Kutturan natibu

Sessu hu ekuñgug sineyu` “presetbasion” kuttura. Sige hu akanteha yan analisa i ti komprendiyun na usun palabra. Felis hinanau kutturan natibu ni sige tana` fitme ginen sisteman edukasion. Pues haf` na presetbasion ta atbabansa?

Presetbasion kulan para ta pega gi un` sahguan kuttura-ta pot no u mahañge` `sino lamas. Na ti diariu usun kuttura guine siha na petlas?

Dichu: Gi todu animu i dichu dumanche chochogueña ma`ug na finana`guen kuttura i sisteman edukasion publiku guine. Klaru yan komprendiyun haf` ha petsisige ni gaige gi leksion diariu gi halum kuattun eskuela siha.

Ha chahlau famaguon-ta. Ha esgaihon adumididi` kontodu finana`guen matuge` na liñguahen hila` nanan niha. I segundu pinetsige petmanente na añkla gi masimientun kutturan natibu.

Afañielos, gaige i primera sahyan kuttura gi liñguahi-ta!

Respetu: Finana`guen mañaina-ta gi halum guma` familia i bittun respetu. Dumaña` yan finana`guen relihion-ta `nai mas fitme makonfitma sustansian yan signifikasion satgen simientu gi kuttura-ta.

`Nai malulog hau respetu libianu un` saluda i otru gi hilu` hinimiddi pot gaige na un` respetan maisa hau finenina. Guaha sattun inadahe gi todu relasion yan disposision. Gi hilu` este libianu ta chogue i tunas yan propiu na disposision petsonat.

Poresu na guaha sattun yan fitme na bittun respetu gi halum komunidan natibu. Ha pega papa` areglu gi kada membron i señgsuñg. Guiya este i satgen simientu gi kuttura-ta.

I kustumbren man-ñgiñge` sumen amtau na patte gi kuttura-ta. Dos masusedi: 1). Tumekun hau konrespetu gi amko`mu. 2). Ma-echa hau motmut bendision na u felis hinanau-mu. Kutturan natibu i respetu deste antigu na tiempu!

Pattisipasion: Gi maseha haf` na dinaña` mauleg ta sedi tautau-ta mañguentus kesibaye de raya yan galun. Na`e i prohimu appottunidat sumañgan sentimentoña.

Pattisipasion membron komunida sumen presisu gi inakonfotman planu para todu gi señgsunng. Estague` i fitme na pisu `nai libianu i tropa ha chogue checho`ña sin finatane`, otguyu `sino imbidiu.

Achog antes gi kamalin Lali Fo` todu mañaunau gi inaprueban asuntun i señgsuñg. Poresu na lagse` kooperasion todu gi maseha haf` na disision. Mañge` man-ayuda `nai guaha hinimiddi yan respetu gi mafatinas na disision linahyan. ***

Chenot: Ha estotba-yu` dimasiau i ma-umentan tautau-ta ni man-sinapet dispues didog na aminasun chenot daibites. Ha inklusu ti mattun haga` gi papa` temota. `Nai iridau kalulot `sino damagas adeñgta ya umadet uttimoña ti amtiyun. Debi uma-utut. `

I manadan asukat gi halum haga`ta kontodu reñihion ha aminasa. Uttimoña ti siña hana` suha i manadan asukat. Pininu` i riñihion. Debi un` madai`alasis (mana gasgas makina haga`mu) pot este solu remediuña matai reñihion.

Giya guahu mismu, sige hu guadog ginen manu mage este na aminasu. Manadan asukat unu, i otru i sinparat ta sumuke` hit neñkanu`. Ti tana`e parahiya-ta tiempu para u yamag i asukat gi haga`ta. Estague` tutuhun chenot daibites.

Para hafa manadan birada. Kada unu mauleg u limittegue` kuantu na neñkanu` para u kanu`. Gigon haspug hau choneg platumu. Gigon un` gulusune mamadesi hau dispues. Komprendiyun i manginen isla hit `nai todu birada gaige i preparasion neñkanu`. Pasensiaye bokan gulosu pot hinemlo`mu mismu!

Mañgu`: Un` tiempu hu tanum manadan mañgu` gi tatten guma`. Ti cha`tan yan hayu i betdi dispues de ha estirague`. Dispues hu taitai gi un` estudiu haf` benefisioña ayu na hale` tinanum.

I chetnot gi tatautau-ta todu i tiempu ha tututuhun-gue` gi fina` doku` pogpug (inflammation). Estague` `nai ha tutuhun maseha haf` na chenot. Sige mona estake inaditi hau.

I usun mañgu` ha punu` todu dineku` pogpug (inflammation) gi tatautau-ta. Poresu na i umu`usa este na tinanum hasan inaminasa chenot. Huna` sesetbe este na hale`. Hu chule` balen kalulot apunteria ya hu pega gi halum ice tea gi blender ya hu meskla. Paire na gimen!

Minagahet? Umakone` dos umasagua para i kotte pot ditetminasion haye magahet gi entre dos keha.

Ilegña asaguan lahe: “Señot, esta i asaguahu tiha areglalaye-yu` amotsaghu yan todu nesessidat-hu”. Ineppi ni jues, “Dinanche hau ihu”.

Kumuentus i palao`an, “Tatnai esta ha kariñu-yu` si pindehu”. Ineppi ni jues, “Dinanche hau hagahu”.

Ilegña i estudianten lai gi un` banda, “Señot, ti siña na para u acha-dinance i dos”. Ineppi ni jues, “Dinanche hau, lahihu”. Guput!

Planu: Ha faisen-yu` un` kandidatu sapottasion-hu. Gi konbetsasion mame hu dagau `nos kuantos kuestion para bai taka` haf` kinemprendeña.

Animu para u oppe kuestion-hu siha lau lamayot patte anog na tai kinemprende gi mas man-sustansiau na asuntun linahyan siha. Ha ayeg dumeskute pot ekonomia lau taya` gi esplikasioña kumonfitma na ha komprende i asuntu.

Mama professot karisu kontodu asuntun hinemlu` yan edukasion. Hu sedi kumuentus lau haf dispues na konbetsasion dos bulacheru! Dios tiampare!