Finapus Ha`ane

Bes enkuando, hu pega talañgahu gi tanu` umekuñgug haf` guaha gi oriyata. `An taya` sustansiau `sino piligrosu na asuntu hu tutuhun umatan i gaseta siha gi Internet.

Hu taitai pot maribahan ekonomia ni rumibaha lokue` $19 miyon na fondun ginen kahan iya Marianas. Indikasion na taya` nuebu na hinalum bisnis. Mafattu tiempun kayada `nai dumeskansa gi fina` yanu.

Fuetsau debi u guaha inadahe gi dididi` na fundo-ta. Mauleg maprebeniye sisteman hinemlu` yan edukasion pot este i dos mas impottante ni megai ha embrasa na tautau.

Komprendiyun i guaha `nai lagse` `sino muñeru hinalum fondu gi hinalum Septembre, tutuhun nuebu na sakan moneda (fiscal year).

Planu
Lokue`, hu ekuñgug ñaihon haf` na planu guaha para uma-adelanta kinalamten ekonomian i tanu`. Ansianu na diniseha pot no u gacha` hit induktu. Ti namannman na sessu i Boysis manlosus gi mañgun kareta.

Dispues de hu mente dos-tres biahe, ilegña si Magu na baina` pasensiayu` sa` machochogue i planu ya siempre umapresenta publikamente. Hu abisa na umana` lachadeg antes de u lachaiyu` i edut atiluñg fuma` `anpoduñg rusketi.

Kanta
Estaba gi fihonhu i lahihu bisnietu sige ha rasgueo dandaña ukulele. Sige kumanta man-bonitu na tunada. Hu ekuñgug ñaihon dispues humame.

Hu tutuhun fumanague man-lamaput siha na yaben gitala. Hineñgañg haf` tiniñgo`hu dispues `nai hu sañgane na hagas danderu si bihuña. Hu pasensiaye pot dañkulu interesña manuñgu`.

Sustansian kanta ginen sentimentu yan linala` tautau maseha manu. Gaige i asuntu gi bonitu na sunidu ni ta kakanta dispues.

Etupag
Estaba un` amku` ume`etupag gi tasin Lali Fo`. Huli`e na esta lamegai kinine`ña ni ha pega gi alan guihan. Achog kumuentus ti hinalulula. `An ha katnadaye i haguet, dispuasiu yan seguru.

Un` okasion `nai hu tuñgu` dispues haf` offisioña deste finagpu` gera. Mauleg na katpenteru ya huli`e macho`chu`. Chadeg gi usun chachag yan ramentan katpenteria. Hana`eyu` kelaguenhu` i amku` dispues `nai umadespidi ham.

Dos benefisiu umetupag: guaha tiempu man-hassu asuntu siha yan umatan haf masusede. Un` analisa i asuntu gi mas katma na attura. Agradesiyun.

Bisita
Potlumenus un` biahe gi sakan hu bisita yan rikonosen ñaihon-yu` gi karerahu. Hu usune meditasion `nai hu rikonose linala` espirituat. Sumen presisu na añkla gi ha`anita.

Ti maput: po`lu na humanau hau para un` gatbun hatdin gi mapagahes. Siempre un` soda` presente i Saina `nai guaha kampu para in` adiñgan gi hechuran tinayuyotmu.

Este na eksisiu ha rinueba sensian esperansa gi ha`anita ya mas hana`e hit ansia gi bandan inadahe gi halum taduñg na kañadan linala`. Todu i tiempu gaige fitme añklan ha`animu gi Saina.

Iran Pagyu
Kase in` li`e destrosiun pagyu giya Bahamas gi mapus na semana. Tat tiha destrosia gi gima` tautau siha. Mauleg sa` guaha ayudu ginen hiyuñg. Lau tinaka` tiempu estake u na`lu tatte otdinariu na linala` i los probes.

Guaha man-dimalas guihe na mattiru. Inipus na uchan poduñg pot kanaha` 38 oras sumaga ayu na pagyu gi hilu` iya Bahamas. Dispues `nai sige hulu` entalu Florida yan iya Carolinas. Mauleg na destrosiu fumatoigue ginen mañglu` yan uchan.

Linau
Gaige gaseta lokue` na linau giya Indonesia kontodu bisinuña siha. Ti humalum destrosiau na napu. Lau man-sinapet `nos kuantus familia pot manyinamag gima` niha. Guaha `nai ta siente linau ya puede ti u fatoigue hit i dañkulu.

I asuntu ni umestototba-yu` i gaige filan petlas Marianas gi mas taduñg na tasi. Guaha na patte esta 36 miyas papa`. Gaige i mas taduñg gi lichan iya Guahan. Puede ti patte este siha na mantaduñg tasi gi fina` linau.

Dibina
Hu tuñgu` na guaha mina gi oriyan tasin Marianas. Haf` ennau siha na mina ti klaru. Lau kontra i masguaguan na klasen lulug. Yangin ha interes iya China este na mina haye para u rinikohe apas fondu, Marianas pat i federat? Un` asuntu ni kulan ta yotte gi un` banda lau debi ta prekura para `an u fattu makusechan mina.

Gai buruka i asuntu `an ilegta iyota pot rason na ni unu gi estadu `sino otru territory dueñu ni mina gi oriyan niha. Humalum dispues `nos kuantos ahensian federat ya siha dumispone. Mauleg para ta upus un` asuntu `nai gaige riku` na mina siha?

Masusede este giya Hawaii `nai humalum un` kompania mañgusecha fina` mina. I federat dumispone deste lisensia yan rinikohen fondu. Mauleg ta repasa i asuntu pot interes Marianas. Sopbla justifikasion na debi hita ta dispone minan tano`ta.

Adelantu
Gi halum chinatsaga man-mamatkilu tautau-ta siha kulan man-ekuñgug haf` guaha na planu pot adelantun monedan familia ginen manma-elihe. Kulan man-udu i boysis.

Kase guaha 15-mit na empleau man-mamatmus gi papa` suetdun popble ni inipus tagpapa`. Gi mismu tiempu taya` alibiu fuera de u fanalag hilu` gi hegsu` I Deni` man-ñgaha` ausiliu.

Yangin guaha planun miyu mauleg in` daña`e tautau-ta umesplika haf` gaige gi hinassun miyu.