Ma-abiban kuttura

Lamegai na programa pot kutturan Chamoru giya Guahan man-mapresenta gi television gi selebrasion Mes Chamoru desde mapos na semana.

Ha inklusu offisiun suruhanu, usun tinanum para amot, kanta, baila, preparasion neñkanu`, tinanum gi gualu`, mamatinas galaide` yan peskan tasi. Mientras mas mona mas metgot detetminasion Chamoru para u sustene haf` sustansiaña kumu natibu. Mauleg na pinetsige i para ta gofli`e maisa hit mismu.

Guaha ha` hu kuestiona kau gai koneksion yan antigu na hinanau natibu. Lau presentasion mafanana`an “maestro” gi bandan kanta yan dandan. Kulan man-seda` gi tiniguñg modetnu na kinalamten sin konfitmasion!

Gi todu animu gi fina` programa i solu fitme na sahyan gaige gi liñguahen Chamoru. Sin este kanaha` tai bali todu otru pinetsige para tana` fitme pisun kutturata. Hafa na lamegai gi presentasion mapresenta gi finu` Eñglis? Ensegidas maliñgu i sahyan yan tolai sin ditension.

Debi u mapraktika sinsiyu i intension yan sahyan todu pinetsige. Haf` na desde tutuhun appling i presentasion? Magahet na mapot fuminu` Chamoru?

Propiu: Maseha fatsu i palabra lau estaya mana`e animu gi esplikasion hiniyuñg galaide` gi alacha ginen Guahan. Ilegña un` señot na i usun lañan niyog para una` “maneñgheñg ham”. Ahe`, para proteksion kontra maneñgheñg mañglu`.

Ilegña i otru na para umapega i galaide` gi halum tasi ya umasatpun hanum. Era para umasatpe hanum. Satpun i `ansatpe!

Amot Natibu: Punta pot punta gi atkipelago mabohau tatte usun tinanum tanu` para amot natibu. Ti namanman pot desde antigu na tiempu i kuttura ha prebeniye siffisiente kontodu amot para i natibu.

Konfotme-yu` pot huli`e na i man-yo-amte fotmat na eskalera na mapetsisige offisiun niha. Maketuñgu` haf` chenotmu, haf` tinateña, kau guaha hau tumatme, yan otru siha pettinente na kuestion. Dispues, usun naturat na amot natibu hasan ta huñgog na gai problema i malañgu duranten ma-amteña—side effects—tai guihe amot hospitat.

Dandan: Un` lemlem tautau, sige hu rasgueo gitala-hu gi baranda pot tane`. Ha kone`yu` tatte gi pinatgon-hu. Desde ayu na tiempu umeyag-yu` siha kanta ginen mañainan mame, famaguon bisinu, eskuela, yan dispues de in` diñgu pettan sanmena. Apmam lokue` na tiempu dumandan-yu`.

Un` finagpu` dottrina sigeyu` luchan para i gima `nai husoda` defuntu Frank Limes dumadandan ukulele ya ha kakanta Five Foot Two. Hu ekuñgog ñaihon. Hana`e-yu` dispues ni ukulele ya hafanu`e-yu` usuña. Estague` primet biahe `nai hugu`ot instrumentun dandan.

Umeyag-hu` gitala ginen mauleg na tiuhu as Rudy M. Sablan. Sige mona hu atetuye mas ineyag pot para bai siña humoñu` i yabe gi katkuet sotfa ni mattu gi talañga-hu. Kase disiente pa`gu yan libianu hu dandan katkuet kanta. Lau gaige giya guahu lokue` sensian sinparat umeyag estake satisfechu-yu` ni debi bai tuñgu`.

Guaha `nai hu totpe man-na`mahalañg siha na sunidu ni muna` hahassu-yu` ni mañaina-hu man-afamau pot kontribusion niha kanta. Piot kantan ha`anen gupot siha.

