu `nai gaige finatsu. Kau i problema gaige gi kualidat maestro ni tinatitiye ni chatseguru na kualidat finana`gue? Kau man-mamuebe este siha na estudiante sin kabales sensura na matuñgu` leksion niha?

Namatman sa` mamamaisen ta`lu i PSS subrida ginen fondun iya Marianas. Ti siña hu sapotta ennau na diniseha estake mana` klaru, segun i sensuran estudiante gi NMC, manu `nai gaige defektu. Hafa motibu na magagagau mas fondu yan kau para nesessidat estudiante pat hatsadan sueddu gi sentru na offisinan i PSS? Debu uma`oppe este na kuestion!

Taya` hatsada pot 20 años
Mesñgon i natibu gi ridondun potput halom tanu` sapet ni pinilakes diskuidon man-ma`gas. Pot 20 años na tiempu taya` hatsadan sueddu. Gi mismu sakudida mañgahulu` todo presiun nesessidat familia gi katkuet birada. Ti mapot este makatkula.

Pot ihemplo: Gi kada pesu ni un` gana nasuha ochenta sientimos ($.80). I sesepbla na benti sientimos i sueddomu gi halom mattirun este na ekonomia. Akomparasion masimientu i hatsada ni inaminasa seriosamiente gi kinahulu` presiun todus nesessidat familia.

Este na mattiru kabales ha konfitma i mampos chafleg na ekonomia-ta. Kuestion: Hafa man-mapetsige siha para uma-adelanta linala` i publiku kume satban maisa siha gi halom mattirun yan miserapble na lina`la`? I ma`utut pagamientun man-ritirau 25 pot sientu mas kumonfitma chinafleg ekonomian i tanu`.

Hafa na mas chafleg i linala` i publiku di mas mohon de uma`adelanta dispues de anunsiun kumahulu` numeron turista siha? Unu, taya` komprendiyon yan husgau na planu. Otru, lache na asuntu marikononose gi numeron turista.

I dichu kuestion: kuantu gi humalom na gastun bisita guine humanau guatu gi kahan iya Marianas? Yangin figu` adelantun numeru pues debi u achafigu` yan i marikokohe na moneda. Fabulas de chispas este na numeru! Dispues, debi u guaha otru planu para siakassu na lotgun ya mayamag i mampos paska na industrian turista. Estague` i dichu asuntu ni sige ha` ta letke pot ginagu`! Para esta ñgai`an na tiempu?

Inebaluan Kandidatu
Guaha umatrebigue` fumaisen-yu` sapottasion. Hu tampan ñaihon para bai` li`e kau fitme layag galaide`ña para pagyun mattiempu yan mattiru.

Hu puge kuestion pot haf` kinemprendeña i mas seriosu na probleman iya Marianas. Listu ha oppe na i ekonomia. Hu faisen kau gai planu satbasion. Ha oppe lau mampos abarambau. Ha kehayen maisague` ni atotganteña ni mamatmos gi halom fache` gueku. Gatdun gi halom atrebidu na maña ya ni mona ni tatte. Hu utut i konbetsasion.

I puntu gi kuestion ni hu faisen pot para bai` ke li`e kau ha komprende haf` i publiku sumasapet pa`gu. Kau magahet na parehu na sapatos ha `u`usa yan man-otdinariu yan mamobple gi señgsoñg siha. Trabiha mamaya` hinassoña ya mampos apattau yan probleman i tautau siha. Hu dispacha sin ditension.

Lamegai parehuña gi halom hagas yan nuebu na tropan kandidatu. Sige hu analisa fino`ña. Puru ineppen chanseru. Na`mase` i publiku yangin para bai` entrega ha`aniña gi un` petsona ni ti tumuñgu pinadesen publiku ni finañagun diskuidu. Makat giya guahu para bai` fama un` kandidatu ni abarambau kinemprendeña pot asuntun linahyan.

Gi chinatsagan tiempu
Hayu-hu areglu yan fitme na otganisasion piot gi asuntun linahyan siha. Kumeke ileghu na debi u guaha planu haf` para umachogue. Gi hilu` ennau na planu, debi u klaru haf` siha para u fan machogue papa` pot para ta komple i planuta. Presisu na u guaha chachalaña ennau na planu.

Cha`mu sañgañgane-`yu’ na un` sapopotta mauleg na ekonomia, edukasion, hinemlu` yan otru siha asuntun publiku. Tunog papa` ginen kabayumu ya un` esplika taimanu para un` komple planumu. Munga mafa`yu` inosiente ya para un` dispachan insuttu-yu` ta`lu gi hilu` dinage. Man-ansias ham kumetuñgu` kau magahet na un` komprende i asuntomu pot linahyan.

Esta man-fatigau i tautau ofresimientun na`tatah ni mamatmos gi halom sisonyan gueku na promesa! Presenta dibuenamente planu-mu ya ta pesa kontra haf` tinate-mu deste edukasion yan ekspiriensia. Yangin fatsu tinatemu, maulegña boluntariamiente un` deskansa. Nahoñg esta tropan gueku na “biba” gi plasan publiku.