Planun Iran Linau

`Nos kuantus siuda giya Japon madandan diariu un` kantan famaguon dispues de talo`ane. I kanta señat finattun pueñge yan preparasion siakassu mattu i mananañga na linau.

Dañkulu na destrosiu u fattu `an magahet na linau i tanu`. Megai u fan dimalas yan dinisplanta `an dinanche Japon ni ma-nanañga na ira. Gi halum Tokyo yan bisinu siha na siuda guaha kase 37 miyon na tautau.

Huli`e Los Angeles fuetsan dañkulu na linau. Tat tiha yeñgyuñg kontodu manadan ma`pe padet yan bintanan espehus. Hu falague entalu` potta estake pumara i fette na siso` amaka. Piligru na ira.

—

Dinimalas: Kase bente na estudiante man-matai gi un` estadu America gi mapus na semana pot manmapaki. Era, humuyuñg un` estudiante yan pakiña ya ha fuegu karkuet direksion halum eskuela.

Ha atisa dibaten areglun malisensian paki gi tautau siha. Guaha ti manfitme pot probleman chathinemlu` kabesa. `Nai ti fitme pues problema `nai mattu gi disision usun atmas paki. Presisu fitme na inadahe guine na asuntu pot unu yan todu.

—

Guafe: I kimasson gi halum estadun iya California ha displanta mas ke mit na familia. Megai man-dinestrosia fanliheñg niha. Pues mapega fina` tento` gi kantun chalan para temporariu na fanliheñg familia. Puede u chadeg ma-aregla tatte ha`anen niha.

—

Suetdu: Guine, hu akanteha kinalamten tropan petlas Marianas. Un` pettinente na asuntu: Haf` na planu guaha para umahatsa suetdun 15-mit na empleau ni gumagana suetdun popble pa`gu?

Na ti guaha promesa para in` adelanta kualidat linala` familia? Haf` i propiu ineppe guine na asuntu? Na ti magahet na gaige gi mahatsan suetdun popble? Haf` na ditension guaha?

—

Animu: Mauleg sa` homlu` kinalamten dikiki` na industrian bisita ni muna` guaha cho`chu` yan fondu para nesessidat-ta siha guine. Puede ha sustenegue` este na kinalamten. Makat `an maribaha ekonomian i tanu`. Ha afuetsas menus cho`chu` kontodu maribahan suetdu!

—

Tapun: Un` tiempu gi inai iya San Roque sige familia gi chepchup unai mana` liliku` kanai niha. Huli`e dispues mahalan amsun (mas dikiki` na tapun).

Ti siña hu komprende haf` usuña un` pidasitun tapun lau makatdu yan mai`es. Hombre, payun-yu` totchen trosu ke katdu. Lau sumen mañge` na fina` katdu para sopas yan hinegsa`.

Dispues, mafattu gi hinasoghu fina`pus natibu gi bandan mantension familia `nai ha apprubecha haf` gaige gi tanu` yan tasi. Gi dikiki` na komunidan isla `nai guaha este siha na neñkanu`. Mantension pot katsun satbasion.

Enkatdittun pipinu sumen mañge` na abriganas. Kumu paire mesklamu libianu un` bende gi tendan dikiki` `sino un` ma-ayudaye taimanu para un` metkau Guahan. Malofan este na attikulu piot gi preparasion gupot fiestan patron i señgsuñg.

Katdun amsun fumanu`e-yu` abilidat natibu bokan satbasion gi luñu` pinepble. Ha esgaihon halum sensian himiddi `nai hu aksepta umusune haf` guaha.

—

Tunada: Teñga gi oran deskansoghu huhuñgug un` sumen na`mahalañg na tunada. Un` pueñge hu tatiye mientras hu rasguegueo gitala-hu.

Kontodu kantan eskuela ni man-mafana`gue hit antes milalag halum. Manbonitu na sunidu kontodu palabra. Na`mahalañg pot patte gi tunadan `nai man-famaguon hit.

Un` kanta ni sessu huhuñgug: Bendise I Chalan Iya Hame. Ala kuenta kantan despedida pot para u hanau i prohimu mumarineru ya tai planu bumirague` tatte. Enfin, bonitu pegaña ni palabra siha pot “chalan iya hame”.

—

Minalañgu: Hu soda un` hobensita gi hospitat ha nanañga i mediku. Hu repara na ni gaputulu i prohima. Hu suspecha na probleman kanset.

Hu gu`ut kanaiña ya manayuyot ham. Hasañgane-yu` dispues na esta tiempu ha nanañga. Hu promesa i patgon na bai hahassugue` diariu gi tinayuyot-hu. Makat na tiru ya taya` nina` siñahu ke tinayuyot.

Chinatsaga: Mampus hana` poduñg esperansag-hu `nai malagnus gi gaseta dibin halum gobietno-ta mismu tat kumu $32 miyon pesus na dibin kandet CHC gi CUC.

Masusesede. Rinikohen fondu kada sakan depende gi manu na patte `nai mangaige hit. Enfin, namagof i sattun na inadahe gi disposision dididi` na kepbleta.

Liñguahe: Hu e`ekuñgug dos bisnietu gi grasiosu na dibaten niha pot leksion. Lamayot patte gi atgumentun dinanche. Lau gi halum rimulinu enteru finu` Eñglis `nai madiskute i asuntu siha.

Huli`e na ti uma-usa hila` niha gi karera. Uttimoña fuetsau mana` guaha leksion kada gradu gi sisteman edukasion para u fan mafana`gue ni liñguahen niha. Na` triste i abandonau na finana`guen liñguahe ni debi umatutuhun gi halum guma` familia.

Kareran para umafatta na man-Chamorro siha lau ni liñguahe taigue gi hila` niha.

—

Rimulinu: Ilegña amiguhu Magu na mampus ti asegurau monedan iya Marianas. Mauleg ta komprende na tai mina iya Marianas ni siña sumustene felis nesessidatña diariamente.

Man-oppe gi Magu gi un` banda, “Na` para ha` manman gasta ni ti presisu sa` mannahuñg hit”. Dinanche!

Tana`e animu sumustene i dikiki` na industrian turista. Este `nai tasosoda` katsun nesessidat-ta siha guine.