Chinatsaga

Gi hilu` felis na tinituhun este na sakan ha totpe hit tinahuñg fondu gi kaha. Masusesede! Puede guaha adelantu sin ditension pot nesessidat publiku.

Gi mismu tiempu guaha anunsiu na esta i ekonomia muna`lu tatte. Kase siña nahuñg $16 Miyon pesus na biahe. Ti umafagcha` i primet yan segundu anunsiu. Manu gi dos?

Casino

Animu guinifen para ta adelanta monedan iya Marianas. Uttimoña tasedi dikiki` na industrian casino. Ripot gaseta anog na ti gof guiya kinalamten este na bisnis guine. Ti ha materialisague` i hagas maguife na kopble.

Gi enteru iya America, guaha 43 na bisnis casino punta pot punta. Lastima sa` i ma-ekspepekta na salape` ti humalum. Pues kulan adotna pot bonitu fasilidatña. Sin estudiu para manu hit?

Pa`gu, kontodu mamopble man-mafafaisen para u yute` kepblen niha gi makinan casino. Kuantu gi tautau-ta mangai kepble para umayute` ñaihon gi makina?

`Nai taigue sufisiente numeron tautau ni man-lodu` suetdun niha taimanu la`la` i bisnis casino? Lastima i ta-upus i mapagahes pot casino ya kada man-a`atan hit todu manotohge gi hilu` tanu`! Dios mihu na linache i kuentas guine na biahe.

Gayera

Humalum i federat ya hana` para gayeran nabaha giya Guam yan Marianas. Nanalau na manlinistu man-esalau “kuttura” i gayeran nabaha. Kuttura lokue` usun machete gi fina` estrakada?

Desde ñgai`an kuttura para tana` apunu` dos gayu yan se`si`? Guaha `nai tali`e mafanana`an “balentia” lau ti usun nabaha. Dispues, hagas finagpu` misa `nai takokone` pinegsai siha para tafatta haf` na rasan manog tapopogsai.

Katma

Bes enkuando, hagacha`yu` silensiu oriyahu piot gi lemlem tautau. Finagpu` ha`ane!

Hu tane`yu` gi Internet manaitai mas gaseta. Mauleg na offisiu pot ha sediyu` gumuadog asuntu siha para klaru yan asegurau na inanalisan infotmasion. Gi Internet lokue` guaha email (modun katta) para bai rikonose famaguon-hu siha ni mangaige chagu`.

Gi este na biahe mafattu hinassog-hu setbisiu siha ni ta resisibe ginen gobietnamentun iya Marianas. Kuestion: suffisiente kualidat setbisiu pat sessu mana` sugu` gi papa` atuf gaguria?

Bes enkuando bai akanteha i asuntu pot interes tautau-ta siha gi señgsuñg. Fuetsau debi u guaha kabales yan kualidat na setbisiu sa` ta apapase ginen tax pagamiento-ta.

Liñguahe

Un` bisñietu sessu ha konbetsasiune-yu` gi finu` Chamorro. Maseha e`ekklau finu` Chamorruña lau estaya animu kumetuñgu` naturat na hila`ña.

Ha promesayu` na un` dia para u fañge` lokue` finu` Chamorro. Era, sessu mafanu`e gi eskuela ni tinige`hu gi gaseta ni mangachoñgña. La anaku` na karera estake para u fañge` fotmat i lahihu.

Enfin, este i mañge` mas fotmat ke regulat na konbetsasion. Chage kumetuge` un` sentensia sa` siempre un` li`e na hahagu ha` namaisa. Na lamegai musgomu` para usu-mu.

Asuntu

Hu e`ekuñgug finu` otdinariu na tautau-ta pot gaige giya siha i dichu pinadese gi kinalamten halum guma` familia. Siha i man-chatsaga ya klaru masañgan sentimentun niha sin ditension.

I mas oppan na keha i suetdun popble gi kase 15-mit na empleau guine pa`gu. Makat na kontrariu i mankadideñg i familia diariamente para umana` nahuñge nesessidat niha. Inipus chagu` esta i presiun nesessidat siha kontra baratun suetdun popble.

Gi mismu tiempu dudayu` kau guaha seriosu na asuntun mantension familia pot guaha food stamps. Enfin, kase gaige gi otru asuntu siha tat kumu trahe, doga, yan otru siha nesessidat familia.

Mansuetten famaguon sa` guaha amotsan oga`an yan talo`ane gi eskuela. Ai gi tiempun mame sali ham de man-ñgaha` duranten recess. Namase` i drinking fountain gi entalu` klase.

Para i man-pinepblen mame mit grasias na sattun mañainan mame gi finana`guen relihion Katoliku. Grasias na manfelis todu gi halum ti deskribiyun na mattirun pinepble.

Tat aplacha` na cho`chu` ti hu chogue pot kinanu` familia. Hu pañut lago`hu gi halum luñu` na sisonyan chinatsaga. Mansuette famaguonta sa` ti mapadese ayu na sapet.

Silensiu

Sessu gi taftaf oga`an `sino lemlem tautau silensiu i tanu`. Kase pot tutuhun yan finagpu` ha`ane.

Lau gi hinassog-hu guaha mas muna` fan mamatkilu tautau-ta siha: pinadese. Mayotmente gi empleau suetdun popble ma-ususune diariamente. Makat na kontrariu kontra nesessidat familia!

Gai minaput na asuntu gi halum guma` familia i sessu tinetpe tinahuñg para disiente na mantension. Lau fana`an guiya este mafanana`an “`kanamia”. De dios!

Guaha `nai in` faisen i mansabiun I Deni` haf` planun niha umadelanta kualidat linala` tautau i señgsuñg siha? Haf` ineppen niha fuera de manlolosus gi mañgun kareta?

I chinatsaga gaige na haluñu` mampus kinalamten familia sin kampu para u fañgalamten disiente gi ha`ane.

Ti bai famaisen satbasion gi halum mansabiu. Tatnai sisida para bai malapbla na ti bisnes-hu. Lau todus hit manman-apapase tax, no?

Ina`ayuda

Namagof hinanau tautau-ta piot kustumbren ina`ayuda. Komplimentu gi sensian yine`ase` ginen relihionta. Este i dos bittot sumede hit muna` felis ha`anen unu yan todu. Fitme yan dignu na kustumbren mandikiki` na petlas.