Foggun Guafe

Deste tatalu` pueñge poduñg sinparat na uchan. Hu apprubecha finattoña `nai ha fuegu i atuf sin sanhiyuñg ni muna` hasso-yu` ni hagas kusinan mame antes gi Lali Fo`.

Tai malefaghu ni feggun guafe ni diariu inna` sesetbe man-na`lagu. Kada tres dias man-ñgayu` ham. Achog u`uchan debi bai`n rikohiye hayu `sino man-ñgaha` ham gi oran sentada.

Gai minaput muna-appan hinegsa` gi feggun hayu. Lau dispues de praktiku` hau, paire. Kase dos satten huna` dogñgus estake hu danche mana apaña gi feggun guafe.

Ayu na foggun `nai umeyag-yu` muna`lagu todu klasen putahe. Enfin, ha kreansa ham si nanan mame man-na`lagu yan todu che`chu guma`. Mit grasias!

—

Isla: Gi 1974 mattuyu` dos isla giya Marshalls mas ke 400 miyas ginen sentrun gobietnu (Majuro).

`Nos kuantus familia mañasaga guihe. Ayu `nai madepende siha i los probes i guinahan i tanu` yan tasi.

I gima` niha puru higai. Man-sattun gi ina`ayudan nesessidat komunida. Ayu `nai anog kustumbren tautau isla. Mauleg hinanau niha diariamente gi dikiki` na tanu` niha.

Guine lokue` na isla `nai hu chage tamales ginen asientun niyog. Ti fahoñgge lau hu komprende haf` i tautau siña ha chogue pot satbasioña. Mañge` na tamales yan tininun guihan. Gi la pupueñge mandaña` man-estoria yan mañganta esta i oran deskansu.

Hu hutu` guafaghu gi kantun tasi. Tula noche umega`yu` pution siha gi lañget. Gi chagchag oga`an ha pañgunyu` i paupau na linaloglug kafe. Man-amotsa dispues mapetsige che`chu` niha. Man-dichosu pot abundansia mantension niha diariu ginen i tanu` yan tasi.

—

Tiau: I maribahan ekonomia humala papa` fondu gi kahan iya Marianas. Fuetsau, mapatten tiau para u fan pinalala`e todu mas man-impottante na depattamentun yan ahensian gobietnu. I kinalamten fondu kulan siso` amaka, kada un`li`e, ti un` li`e. Dios mihu!

—

Klima: Dispues de todu animu ma-estudiaye tinilaikan klima uttimoña ma-abandona i asuntu gi ma`pus na semana. Era, kada manalag hiyuñg gi tasi gagaige ha` na ha falalague i inai. Taya` tinilaika.

I fumafama este na asuntu ni un` estudiu guaha para umakatsu finu` niha. Haf` `ste na espantun papulasion i tanu na siempre mas bula ke presisu, lau mas menus.

Unu ha` na tinilaika hu hassu ni gaige gi Santa Biblia: `nai hana` uchan i Saina 40 dias ya tat ti linimus. Hombre este hana` para pot destrosiu mampus gi tautau siha. Kontodu guihan tuninus matmus!

—

Sin Guma`: Kanaha` miyon na tautau mantai gima` giya California. Maseha manu na kantun chalan mahutu` guafag niha mandeskansa.

Problema para i los probes pot hasan fasilidat bañu yan komun. Este na problema muna` sumen mutuñg estadun California.

I mantai fanliheñg finañagun `nos kuantus problema tat kumu man-malañgu kabesan niha, usun amot binenu, yan mantai che`chu`. Didog na asuntu guihe na estadu.

—

Otru Asuntu: Matutuhun diniskuten estau politika giya Guahan gi halum mañeluta Chamoru. Homlu` na pinetsige gi inebaluan haf` propiu na sisteman gobietnamentu para siha.

Direchun mañeluta pot ti man-mana`e appottunidat dumisidi futtunan niha politika. Huñgan bendidu Guahan deste 1898. Lau madispone sin konsentimientun natibu.

Guaha lokue` mumente dinaña` Guahan yan Marianas. Gai ginatdun na asuntu pot esta Marianas kabales ha establesegue` deste 1978. Gi halum este lamegai na asuntu `nai siempre ti umafagcha` dinisehan tautau ginen i dos lugat.

Gi uttimun siñkuenta siha na sakan klaru iya Guahan ha ñega ginagau dinana`. Chagu` na asuntu pa`gu ni maliñgu gi taduñg tasi gi lichan iya Guahan (Marianas Trench).

—

Tinilaika: Hu upus un` amiguhu gi tenda pot mampus tinilaika hechuraña ni chenot daibites. Taigue i hagas potput pechoña yan lodu` koduña. Esta nina` masogsug i amiguhu.

Diberas ti hoñgiyun fuetsau na tinilaika gi tautau ni nina`ye daibites. Lau kumu hita mismu umatetuye inadahe ti u sala` i chenot.

Puede un` dia u guaha mas adelantun ma-amten este na chenot para benefisiun i man-nina`ye.

—

Ayudu: Esta mas ke bente añus deste ke daibites-yu`. Lau hu estudiaye haf` sessu este na chenot.

Huli`e na megai lokue chat-infotmasion haf` este na chinatsaga. Enteru usun asukat mana para petmanente. Lache!

Presisu ta komprende na i titanus tautau taya` siña ha sede solu asukat. Poresu na hu gigimen unu na pusuelun kafe `an oga`an ni mana`ye un` dañkulu na kichalan asukat (table spoon) para tutuhonhu. Magahet na hana` klaru hinasoghu antes de bai petsige che`chu` guma`.

—

Gramaderu: Hu huñgug na sige hinisgan offisiales siha guine ni polisian Horiguchi`. Ti hu tuñgu` haf` sessu i asuntu. Lau biñgbiñg na pot gastun kantida na salape kontra dikiki` na moneda gi sakan.

Magahet na este na modun gastu sumen keha. Yangin suetdun lehislatura un` gagana pa`gu haf` taimanu na mas dañkulu un` gagasta publikamente?

Haye na kompania kumakatsu gastomu? Unu yan unu, dos. Ti maput na kuentas!