Maribahan Tiempu

Bes enkuando, mañguentus hit pot ekonomia. Atan halum guma` familia haf` kinalamteña. Enague` dichu i ekonomian tanu`! Kabales na espehus!

Kuestion: haf` fuetsan monedan familia gi apas nesessidat diariamente? Ñahuñg para apas guma, neñkanu`, magagu, kareta yan otru siha presisun familia? Na ti 15-mit na empleau gumagana suetdun popble pa`gu?

Anog na bahu kinalamten ekonomiata hombre megai empleau rumesisibe baratu na suetdun popble. Inisague mas este gi hiniyuñg Japones `nai madiñgu i tanu` guine gi alacha. Ha lofan todu fiñkasña ya ha diñgu i tanu`. Taya` humuchum ayu na hoyu i ha diñgu gi santatte!

Gi pa`gu kulan man-e`enañga hit haye otru inbetsionistas (investors) para u fan halum. Gi uttimu biahe `nai huli`e pasaheru manunug gi plasan batkun aire puru Chinu manalag halum. Makikilili` paketin niha soba para umakanu` gi hotel. Ti namagof este na tropan bisita! Miskinu!

* * *

Homlu`: Mauleg na ekonomia fumañagu mas fiñkas yan cho`chu` `nai humalum tiempun abundansia. Nina` bali monedan familia ni sinapotta diariamente ginen bandan cho`chu` gi bisnis.

`An maribaha, pues kontodu i dos asuntu acha-tumuñug. Tinatiye ni didog na chinatsaga enteru petlas iya Marianas. Menus fondun familia sa` appenas cho`chu` `nai chatsaga i tanu`. Seriosu na chanda gi todu manera. Haf` lini`e miyu ni ekonomia pa`gu? Homlu`?

Fuetsan monedan familia i mas chadeg para un` li`e kinlamten ekonomian i tanu`. `An mamadedese familia pues ti homlu` na ekonomian enteru petlas guine. Estague` obligasion man-sabiun hegsu` I Deni`! Areglu!

Oppan: Gi mismu tiempu mas `agañg palabran “utut” gi katkuet offisinan gobietnu pot menus aduana na sakan. Maseha ti marepara lau guiya este na pinadesi mafanana`an “ha`ilas”. Tat tiha bogbug huyuñg kontodu pine`lun apusientu!

Makat na sapet para maseha haye na familia miserapble na pinepble gi ha`anen niha. Ti este na estau dinisehan niha soluke mattu fuetsau pot diskuidun tropan hegsu` I Deni`. Guaha kampu para adelantu guine na patte?

Magofyu` sa` ni unabes `nai inna` chatsaga prohimun mame gi halum pinepble para bai`n fan libianu. In` siñgun haf` i guaha. `An taya` pues inague` guinahan mame, taya`! Magahet na fitme na finana`guen espirituat umataha todu appottunidat intension tailaye. Mit grasias!
 
* * *

Remediu: I man-mehnalum debi uma-atan haf` chachalaña mana` homlu` tatte i ekonomian i tanu`. Sin este, kase man-ñgaha` hit diariu man-afaisen kau guaha sopblante para fina` katdun atuli gi birada.

Inatisa pinepblen i tanu` `nai humuyuñg Japones yan fiñkasña guine gi alacha. Guaha `nai in` ñgelu` manu `nai gaige chinatsaga? Haf` umatisa man-hanau gotpe ginen Marianas?

Hiniñgog-hu na guaha gi man-ma`gasta sumañgane na achog u fan hanau siña hit sin siha! Diberas? Ni kara` deñgdeñg ti siña ta bende ya siña hit giya hita mismu?

Ni gualu` yan peska trabiha modun antigu na eskalera `nai mangaige hit. Ni ti kori` bentata guine gi dos patte. Este nina` siñata i tai fuetsa na modun ekonomia?

Mientras ke tita estudiadiaye futtunata gi haf` guinefita kase este chita manu `nai mangaige hit pa`gu. Makat para ta banidosuye mantaya`ta. Lastima i appottunidat adelantu gi hilu` kustumbren imbedia ni inipus mamta gi halum tautauta. Siña mohon tana` mansun ñaihon este na kustumbre?

* * *

Si Nana: Gi ma`pus na Dameñgo selebrasion man-nana `nai tana`e sinsiyu na agradesimientu ayu na palao`an i mumattetgue` pot hita gi halum parehu plaset ginefsaga yan chinatsaga.

Mesñgun gi halum todu mattiru, abundansia yan ha`ilas, `nai ha esgaihon i familia pasu pot pasu. Guahu lokue` mit grasias para si nanahu pot todu bendisioña gi halum makat na katsadan linala`. Si Yuus Maase`!

Gueku: Para todu i promesa pot adelantun kualidat linala` familia namanman na guaha 15-mit na empleau rumesisibe baratu na suetdun popble. Ti diskuidu este na chinatsaga lau un` asuntu ni ma-choneg gi un` banda kulan chenut lasarinu.

Haf` kinemprenden miyu propiu ineppe para in` adelanta suetdun popble ni maluñu` gi manadan empleau pa`gu?

Na ti magahet na gaige este na pisu gi mauleg na ekonomia? Mauleg ekonomian i petlas Marianas pa`gu? `An chatsaga, haf` bidan mimiyu para in` adelanta ennau na pisu fuera de “not yet, already!”

Obligasion miyu para in` alulaye umestudia i asuntu sin ditension. Sinahguan monedan familia dumetetmimina kualidat linala`. Taya` otru fuera ke este! Haf` mohon planun miyu gi mas impottante na asuntun linahyan?

Magahet na ti in` sesiente sapet na pinadesen popble ni in` fafana` diariamente gi tautau ni in` represesenta? Finu` Magoo, “EVERbody home?”

Kau esta pa`gu man-mamaigu` hamyu gi tatten mañgu?

Onrun Natibu: Mana` guaha lugat gi hagas kiosku para umafan ma-onra i man-mofo`na siha na tautauta gume`luye kinalamten para ta gobietnan maisa hit. Lau kulan ñañgon mababan ayu na fasilidat. Yangin pot onru pues debi u chuluñg yan selebrasion `nai offisiatmente mababa para i publiku. Lau ñañgon!