Destrosiu kontra i publiku

Politikan betgansa yan imbidiu sumen dañkulu na destrosiu kontra i lina’la’ publiku. I man-ma’gas ma-atan ya maprotehe amigun niha gi bisnis. Man-malefa haye gai interes debi umaprotehe. Estague’ na modun politikan destrosiu sumasa’pet hit pagu.

Pot ihemplo, humalom un’ kompania ni dañkulu interesña fumahan i Commonwealth Utilities Corporation (CUC). I apas kandet ti u mas ke bente siñku sientimos gi ora gi papa’ i mapropopone na atkilon CUC. Gatdon este na planu sa’ ti man-listu i man-ma’gas politika kumonduse halom sa’ umatotpe yan planun man-atuñgo’ niha gi pare na bisnis.

Lastima i appottunidat sa’ libre mohon i publiku ginen i presente na apas utilidat. Unu gi dueñon ayu na kompania ginen Saudi Arabia ya libianu ha fahan i laña mas baratu ke otru pot sudadanon ayu na tanu’.

Man-malefa ni interes publiku. Ni siha pagu taya’ siña ma-ofrese kumu satbasion i kanaha’ pumupunu’ i tautau-ta gi apas kandet yan hanom. Lastima!

***

Humalom otru kompania ya ha offrese i gobietnamentu guine $100 miyon pesus para u hatsa un’ sisteman utilidat ni nina’ kalalamten ni mafanana’an nuclear energy. Ti laña para una’ setbe soluke fuetsan nuclear para u prebeniye i tautau kandet.

Madispacha gi hilu’ botlu na inachatge. Ha birague’ i kompania tatte Korea mampos disganau ni taya’ fotmat na konsiderasion. Pagu, man-a’afaisen i sabiun i hegsu’ i Deni para uma’agañg tatte ayu na kompania.

’Nai toma padiset, i mas ma’gas ha hatsa kanaiña ya hana’ apuntau i talu’ na kalulotña ya ilegña, “Sañgane man-ma’gas miyu, estegue’!” Lastima!

***

Antes de gera, estaba un’ familian Japones giya Tinian. Ayu bisnis niha i man-mamogsai babue. Kada sakan, dispues de gera, mafattu ayu na tautau pot para u lie’ i lugat niha gi fina’ hogsu’ ginen i Jones Beach. Kase familian niha mas dañkulu yan modetnu na bisnis babue mapetsisige giya Okinawa pagu. Gai interest chumogue mismu bisnis guine lau sige ha estudiaye hafa propiu.

I otru paire na kometsianten pinegsai babue ginen iya South Korea. Dañkulu bisnesña pagu ya duru mamatinas ganansia ginen pinegsaiña. I namatmaña este na kometsiante iya Marianas ’nai umeyag mamogsai babue. Ha petsige mismu bisnis ’nai ha birague’ tatte Korea. De dios mihu. Matuñgu’ lokue’ lacheron Koreanu na paire Marianas gi bandan agrikuttura ya sessu ma-ñgelu’ kau ñgai’an ’nai propiu u fan halom mage.

***

Esta guaha deklarasion haye siha para u fan malagu gi papa’ banderan republican. Trabiha i covenant yan democrat ti ha pepega haye na pilea para u machoneg na biahen eleksion.

Lau para i man-gaige gi republican yan covenant kulan hegsu’ katbariu in’ fafana’ sa’ ni taimanu na atlibes miyu, i franela yan chinina gaige na chechetton ha’ gi un’ tatautau. De dios mihu!

***

I dumisidi man-kandidatu independente siha este na grupu i ti konfotme ni hagas pasadu na dandan ni tai sotfa. Ti man-listu prumesenta siha talu gi mampos machalapon na grupu ni tai dignu gi kustumbren natibu ni mafanana’an “finu’ lahe”.

I grupun independente para u gini’ot i konfiansan publiku na biahe. Ni unu gi entre siha listu rumipite i gueku na bidan republican yan covenant ’nai ha pega i publiku dibuenamente gi hilu miserable na estau lina’la’. Makat na kontrariu ya memegaiña na botadot ti umarepite munae’ ta’lu konfiansa i muna’ fan gagalileg siha gi halom fache’ miserable.

***

Umasoda’yu’ yan un’ membron lehislatura ni umatrebigue’ malagu talu. Hu faisen asuntun linahyan siha. Ilegña na lamegai guaha. Hu de’un haf’ na ti hana’ fonhayan gi mapos ’sino pagu na sakan i che’cho’ña siha. Taya’ klaru na ineppe lau ha gotden te’chuñg hila’ña.

’Nai humanau, sigeyu’ chumaleg tuyanyu’ sa’ ha fagchae’ dinanche i ha fafana’ na botadot. Mattu gi chupun i prohimu ya sige ha espiha eskusuña para u lagnosgue’ ginen i sumen na’mamahlau na inasoda’. De dios mihu!

Yangin ti un’ chogue che’cho’mu, ke pot hafa motibu na para bai’n beta hau talu lau klaru na ti umaya i inapasen mame kontribusion tax yan taya’ bidamu benefisiosu para ham ni publiku? Esta masge pot dos años ya para bai’n repite i mismu malabida ’nai sumaunau hau lumuñu lina’la’ publiki papa’ gi kuchinu na fache miserable? Pinilon miyu na parehu pineblen titanosmu lau hame pumadedese direktamiente chatche’chu’ miyu?

****

John S. DelRosario is a regular contributor to the Saipan Tribune’s Opinion Section