Chinatsaga Giya Paraisu

Bes enkuando, hu ekuñgug sentimentun tautau-ta siha gi señgsoñg pot haf` mas umestototba ha`anen niha gi halum rimulinun chinatsaga guine.

Ya hululu` i tagpapa suetdu ni megai man-sinasapet diariu. Kase 15-mit na empleau man-gaige guine na kategoria gi halum 26-mit na hutnaleru.

Gi halum este na mattiru ni unu soplu ginen obligasion familia tat kumu apas guma`, kareta, neñkanu`, utilidat, difirientes insurans (insurance), yan nesessidat famaguon siha ni man-eskuekuela. Man-suette i man-kualifikau ayudun programan federat tat kumu neñkanu, hinemlu`, fanliheñg, yan otru siha ayudu.

Mina` ti gof anog pinadesin tautau-ta siha lamayot patte pot kutturan ina`ayuda yan yine`ase. Ti man-maliñgu hit kumu klaru konsensiata na ta ekstendi kanaita gi prohimuta ni numesessita ayudu. Gaige guine na ridondun kuttura i espiritu yan sustansian tautau-ta siha.

I kustumbren tanu` kumatsu fitme establisau na kutturan relihion. Metgut i sensian respetu entalu` unu yan todu. Tinatiye este nu i sinsiyu yan geftau na sensian ayudu gi chatsaga na prohimu-ta. Bien prubechu para todus!

Materiat: Animu grupun Chamorro siha man-manrikokohe materiat pot estorian natibu. Ni taimanu pula`ta ni kutturata mau`udai este gi liñguahi-ta. Estague` umesgaihon halum gi apusientu modun linala`ta haf` espiritun yan sustansian natibu.

Huñgan, ti megai man-matugi` pot fina`pus natibu. Lau lamayot patte ma`udai este gi hilu` kutturan kuentus yan inadiñgan (orature). Enfin, sige mona mas ma-umenta tinigi` gi katkuet asuntu pot natibu. Na`magof na pinetsige gi anaku` na karera.

Haf` i gaige libianu ta adelanta parehu ha` gi bandan sustansian materiat yan modun matugi` este siha na attikulu. Mababa i petta para tana` daña` hinassota yan kinemprende-ta haf` espiritun yan sustansian natibu.

Hu usuni mañgge` guine na pahina deste 40-tantus añus malofan pot kinimitin para bai` eyag tumugi` papa` liñguahi-hu gi klaru na ekspressiu. Olara mohon ya gai setbi haf` pinegahu para i manatatte. Mas mauleg yangin hamyu mismu in` petsigi man-mañgge pot para ta abiba tatte i solu sahyan kuttura yan tradision natibu—liñguahi-ta.

Chenot: Tres klasen chenot sessu umaminasa tautau-ta: daibitis, kanset, yan korason. Gi halum este na rimulinu, mauleg ta soyu inestudia haf` simiyan este siha na aminasu yan manera `nai siña ta satban maisa hit.

Oppan na i asukat i primera dañosu na attikulu para mames haga`. Dinanche! Lau mauleg ta komprende na ti ayu ha` asukat i gaige gi botsiyu ni tafafahan gi tenda.

Todu neñkanu` ni gai asientu tat kumu hinegsa`, pan, yan pastre, mangai asukat. I asientu guiya i asukat! Este i tres maschadig asukat niha halum gi haga`ta.

I `aggun haya tat kumu kamuti, mendioka, suni, choda, dagu yan nika mangai asientu lau mas mauleg na alimentu para hita.

I `nos kuantus klasen kanset tat kumu pachot, agaga`, guetgueru esta i gofes kase gaige i aminasu gi usun chupa, mama` yan chupan dibana. Mientras guaha tiempu mauleg una` para pa`gu pot para u birague` tatte sistemamu gi hagas homlu` na estau.

Chenot korason mafattu ginen bokan manadan mantika yan asiga ni hinegsi taya` esksisiun tatautau. Piot ya sessu un` tala` hau gi menan TV dispues de bumoka hau. Un` ratutu ha` rumidondu sinturamu, un` klasen mantika na sumen makat mana`suha.

Mauleg yangin todu pinetsige kontodu boka malimitti gi hafa otdinariu. Muñga malatgaye famaguon fina` mames. Soyu` na u fan eksisiu diariu pot hinemlu` niha. Mas mauleg yangin hagu ni saina gumeluye este na patte gi ha`anen niha.

Machamat: Hu huñgug na bibu usun amot machamat gi hegsu` I Deni`. Guaha man-ma-inkakatga ginen Fililpinas, Palau, Chuuk yan Pohnpei. Amot ni ma-intended para unina` abarambau kareran i kontrariu.

`An taiguenau pues ti maput mafatinas amot binenu na machamat ni mana` daña` yan lañan niyug. Chuli`e ginen hanum aplacha` giya Agiñgan ya un` meskla. Adahe hau mientras un` lulupug sahguan-mu na un` nina`ye bakterian hanum ni mas apalacha` guine. Kontodu bakteria man-hinalañg.

Lau gai amotyu` lokue` `nai siña bai esphihan ñaihon kumesoda` haye manman-u`usa amot machamat. Bai liliku` gi hegsu` I Deni rumikonose manu `nai gaige este siha na aplacha` laidot.

Siempre esta titiñgtiñg halum karetahu `an guaha gi oriya machamat. Ti maput masoda` este na traision. Dispues mas ti maput i para un` usa mismu amotña kontra guiya mismu! Laminos!

Lau haf` mohon na para u fattu papa` gi taiguine? Kau tai inañgog-hu hau nu hagu mismu na debi un` usa tailaye na laidot para un` kontentu? Kau un` riniskata ni mismu amotmu gi uttimu suspirus? Tat mas ke che`chu` tunas!