Inadiñgan pot tano`ta

Bes enkuando ta diskute hafa minaulegña `sino difektoña i Attikulu Dose. Guaha dumiseha na u masustene mientras i otru patte para u matulaika. Umatotpe didog sentimenton tradision kontra disposision.

Komprendiyon i mafafama na priniponen tinilaika. Gi mismo tiempu mampos na chatsaga i para tayute` ñaihon man-dueñon tanu kumu natibu ni inestablesen tradision deste antigu na tiempu.

Gaige guennau na pisu i tradision tanu`. Esta pa`gu man-gagaige ha` espiritun mañainata gi este siha na tanu`. Dañkulu dinidahu na i sakrifisiun niha mafañagu gi hilu` para mabende uttimu guinaha-ta soluke para usun i manatatatte na famaguon-ta.

Na ti esta pa`gu ta u`usa i tanu` para pinegsai yan tinanom mantension familia ni inestablesen tradision? Na ti magahet na esta pa`gu ta bisisita i lanchun familia gi finagpo` cho`chu` yan uttimon semana?

Dispues, para ta malefan ñaihon tradision mañaina-ta ni umusa i tanu` gi sinistenen familia deste antigu na tiempu? Hafa na gigon chatsaga i tiempu listu i natibu ha falague i lanchu? Na ti pot tradision gumualu`?

Hu a`atan mona futturon famaguonta pot este na asuntu. Ti listuyu` humuñgog ginen naftanhu man-a`adiñgan dispues gi hilu` puti na minahalañg espiritun niha na guaha ti kabales gi ha`anen niha kumu famaguon tanu`. Ti hu guiguife pumadese destrosiau na diniseha gi tradision tanu`.

Espiritun Natibu

Hafa na esta pa`gu metgot gi halom natibu espiritun antigu na mañainan Chamorro? Na ti siha umusa diariu i tanu` pot probision yan mantension familia? Na ti ennau na usu `nai mafañagu tradision natibu? Na ti magahet na debi u guaha respetu gi tradision-ta?

Ginen este siha na tanu` `nai machuda` masahalom niha pot para umana` fan la`la` i manmofo`na na hinerasion antes de si bisguelu. Poresu, i achon tradision machuchule` mage ya hita pa`gu man-ma-entrega pot proteksion tanu` Chamorro. Este na puntu sumen presisu kon sinsiyu na respetu gi man-mofona.

Ti mahasñgon

Estaba un` primuhu gi hiyuñg poker na esta fumofofu pot dispetdision monedan familia. Era estaba i asaguaña na sige humugandu.

Hu ñañgun na u adiñgan i dos pot obligasion familia.

“Hagu un` disidi manu gi dos, i salape`mu pat asaguamu”.

Ensegidas ha oppeyu` na i asaguaña.

“Ke pues po`lu ya hu petsige bisioña dispetdisiu”. Ilegña na ti hu keke ayudague`. Hu lapbla tatte na gaige i asuntu gi patman kanaiña.

***

Mamaisen amiguhu haf` na huntan tanu` makondudukta giya Kagman. Hu esplika na pot Attikulu Dose. Ha yeñgyoñg iluña sa` kulan mampos te`ug i asuntu.

“Hamyu la`mon fan apatte maseha haf` na tanu` sineda` miyu. Lau chatmiyu umestotoba i naftanhu sa` guaha hu hafot halom”. Ai na grasia.

***

Sige fumofu i malañgu pot kada ratu matulaika amotña pot mas ke un` mes na tiempu. Hu atrebi fumaisen kau guaha `nai ha konbetsasiune medikuña. Ilegña, “Hungan, lau guiya fuminu` E-Eñglis mientras guahu finu` Chamorro. Doble babichi!’” Gupot! ***

Gaige gi un` banda amiguhu Magoo sige ha lapblague` na taya` ha huhuñgog programan otru siha kandidatu para mayot Saipan.

“A`mauleg este mage a`guaha progrman a`galagu. A`dulalag este mage, a`dulalag este guatu, a`kone este mage, a`presu pues a`punu` ya ha yute` este guatu”. Ai chalegña `nai hu ñañgon na u dispasiu sa` ti tanu` ga`ga` Saipan.

***

Masuette amiguhu haggan betde. Gigon ha papa i kara sanpapa` hu sohgue un` pusuelon haga` ya hu gimen. Nina` matman pot mattu gi yahu katnen haggan. Solu na ga`ga siña hu gimen haga`ña sin ditension. Kontodu mata` mantika yan sensin libianu hu ñgañgas piot ya guaha dididi` asiga yan done` sali. Paire flitadaña!

***

Hombre `an guahu muna` gasgas kachu`, yellow fin pat mahimahi (dofin), monhayan hu kanu` patteghu antes de madibanan sashimi para i lamasa. Mañge` diberas fresku na kineni` guihan gi todu atmos bandan rubentason.

***

Antes na fandañgun Chamorro, mauleg un` fa` amigo i kusuneru. Gigon ha hatsa finatinasña nina`e hau dididi` para un` chage. Dispues de dies putahe na chage, kasse esta siña humihot hau gi kemon `sino alulaye para i gima` ya un` deskansaye sa` esta degula hau.

***

Man-mauleg na kusuneru hu fagcha`e antes. Dos gi halom siha patlinuhu. Paire yan paupau finatinas niha todu klasen putahen neñkanu` natibu. Taya parehuña mañge` bistek babue ni mana` loglug estake te`ug yan appan. Piot `nai maplanta tininon tinala` guihan yan katne ni malumos gi finadeni dinanche yan titiyas mai`es dispues mana` okakahat asnentukon atulai. Po`lu ya dispues de tafan a`ali`e yan mediku. Dios mihu!