Diskuidun Chatdisision

Gi 1993 ta sañgane i US Congress na una para todu ayudun fondu para Marianas pot nahuñg salape`ta para nesessidat-ta siha.

Namagof na annunsiu lau dididi` taftaf ta banidosuye i asuntu sin ta asegura na na fitme pisun ekonomia para u sustene todu gastu dispues.

•••

Guihe na tiempu metgut inbetsionistan (investors) Japones `nai man-halum guine yan fiñkas niha. I fuetsan salape` niha umadelanta dañkulu i aduanan iya Marianas.

Dispues, sige man-hanau `nai madiñgu iya Marianas. Haf` na insuttu ginen hita umafuetsas hinanau niha?

Ta sufa` i mattiñgan maliñgun fondu `nai ha lagnus $7 biyon pesus gi salape` niha ni ginen lumililiku` gi ekonomian i tanu`. Dañkulu na maliñgu!

•••

`In hassu na ensegidas hana’ para setbisiun Japan Airlines, mabende Hotel Nikko yan otru siha man-dañkulu na bisnis niha guine ya man-hanau? Guaha sineda`ta tahguen maliñgun $7 biyon pesus?

Dañkulu na kantida ni hagas patte gi ma-apasen setbisiun publiku guine. U birague` mohon Japon tatte?

Man-tagfena sikosta yan heñiun banida ni binalutan manadan insuttu kontra inbetsionistas Japones. Pinilota na man-siña hit gi hita namaisa `nai i katsu ginen haf` pinegan niha guine na fiñkas. Che`chu` muron!

•••

Na`mamahlau para ta insutta fiet na gachoñgta deste antes de geran dos. Lau masiente na no siakassu hit gi animun niha ayudu umadelanta i pisun ekonomia guine. Pot manbailai hit un` ratu yan Chinu esta para ta tulaika gachoñg-ta.

Adahe $7 biyon na fondun Japones maliñgu ginen este na mañan miron! Hita i man-dada`da` ginen tailayen heñiun miron. Man-malefa hamyu na Japon nasion ni mina` dos gi mas mifuetsa ekonomiaña gi enteru elmundo?

Haf` ekonomia-ta fuera de man-epineduñg? Kulan bisiu i tayamag i fitme na pisu pot heñiun miron `sino dotmelon pat todu i dos.

•••

• Maseha mirespetu i Japones ha tuñgu` haf` asuntoña. Gigon mattu gi fotmat na inadiñgan ti umahñau nina`e hau ni sentimentoña seriosamente sin ditension. Man-amtau na tautague gi interes haf` mauleg gi hilu` dignu na disposision para i tanu` niha ni marepresesenta.

• Guaha mohon kampu para uma-adelanta suetdun 15-mit na empleau ni man-gatdun gi fache` sisonyan pagamientun popble? Mauleg tafaisen i tropan I Deni` haf` planun niha dispues de maliñgu $7 biyon na salape` Japones. PInalo`pu ni maribahan ekonomia pot iran pagyu. Asuntun kualidat linala` familia! Na ti este primera obligasion miyu?

• Ginen diskuidun miyu na mAangaige este na kantidan empleau gi estau seriosu na pinepble yan chinatsaga pot suetdun niha. Haf` `in petsisige para `in satba inafuetsas miyu kontra 15-mit na empleau?

• Konsidera pot un` ratu haf` pinadesen niha `an man-halum gi tenda pot nesessidat familia. Puru sakrifisiun uttimu nina` siña para u asegura na nahuñg mantension para i tetehnan na dos semana. Inipus na sapet pot diskuidun miyu!

• Mañguentus pot ekonomia kulan mohon nuebu na konseptu lau memegaiña ti kumomprende i asuntu. Planu este ha nesessita pot seriosu i asuntu ni umembrasa linala` linahyan. Adelantu solu siña humatsa kualidat linala` niha. Diskuidun miyu pumega siha gi sisonyan miserapble na pinepble!

• Diariu eksisiun kuttura. Pues haf` masasañgan pot maliñgun modun linala`ta? I kuttura matulalaika. Ayu ta embrasa gi otru i umafagcha` yan haf` gaige giya hita. Atan, sa` gagaige ha` i mapagahes gi lañget!

• Guaha magahet dañkulu na tinilaika gi linala`ta gi halum 40 añus na tiempu? Haf` sineda` miyu yan kau siña `inna`e tautau-ta kabales na infotmasion? Propiu ta pega kalulot-ta gi haf` `in sasañgan na fina` espantu!

• Gi minañgau pulan antes man-epañglau ham gi halum tanu` kantun tasi para sentadan familia. Tat mas mames na sensin ke mafanana`an pañglau tunas. Hu chage lokue` tininun umañg giya Tagpochau. Diberas na mantikan abune ni hu sopas yan hinegsa`.

• Ha rikohe i amiguhu buyadan guihan ni tinipagña dispues de dos oras. Hana`e-yu` kelaguen-hu `nos kuantos medianu na taraketiyun. Ha pega i pumalu gi halum ice chest ya ha kontinua umetupag. Gi lemlem tautau kantida kinine`ña na hana`e-yu` ta`lu dididi patteg-hu. Suette!

• Gi mapus na Dameñgo uttimu na finattun i Niñu gi gima`ta siha. Antes de bai dimu man-ñgiñge` hu hassu pinadesen Santa Marian yan San Jose `nai ni un` guma sumede manhalum para u madiskatga i lahen Yuus. Tailaye na heñiu gi ti mafañañagu na Lahen Yuus.

• Sumen na` pinite na i liyañg ga`ga` `nai mafañagu i Niñu Jesus. Sin ditension, klaru na lahen Yuus i mafañagu `nai man-ina un` pution ni todu lumi`e gi enteru elmundu. Tat ti mumuebague` para u aligau i rai man-rai siha.

• Un` attista ha mente tinilaikan “kustumbren sune” guatu gi salape`. Haf` kustumbren sune? Ya otru `aggun haya mangai kustumbre lokue`? Kau i puntu pot tinilaikan kutturan gualu guatu gi kepblen moseria? ###