Biblia: Pisun Iya America

I ma`gas iya Russia ha butleha America guine gi alacha pot kinalamten siha `nai sige ha` chumagu` yan i biblia. Estague` na leblu i pisun matuge` konstitusion Estados Unidos De America gi 1776. Megai gi prinsipiu ginen i biblia gaige na mamostra gi hechuran palabras gi halom konstitusion.

Namatman na u guaha este na botlu ginen nasion ni megai ha punu` antes pot eksisiun relihion sa` man-hoñge na taya` mas ma`gas na atoridat ke presidenten niha. Magahet, lamegai giya America chumochoneg madiskuattisan prinsipiu siha ni gaige gi sagradu na dokumenton nasion `sino US Constitution.

Siña machoneg lau ni unu siña tumulaika i fitme na hineñggen mayotmente ginen manu mage lamayot patte gi konstitusion iya America. Ke lau haye mas ke Saina? Haye gi entre hita siña pumula` inestablesen faktu gi estorian todu nasion na tai tinituhon yan tai hinekog i Saina taimanu matuge` gi biblia? Ti listuyu` mama` sabiun karisu.

Esta hu guaguadog materiat siha para bai komprende haf sustansian “tai tinituhon yan tai hinekog” segun i mas man-estudiau yan famosu na tautaugue tat kumu si Aristotle, Plato, Locke, Humes, San Agustine, Aquinas yan otru siha deste siñko mit años antes. Kada unu gai hinassu gi dichu kuestion siha ni manmafaisen. Lau ni unu kumontra i “tai tinituhon yan tai hinekog`” Yuus Tata.

Unu sessu ha repite: yinease` para i man-na`mase` ya sumen taglayu` gi ti man-manhoñge giya guiya. Ha yogua gi halom guafen didog na sa`pet yan kansadu na tanu` disetto ni tai hanom. Poresu na debi kada unu u sessu bumisitague` maseha pot para in` hamyu un` ratu gi kareramu mona. Pas yan felis kareramu kontodu halom mas mandidog na pinadese. Gi ti mapot na manera: Pega inañgoghomu giya guiya.

Guaguan gaston nesessidat

Bastara ke asaguahu la`mon ni mantension familia, guiya fumafahan todu nesessidat mame gi tenda. De hemunosyu` presiun fektos tat kumu lateria yan otru siha attikulun mantension.

Un` biahe hu dalalag para i tenda. Sige lumiliku` ha akompapara presiu, ha pega halom inayegña gi karetiya ya sige ham mona.

Dispues hu lie` balin un` latan satmon ni hihot esta gi nuebe pesus. Antes, disi sais sientemos ha` este na lateria. Fuetsau, debi bai` puta` kuattro sentadahu `an hu baba ya hu fadeni` i satmon. Kontodu kadoña bai` apprubecha. Dios tiampare na guinaguan!

Hu lie` gi un’ banda un` palao`an mangugu`ot salape` food stamps. `Nai mattu gi lugat uhañg ha bale halom amanu i siña mientras sige hu katkula kuantu libra siña hu fahan. Bien suette i prohima gi fina` ayudu ya mauleg sa` guaha mantension para familiaña.

Afañielos, guaguan mampos i gaston linala` deste neñgkanu`, kandet, insurance hinemlo`, yan otru siha nesessidat. Man-malag manu` i sabiun I Deni`?

Kusinan Antes

Lumiliku`yu` gi hagas soñgsoñg un` lemlem tautau pot para bai` huñgog burukan finagpo` ha`ane. Hu baba espehos karetahu para bai` ñgiñgi` sabot neñgkanu` siha gi aire. Seru!

Guiya `ste na ora yan `an taftaf oga`an yan pa`gu pueñge `nai duru gi kusinan sanhiyoñg i familia man-na`lagu amotsa, fina` bento` yan sena. Kulan maliñgu gi aire ayu na señat komunida `an oga`an yan pupueñge.

Taigue esta i asu sa` appenanas kusinan antes hayu usun diariu. Puru na tiempu elektrisida ni man-ma`atileg `an listu i kusineru para u na`lagu.

Diberas, taya` mas mañge` ke hinegsa` mana` masan hilu` guafe ni hayun tañgantañgan. Magahet na debi un` fagase tesnan satten dispues lau paire hinegsa`mu. Esta na` mahalañg maliñgun sabot neñgkanu` gi aire.

***

Lokue`, kulan maliñgu i sumaunau bisinu gi mapulan i señgsoñg. Esta kada unu ha bira attensioña gi konbiñienteña. En lugat de u rikonose bisinuña, ha huchom pettaña ya humalom gi gima`ña de hemunos haf` guaha gi oriya. Debi u guaha inarikonose para sienkassu haf` ti mauleg masusede gi bisinu.

***

Ileghu na mauleg yangin hita mismu ta pañgon tatte i hagas fitme na sensian komunida gi todu i señgsoñg guine. Ha establese inafamauleg yan kooperasion gi entalu` bisinu ya todu mañgalamten gi mana` safun i señgsoñg. Mas libianu kinalamten che`chu komunida `an ta abiba este na sensia gi todu soñgsoñg guine.

Tai malefaghu antes `nai todu mañaunau gi che`chu` bisinu tat kumu umakamu`. Deste peska, mapunu` ga`ga`, mahatsan fandañgeru, muñgayu, kusuneru, pastre yan otru siha cho`chu` mas libianu para i tautau guma`. Sumen namagof na dinaña gi hilu` riku na sensian komunida.