Inipus silensiu

Sige man-afaisen haf` na mampus silensiu i tanu`. Inipus katma maseha manu na soñgsuñg. Ni un` hagun troñku kalalamten. Silensiu!

I asuntu pot pinadesin baratun suetdu ni pumalolopu` manadan familia guine. Estague` mina mampus silensiu i tanu` punta pot punta gi enteru atkipelagu.

Kase guaha 15-mit na empleau man-mamatmus gi suetdun popble (poverty). Makat na tiru gi bandan obligasion familia.

Ha inklusu apas guma`, utilidat, neñkanu`, hospitat, difirientes insurans (insurance) yan nesessidat famaguon ni man-eskuekeula. Lau klaru na tinanahuñg i monedan familia para nesessidat niha.

Yangin in` suma enteru gastun familia gi mes ileghu na taya` sopbla para otru nesessidat siha. Estague` mina` man-mamatkilu i los probes pot te`ug na chinatsagan halum guma`.

Gi halum katman diskuidu haf` mohon planun man-sabiun hegsu` I Deni` para uma-adelanta este na chinatsaga?

Asuntu: Namanman dos tautau ni ma-utut patte gi tatautau niha pot sinaulag bakteria ni chumochochu sensin tautau. Ginen mata` guihan yan inetin hanum sadog tutuhoña este na chenot.

•••

Mampus diskalentau kinalamten katolisismu entalu` Roma, Pennsylvania yan Guahan pot kehan abusun famaguon ni mamale`. Kumu kilisyanu bai fan asi`i lau debi umafana` keha siha gi kotte dibuenamenti.

•••

Uchan, dilubiu yan guafen dañkulu kumukoti elmundu gi mapus na semana. California mit pot mit hektarias gi halum tano`ña kimason. Iya Asia mauleg na tanu` mansulun ginen i fina` hogsu` ya ha tampe papa` siuda siha. Lamegai mandimalas ginen este na ira.

•••

Nachatsaga na guaha 14-mit na empleau gumagana suetdun popble (poverty income). Haf` machogue ni man-sabiun i hegsu` para u fan ma-ayuda este siha na los probes?

Mafuegun kabron i 80 pot sientu na hatsadan suetdun niha. Binechu na pininu` ni kotte pot timatatiye i ginagagau na areglun konstitusion.

Dios mihu na higadun representante manatachu pot siha mismu ti pot interes publiku. Kase guine na Nobiembre ta hatsa i 80 hulu` esta i 100 ya ta bali kada unu huyuñg sin ditension.

Manadan empleau suetdun popble estau niha ya in` lañgag subidan betsan miyu finenina? Dios mihu! Tana` setbi eskoban 100 pot sientu na Nobiembre!

Espirituat: I linala` espirituat megai besis ta letki `sino dis-attendi gi rimulinun diariu na finapos-ta. Lau repara sa` guaha na `nos kuantus biahe limpiu hau lau dispues un` fana` te`ug na chinatsaga ni ti komprendiyun.

Tinetpihau ni esperansa gueku gi halum korason yan hinasso-mu. Haf` na taiguine este? Malefa hau ti un` yuti` añklan linala`mu espirituat ni gumugu`ot fitme sahyan-mu gi halum napun lina`la`.

Saga un` ratu ya unna` tunug añklamu para siña u safu botimu gi halum maseha hafa na mattiru. Guiya este i hufanana`an “luseru”, puti`un linala`hu ni umesgagaihon-yu` diariu deste ke manana Si Yuus esta i oran deskansu.

Pasensiaye ya unna` guaha tiempu guine na patte gi ha`animu pot para un` konsige katma yan pas ha`animu.

Señat: Man-matayu` guihe na oga`an. Huna` klaru matahu antes de bai falag i kemun `nai huli`e buttun Santa Maria mañila`, kahulu` dididi`, dispues tumunug gi sagaña. Hu ta`lun muna` klaru fan-atanhu para baina` seguru na manmata-yu` kabales. Mañila` ta`lu i buttun Santa Maria, kahulu`, dispues tumunug.

Tres oras dispues malagnus anunsiu na sinaulag iya Kobe` giya Japon un` dañkulun linau. Megai destrosiu yan mandimalas guihe na linau. Man-na`eyu` mit grasias na ti hita man-dinanche nu ayu na ira. Konsidera i destrosiu yan dinimalas `an hita `nai pañgpañg ayu na linau.

I umestototba-yu` i hu huhuñgug un` eku gi chagu`. Haf` `ste signifikasioña? Kau guaha ira ni dañkulu para u fatoigue hit dispues? Haf` `nau na ira, pagyu pat linau? Afañielus, maila` ya gi hilu` hinimiddi tafan man-gagau para satbasion todus.

Liñguahe: Mauleg na intension programan Chamorro ni malalagnus ginen Guam gi television. Na ti liñguahe i nanan kuttura? Pues haf` na finu` Eñglis inna` sesetbi gi presentasion siha?

Na ti propiu dichu usun liñguahen natibu gi ayu siha na programa? Mauleg umata`lun ma`atan i asuntu para u guaha inaya gi intension yan implementasion programa.

Pa`gu yangin lache i hu supopone mauleg yangin guaha esplikasion manu na patte gi hu diskute `nai gaige finatsu. Maila` tafan diberas maseha pot primet biahe gi finana`guen liñguahen hila` nana-ta. Este ha` solu na karera `nai siña ta atbansa sin linetgun kabales na finana`guen finu` Chamorro.

Magoo: Ha mente amiguhu na mampus man-silensiu i kandidatun politika siha. Kau guaha minasa` gi asuntun linahyan? Haf` muna` fanfufugu hamyu? Kau i 80 pot sientu na hatsada ni dinagau huyuñg ni kotte? I taya` ayudun miyu para i mas ke 14-mit na empleau ni gumagana suetdun popble?