Abarambau I Tanu`!

Esta ta diskute pot burukan i tanu`. Pa`gu mauleg ta akanteha kau magahet na abarambau. Sige hu yeñgyoñg haguhan rason para bai` tamtam kau magahet i man-sañgan. Atan ya un` repara i sigiente siha na asuntun linahyan:

25 pot sientu ma-utut sueddon man-ritirau. Mas ha` gi dimalas ke Christmas!

Insurance hinemlu: Pipinu` lau ni unu gi hegsu` I Deni tumugtugag!

Kahulu apas kandet: Hita appenas apas, para siha tiempon Christmas.

Kahulu` gaston neñkanu`, ti masesiente sa` man-masuesueddu $90,000 gi sakan.

Todu gastu kahulu, i sueddu man-masimientu gi fache` tropan “Do-Nothing!”

Kanaha` ta pupunu` hit man-fundraising para malañguta. Mana`e NMDs $100-mit pesus para usun niha.

Tita lalañgag apas hospitat yan amot. Sige ha` mañgarera kulan mohon gaige gi hilu` aire offisinan niha. Man-ma`añau man-machochu` gi fitme na pisun tanu`.

Guaha mohon esperansa yan kampu para fitme na adelantun linahyan ginen i man-sabiun I Deni`?

Esta i tautau ti man-kakadidiñg pot chinatsaga na mababatsala manu i chechetun gi tatautau niha. Kumu offisiat publiku hau, muñga mafa` ignorante hau sa` isaumu yan pot diskuidumu na taiguine na sapet guaha gi tautau siha. Haf` otru gueku na promesa para in lapbla i publiku na biahe?

Haf` Tinatemu?
O`sun-yu` `sta lehislaturan Sears Roebuck yan JC Penny ni yumute` asunto-ta ni publiku gi un` banda kulan lamug na matai galagu. I mas fotte na defektu i taya` satton na kinemprende gi asuntu linahyan siha. Kulan ha`anen feria diariu para siha.

`An un` yotte pot probleman ekonomia siha lokue` mañgonfotme. Lau siha man-gaige gi siya pa`gu. Yangin deste primet sakudida masge i asuntu ke ya haf` bidadamu guennau na kuetpu?

Kau nahoñg hinimidde giya hagu ya un`nana`lu i siyan mame kosake siña bai`n entrega gi otru ni kumomprende sustansian representasion gi dichu asuntun linahyan?

In` tiñgu kabales na kada sakan na diskuidu ginen hamyu, tres años tatte `nai in` pega ha`anen i publiku. Esta ti manlistu ham para este na diskuidu. No Mas!

Bachet yan tañga
Sige hu akanteha manu `nai gaige defektu gi mafatañgayesiha na asuntun linahyan. Esta hu guadog haf` edukasion niha, ekspirensia yan otru siha presisu na asuntu. Ti hu komprende manu `nai sessu man-masge` na taiguine na diskuidu guaha.

Bes enkuandu hu repara na dispues de kotbatan Sears Roebuck, hokog mames sa` memegaiña ti tumuñgu` haf` nesessidat yan iniguñg i publiku. `An un` lapbla seriosu na kuestion kadu` man-e`ekuñgog ya sige ma-espiha rason para u madiñgu i lugat.

Mampos triste na karera i mafatañgaye haf` sessu sumasapet megai gi tautau-ta. Lau haye u fan hahassu publiku piot ya makalelu yan mampos mafñot i kotbatan Sears Roebuck?

Linau gaston hinemlu`
`Nai kahulu` gastun hinemlu` deste health insurance, apas hospitat (deductible) yan amot, ha lachai muna` fan galileg todu familia guine.

Ti komprendiyun haf` na ni unu mamaisen gi federat para umalagnos Marianas ginen este na proframa. Lau gaige este na finatsu mas gi timatuñgu haf` gaige guihe na pakete. Dispues ti mataitai sa` dididi` mangai problema tinaitai finu` Eñglis.

Rason kasse na ti makomprende i aminasu gi tautau sa` man-masuesuetdu $90 mit pesus gi sakan. Lau na ti destrosiu yan sumen sa`pet este na lai federat?

Kontodu Kilili` mamatkilu kasse pot dos rasan: 1). Ti sumaunau membron Congresson Amerika gi kobransa `sino programa. 2). Tiha tuñgu` na mampos na destrosiu este na gastu gi monedan familia siha guine. Haf` na taiguine na diskuidu guaha?

Megai lumagnos siha ginen inapasen niniha health insurance` sa` linachai i tetehnan gi sueddu. I ti man kualifikau Medicaid siempre siha u inapase gaston setbisiun mediku yan hospitat.

Man-na`mase` i man-pinalo`pu` nu este na estau sa` ti umafalague hospitat estake man-sen malañgu. Mas malañgu i natibu ginen dañosun Obamacare. Buenas! Guaha tautau gi gima?

I mañan no-siañkassu ti halom offisiat publiku i mas tailaye sa` mayute` asuntun tautau-ta gi un` banda para siha u espihan maisa siha. Ke lau ti man-hula` hau umaksepta asuntun linahyan? Kau linachai fuetsan man-hassu ni latigasun casino? Hombre casino nina` kilulog hau. Kuandu menos ya laseriosu na asuntu. Fan gai mamahlau!

Komprendiyun na este i kabayeron politika taya` mamahlauña. Achogha` tiha tuñgu ha atrebigue` pot ignoranteña gi asuntu. Piot ya hababa sekosña ya todu lache. Finu` i kuentos maulegña mamatkilu ya u sige dumibina haf` tiniñgo`mu ke un lapbla hau ya un` funas todu dinida. Sensian hinimidde yan pinasensia baston tomtum!