Malinau hanom sadog

I hanom gi sadog iya Susupe malinau. Suabe i guinfaifen mañglu`. Esta siña hu ekuñgog i silensiun i lugat propiu yan oriya. Esta na`fugu i katman sadog yan mañglu`.

Mattu gi malinau na hu li`e i mapagahes gi fondun sadog. Bonitu sa` gofha`an mientras sige pajaru man-gupu gi aire. I freskon mañglu` sige ha gaput hagun niyog.

Gi silensiu libianu un` huñgog lokue` pinadesen tautau-ta siha ni magap hulu` ginen katkuet soñgsoñg. Ilegña i amiguhu Magoo na mafunas esta i “better times” ya mapegaye nuebu: “Maybe next time”. Dios mihu!

I pinadesen todus un` klasen pañgpañg napu. Dimas de un` attende problema, kasse mas gai benefisiu hau `an un` atan haf` na satbasion guaha sin ayudun man-sabiun I Deni`. Kau malinau tasi pat sadog, mauleg na lugat para unna` deskansa hinassomu.

Modelun Todu

Sige hu arastreha haye gi halom man-maestroghu yuma`hu intereshu liñguahen English yan Chamorro. Gaige dos: Si Señor Vicente N. Santos yan defuntu Jesus M. Concepsion. I finenina maestroghu gi English Reading Class. I segundu maestroghu gi English `nai sigeyu` mona.

Lau i tumanom taftaf grammatikan finu` English i tiuhu as Rudy M. Sablan. Deste sais gradu ha poñga ham ni ochu na patte gi pisun grammatikan English. Ai, tai malefaghu nu ayu na leksion i sumatbayu` gi karera mona.

Finu` Chamorro gagaige ha` si Nan Che` Torres ni fumanague ham tumuge` primet na finu` Chamorro gi segundu gradu. Ayu i tutuhon yan uttimu na leksion mame gi matuge` finu` Chamorro. Gi mina` tres gradu `nai man-matutuhon ham ineyag finu` English.

Eksperiensia

Magahet na i nanan tiniñgu` gaige gi ekspiriensian tautau. Hu adeñgane dos tomtum na amku`, unu lancheru i otru peskadot. I lancheru umesplikaye-yu` tiempon preparasion plaset fangualu`an antes de finatton primet agua de Abrit. Kontodu usun ramientan gualu deste fusiños, kuha, bareta`, kama` yan machete. Humanau guatu ham gi tinanom, pinegsai yan peskan tasi deste talaya yan fisga.

Benefisiosu na konbetsasion gi dos tomtum na amku` ni hu fagcha`e gi dumañkuloghu antes. Ti sessuyu` gi tasi lau kanaha` diariu gi gualu dispues de finagpu` eskuela `an taya dottrina. Man-malulog ham kabales ni dos amku`.

Sige mona, in` fagcha`e otru siha mañainata ni umapagat ham lokue` haf che`chu kilisyanu gi maseha haye na prohimuta piot pot sensian ayudu `sino karidat. Hu sen agradese todu konsuelu yan satton na kreneansan niha.

Sentadan Lanchu

Dispues de man-echu ham lahe, sige hu dibina haf` na man-ñge`ña finadeni satdinas gi lanchu ke gima`? Todu sentadan lanchu palañgpañg. I mismu sentada sosobla `an i gima` `nai maplanta.

Ilegña si tatahu na gi gualu` todu mañgalalamten gi entalu` luchan tinanom. Duru i usun kuha, fusiños, kama` yan machete. Todu man-lamlam tatautau niha sa` man-sososgun masahalom. Kontodu estomagu hokog para u guleg sa` duru i sague` machete yan maluñu kuha.

Tat ti ñalañg gi oran amotsan talo`ane pat mirienda. Deste atulin atmayas, harinan mai`es yan kalamasan dikiki`. Namase` i babue sa` in` heflag todu tason mame. Ai na tiru guihe siha na tiempu. Lau manhomlu` yan fuetsudu i mañeluhu siha lalahe.

***

Buente pot kreneansan hinimidde yan inagofli`e gi halom un` popblen guma na man-hihot relasion mañaina yan famaguon antes. Gaige guennau ayu na pisu i hinatsan tata ni nina` fitme haligiña as nana. Man-daña yan akilili` todu entalu` i chalan i gima`, Guma` Yuus yan i gualu` familia. Ni achog bai mabendas, bai` danche chalan ayu na gualu tatte gi gima`. Ayogue` na gualu sumustene hinanau mame kumu familian tanu`.

***

Huñgan, guaha `nai man-ñgaha` ham uttimu suspirus finaisen bendision ayudu ginen hilu`. Sen ti magtus lokue` fitme na inapagat nanan mame para bai`n embrasa sensian hinimidde gi haf` guinahan mame. Estague` na halige chumaba` hinasson tulisan gi che`chu` tinailaye.

`In siñgon todu mattirun pinepble. `In gesa guinahan tanu` deste tinanom gualu`, suetten tasi yan sabana. Man-felis hinanau mame na idat pot in` katga, sin ditension, obligasion mame gi fitme yan satton na disposision nana yan tata. Makat na tiru lau halulog ham dispues gi haf` propiu yan dinanche. Mit grasias para todu minesñgon mañaina-ta.

***

I patgon ni dumalalag si tataña gi kanton tasi siempre u eyag tumalaya. Ti u fan gagau na`ña guihan sa` esta libianu guiya na maisa mañgone fina` totchen tasi ginen talayan tata. Kontodu ayu i mañaunau gi che`chu` gualu` u soda` dispues hinagoñg niha. `An para yeñgyoñg atdeñg todu dia, pues tula noche un` frichis mañglu` ti senkilisyanu.