Finattun Ha`ane

Guaha `nai ha gacha`yu` silensiu ha`ani-hu. Hu ekuñgug ñaihon kontodu tinayuyot pot katma. Dispues `nai hu rikonose gaseta siha gi Internet.

Finattun silensiu guaha `nai nachatsaga. Pot ihemplo: Mafattu gi hinassota famaguonta ni mangaige chagu` lugat pot edukasion. Ta agañg dispues para ta asegura na todu mauleg.

I silensiu sumede hit sumeha un` ratu para ta repara todu asuntu. Manu `nai kulan guaha finatsu un` limienda piot gi relasion-mu yan che`lu `sino haye na kilisyanu. Tatnai lache amtau na inafamauleg antes de minachum atdau.

Este lokue` sumede espiritun man-mofona bisitasion gi oran deskansu. Señat na ha nesessita i kilisyanu orasion. Tatnai mahñau tinayuyothu guine na patte. Mauleg `in hahassu siha gi tinayuyot miyu.

Pinadese
Gi mismu tiempu mafattu gi hinassog-hu pinadesen kase 15-mit na empleau ni gumagana suetdun popble.

Kuatdiba ha`anen niha man-ensinahyau para umana nahuñge nesessidat familia deste neñkanu` yan otru siha manpresisu na asuntu.

Makat na mattiru ya hu komprende kada pahina guine na lepblu pot hagas hu taitai gi hinibenhu guihe na tiempu `nai sumen popble i tanu`.

Inapagat
Hu sen agradese antes estoria `sino inapagat mañainata ni mafattu gi hechuran motmut pinasensia. Hana` magem sentimentota `nai ha sede hit umekuñgug yan umosge finu` saina.

Ginen este `nai un` li`e piniten saina gi patgon. `Nai sumahñge hau `nai mas anog na mansattun mañainamu gi todu hinanau-mu. Namagof `nai todu felis kareramu.

Lau ayu-yu` kumokone` na finu` saina i pasensia yan suabe na inapagat `nai ha adiñganeyu kumu patgon. Agradesiyun na inapagat ni muna magem korasonta ya hita mismu tachage pumetsige haf` dinanche kumu famaguon.

Ekuñgug
`An un` tuñgu` umekuñgug pues libianu un` komprende asuntu ni un` diskukute yan prohimumu. Guaha respetu gi amtau na fina` konbetsasion. Ni achog ti umafagcha` hinassun miyu lau respetau konbetsasion miyu.

I bintahan chatparehu hinassu i nina`e hau kampu lumi`e haf`i difirensia. Gi hilu` este `nai un` ta`lun umanalisa i asuntu pot mas kinemprende maseha ti umakonfotma hamyu na dos. Dispues, tihu hassu ma-entrega na i hinassoghu i solu dinanche.

Gi hilu` pinasensia `nai tasoda` kabales haf` i asuntu. Hombre `an kahulu` i atdau `an oga`an siempre umachum gi sanlagu: ha`ane yan pueñge.

Asuntu
I maribahan ekonomia kontodu fondu gi kaha ha utut sin ditension. Gai atburotu pot menus fondu para i nesessidatta siha guine.

`An mas didog yan seriosu este na chinatsaga fuetsau siempre ma-utut setbisiu yan oran empleau. Makat pot mangai familia i los probes `nai kontodu obligasion tat kumu apas guma`, neñkanu`, kareta yan otru siha nesessidat mañasaunau guine na kuentas.

Adelantu gaige gi homlu` na kinalamten bisnis guine–ekonomia. I fondu ginen inapasen niha kontribusion i magagasta para nesessidat setbisiu siha guine. Hafa planun miyu pot adelantun monedan familia? Siña `in daña`e i publiku guine na puntu?

Un` Amku`
Gigon man-mata `an oga`an muna` loglug kafe dispues matachoñg man-atan ñaihon antes de una` fañochu i pinegsai siha. Ha rikonose yan regan ñaihon i hatdin.

`An mattuyu` manbisita, sige ham dispues kumonbetsasion pot finaposña i amku` gi tiempon Japones.

Mina` guiya hu fa` amigu pot sen tai atburotu yan humiddi hinanauña diariamente. Manu i guaha ha apprubecha.

Ha estoriaye-yu` haf` sessu offisioña `nai hohoben-gue`. Megaiña besis na che`chu` gualu` ha usune pot man-lancheru mañainaña. Bes enkuando ha dalalag i amku` tumalaya `sino tekin. “Hasan cho`chu` moseria gi tiempun Japones mina` pinat gualu` yan tasi i natibu `nai ma-usune mantension familia”, he esplika i amku`. “Enfin, man-felis hinanau `nai in` usune haf` guaha”.

“Magahet na sin ditension todu man-eyag man-mananum gi gualu` `sino fina` hatdin gi tatten guma`”, segun i amku`. “Todu para un` apprubecha debi hagu mismu un` usune entalu` mananum `sino mamogsai”. Pa`gu `an para cheflan lodu` yan yeñgyuñg addeñg pues kontodu neñkanu` gi lamasan sena appenas.

I un` asuntu ni umahnanau tihu komprende i sineyu` tinanum `aggun haya `nai diariu hinegsa` maplalanta gi lamasa. Mañgge` gualu` fa`e` `sino pugas? Un` lanchu solu `nai husoda` tinanum fa`e`. Ti umaya i machoneg na pinetsige gi gualu` yan usun familia diariu gi hechuran hinegsa`.

Gineftau
Dispues de umatuñgu` ham pot mas ke dies añus ha faisenyu` i amiguhu haf` na taya` `nai hu kopbla salape` tautau siha ni hu ayuda gi asuntun niha deste papet tanu` yan dibusion propiadat familia.

Hu oppe na taigue giya guahu mañgopbla prohimu-hu pot ayudu-hu. Gaige gi hinasoghu futtunan famaguonhu. Puede guaha lokue` parehu ayudu para haye na patgonhu ginacha` chatsaga ha`aniña. Poresu na geftauyu` man-ayuda gi maseha haye na kilisyanu munessesita ausiliu.

Megai gi ayudu-hu para i mas mannamase` na tautauta mina` tihu lañgag tumasa setbisioghu nu siha. Pot inañgoghu na guahu mafalague gi oran nesessidat niha. Ti listuyu` umaminasa ayu na inañgoghu.

Dispues manhoñgeyu` na i Saina sen man-apase. Guaha ha` para guahu ginen i sumen geftau na kanaiña. Adahe na un` malefa ni tinayuyotmu diariu!