Magahet na hu atetuye umakanteha `nos kuantos sunidu ni tinige` mañaina-ta pot suanu na dopblada gi palabra. Tatnai ta huñgog este na modun palabra siha na tiempu gi nuebu na kanta ni manhuyuñg.

Gi todu kantan natibu ayu mas chetton giya guahu, “Ti Gi Un` Palasyun I Riku”. Patte ilelegña, “…ya ti siña hu tulaika sa` tat mas gefsaga, kumu ayu siha nas islas i Islas Marianas”. Pot tano`ta! Estague` siha na petlas `nai gaige kuttura yan tradision natibu desde antigu na tiempu. Fitme na pisun natibu!

Guihan: Mamahan-yu` un` dofin (mahi mahi). Hu po`lu gi hilu labadot sin palabra. Man-mattu i famaguon ya ma-atan. Ni unu mamaisen haf` para umachogue. Hu sañgane na umana` gasgas. Ayu `nai man-a`atan madibina taimanu muna`gasgas guihan.

Hu agañg ya hufanu`e desde magonaf, manasuhan tilipas yan guasañg. Dispues hu pika para ma-aflitu, katdun to`lañg, yan kelaguen. Huna` fan man-hassu na famaguon isla siha ayu na debi umatuñgu pot guihan desde umakone` estake listu para benefisia.

Inadahe: I finattun yan hinanau ha`ane ni unu gumugu`ot. Desde kahulu` i atdau gi chagchag oga`an, doku`, man-ina, dispues machum gi sanlagu. Diariu, tatnai matulaika ni achog mattiempu.

Mina` hu mente fina`pus ha`ane pot huli`e na guaha dibin Marianas $1.6 Biyon pesus—ya sige mas ma-umenta—kulan mohon no siakassu. Gi mismu tiempu ma-anunsia na guaha lamegai soblante gi kaha. Taimanu para u guaha soblante `nai madidibi CUC mas ke $73 miyon pesus? Ni patten Marianas $14 miyon gi Medicaid to ma-apapase pot dos años na tiempu.

Debi u guaha finetmat mabisita monedan iya Marianas. Pot fabot atan haf` hagas yan presente na dibi yan kau sufisiente rinikohen aduana (tax) para apas obligasion.

Soluke guaha este na inadahe kase puru che`chu` kinibrutu `nai tafa` nuebu na kuttura i diskuidu. Pot fabot atan obligasionta gi hospitat yan eskuela siha. Estague` `nai gaige kakatneña i gastu.

Chenot: Umasudayu` yan un` primuhu. Huli`e na mampos mayaye. Hu faisen haf` guaha, ilegña nina`ye-gue` chenot lahe (prostate). Pot payun ham kuentos frihon hu atotga fumaisen para u esplika chenotña. Pot grasia hafana`an chenot dadeg.

Hu tulaika i konbetsasion pot kanset ayu na pinadese. In` bira ham tatte gi man-mañge` siha na hagas asuntun mame. Kontodu tañgan cheluña hafa chaleg, “Hekua` haf bisnesña este man-oppe telefon”. Dios mihu!

Peskadot: Sumugu` un` peskadot gi kantun chalan ha rikononose amiguña. Hali`e na mehna mafute`. Mafaisen pot kinine`ña. Ilegña na hahatsa un` dañkulun falut Magellan gi fihon Agiñgan ya mañiñila ha` kandetña. Sinañgane ni amiguña na u fañule dies na mafute` ya una` seguru na ha punu` i kandet i falut. Dios mihu!

Chatmediku: Umasoda-yu` yan amiguhu gi hospitat. Hafaisen-yu` haf` na kulan inipus-yu` mayaye. Hu sañgane na palu pot chenot daibies—mames haga`. Ha akonseha-yu` na bai` chochu asiga. A`saina!

Hu repara na chumichichi` pot chenot dinalag. Antes de bai` diñgu hu abisa na u fan dalalag dimas de u sede madalalag! Hihot me`mi` kumegu`ot tatte chalegña.