Si demoñu probe

Hu guadog manu gi estorian antigu `nai gaige kantan Chamorro ni matatpañge “chant”—esalau. Hu petsige pot dumañkulu-yu` hulu` ya ti hutuñgu` na guaha nu este na modun kanta.

Hu soda` na guaha un` missinariu ginen España untat Juan Probe ha fagcha`e belan matai giya Luta gi 1602. Mañgakate familia pot pininiti. Ha tuge` si pindehu Probe na “chant” ayu na katen natibu.

Gi primet lugat, tiha tuñgu` kutturan i tanu`. Dispues, i natibu ti kumakanta gi oran finatai. `An guaha `agañg katiña ti “chant” ayu na ekspressiu. Pues si pindehu Probe tumuge` i dañkulu na linache pot Chamorro chant. Gi hilu` inosenteria `nai ha chalapun malakinemprendeña!

Mauleg sa` hita pa`gu para tana` dinanche tinige` estrañgheru ni ti kumomprende kutturan natibu. Haf` na malabidan Magellan ni fumana`an Marianas tanu` ladrones. Otru demoñio ni gumulusune guinahan tautau-ta para mantension batkoña. Mauleg sa` huhuñgog na un` dikiki` lapulapu (gadau) pumunu` si demoñu giya Filipinas.

Debi todu lepblu `nai ma-imprinta este na linache umana` fan dinanche enteru sin ditension. Ta miresi dignu na respetu kumu natibu!

Medicaid: I hospitat ha faisen i gobietnu para u apase dibin yan patten Marianas $14 miyon pesus gi programan Medicaid. Manadan tautau-ta man-kinukubre gi bandan gastun hinemlu` niha. Ti siña este ma-upus pot diskuidun hegsu` I Deni`.

Umafagcha` este yan planun subidan sueddun tautau gobietnu (cabinet). I primet sumen presisu pot hinemlu` tautau-ta. I hatsadan sueddun cabinet achog umayute` halum gi tañken basula. Umapega fondun publiku gi programan hinemlu` sin ditension!

Mauleg uma-alulaye ma-apase este na obligasion pot rason na inipus manadan dibi humohogse iya Marianas, poku mas `omenos $1.6 biyon pesus. Guaha siha para u fan masusede tat kumu hiniyuñg Delta Airlines ni siempre ha utut mas fondu gi kahan iya Marianas.

Lugat Pas: Iya Tinian afamau pot ginen ayu `nai makatga i dos balan atomic bomb ni dumestrosia Hiroshima yan Nagasaki giya Japon gi 1945. Ayu na fuetsan destrosiu muna` para i geran dos yan umestablese pas gi enteru elmundu esta pa`gu na tiempu.

Poresu na mauleg ta hatsaye monumentu iya Tinian (Peace Memorial Park) pot puntu gi estorian elmundu. Este na monumentu siempre guaha siha giya Japon mumalagu`e mañaunau gi gastun para umahatsa pot kinimiten pas.

Guaha monumente mahatsa giya Hiroshima pot pas. Megai bumisisita kada sakan ginen todu elmundu. I ta diskukute na monumentu parehu rayaña yan monumentun USS Arizona giya Honolulu. Debi parehu selebrasion seremoñas kada sakan gi todu atmos bandan Pasifiku.

Respetu: Aksidiente hu ega` Chamoru Chant ginen i sanlichan na bisinu. Hu akanteha desde palabra, tunada yan trahe.

Pinegan palabran kanta man-akontra sin koneksion yan sustansia. Pot ihemplo ilegña, “A`Saina, anite, na`e ham fuetsan mame”. Siña unna daña Si Yuus yan Lusifet gi un` sakudida? Na ti kutturan relihion natibu Katoliku?

Dispues, i trahen maestru lava lava ti sadi`. Anog na mafabrika ayu na baila ya klaru na tai koneksion yan antigu na finapos mañaina-ta. Kontodu Saipan hinatme chenot mafabrikan bailan “chant”. Fan gai mamahlau ya in` respeta i gai koneksion yan antigu na kutturan natibu! Muñga man-mañaluda ni ti tihuñg miyu.

Sentimentu: Pot dos besis i publiku ha chanda casino. Gi silensiun pueñge man-halum i profetan hegsu` I Deni` ya makontra dichu disision i tautau guine na asuntu. Haf` mohon gaige gi fondun konsensian tautau-ta ni kumontra este na bisnis?

Na ti diniseha trañkilu yan gasgas na minagof gi ha`anen niha ke dihemunos kau sisonyan pinepble? Na ti mapayune pinepble desde antes. Haf` baliña attifisiu na eskaleran linala` `nai abarambau kinalamten familia?

Sinake: Sige luchan para i señgsoñg dos amigu ginen Magpi. Era mapuno`guan un` tautau ni ga`ña guaka ya i dos petna ha` machule` pot no umagacha`.

`Nai mattu i dos gi menan Guma Yuus Kristo Rai guminen i tata i unu. Finaisen haf` bidadaña. Ilegña, “Pal, gaige ha` guine tatte sinaketa dos petnan guaka. Fangagau asi`i!” A`saina!

Konfisinariu: Ha faisenyu` un` atuñgu` haf` na mampos man-silensiu i tropan hegsu` I Deni`. Hu sañgane na mañgakanta “Silent Night”.

Ilegña na guaha hali`e gi konfisinariun lichan parking lot Kristo Rai. Adahe na nina` fan udu pot guaha esta monhayan mañganta? Dios mihu!

Pution: Klaru yan ma`lag na pueñge. Miyon yan miyon na pution gi lañget. I uttimu na dos pajaru sige halum ginen i tasi para i fan deskansun niha. Kontentu yan katma hinasog-hu. Silensiu!

Gaige gi sanhaya pution luseru (north start). Huna` sesetbe kumu timon konsensiag-hu espirituatmiente. Hagas hu offisiona pot apmam na tiempu. Kulan palun kandet ni ma`lag gi halum barañka siha na katsada.

Dispues sige man-rikohe homhum mapagahes gi sanhaya. Ti apmam uchan gotpe ni sumuha ensegidas. Klaru ta`lu i lañget ya anog manadan pution. I tetin uchan kulan bendision.

Gaige mina` kuattu na pulan gi sanhaya. Un` dañkulu na pution kulan medision pinasensia gi tautau siha. Tatnai in` repara na desde mediu ridondu estake u gualafun metgot i pinasensia gi tautau? I atlibes, `an kanifes pues kontodu pinasensia-ta kanifes lokue`. Ti finatinas-hu este lau repara siempre in` li`e na magahet.

Dibi: Un` tiempu man-mandidibi mañaina-hu gi un` tenda. `Nai mattu dos cheluhu para u fañule` latan totche, man-ma-esalague ni tendera na debi mañainan mame u fan man-apase sa` “bisnis is bisnis”.

Ti manman-yu` man-espiha checho`hu dispues de finagpu` eskuela. Maseha baratu na sueddu ($1.50 entalu` `las kuattru esta `las onse gi pupueñge). Estaya ti bai`n bira halum guihe na tenda man-mamiha. Esta hana` ma`ase`yu` dos cheluhu ni ma-esalague sa` kanaha` timatuñgu` man-huyuñg gi pettan i tenda.

Inna`e animu man-cho`chu` kada finagpu` eskuela entre man-peska gi halum tanu` yan tasi para bai`n na` guaha na`mame gi lamasan sena. Esta pa`gu na tiempu huhuñgog finu` ayu na tendera i “bisnis is bisnis”. In` siñgun ayu na minamahlau pot man-taya` mame. Tat mas ke bendision I Saina!