Primet leksion

Man-suette i man-mafana`gue finu` Chamorro gi primet yan segundu gradu antes. Ayu ha` chiña i tinaitai yan tutuhun madiletran finu` Chamorro.

Dispues, todu para mona finu` Eñglis. Enfin, manatma ditetminasion-hu umeyag kabales i matuge` na patte gi liñguahi-hu. Kulan nesessidat todu dos kanai para umauleg maseha haf` tachochogue.

Hu tutuhun manaitai lepblun nobena, trinansladan biblia, yan disision kotte para bai li`e usun yan mapegan palabra gi papet. Taya` guihe na tiempu maestron matuge` na finu` Chamorro.

Mas ha soyu`yu` mañgge` ayu mina` hu birayu` tatte ya hu tutuhun mañga`guas gi hila` nana-hu. Umafagcha` este (40 años dispues) yan sineda` professot pasifiku siha pot liñguahe ni sumoyu` finana`guen matuge` na finu` natibu.

Guaha `nai fatigau-yu` mañgge` lau pot manatatte na famaguon-ta na sige ha` hu suhun lapeshu. Puede benefisiosu i kontribusion-hu manala`la` hila` nana-ta. Este na attura `nai hu sosoda` ginefsagag-hu `an sige hu pula` haf` siha man-mehnalum na finu` mañaina-ta. Suanu na palabras ni tatnai huhuñgog pa`gu na tiempu.

Konbetsa: I hechuran konbetsasion na finu` Chamorro i ti mapot na patte gi liñguahi-ta. Taya` fotmalidat mapega pot usun liñguahe gi fina` hunta. Mientras guaha inakomprende gi haf` man-madiskukute siha na asuntu siempre u felis i dineskuten asuntu siha.

`Nai mattu hau gi matuge` na finu` Chamorro, fuetsau humalum areglun usun dinanche na grammatika, areglun palabra, señat tat kumu coma, yan areglun usun propiu palabra. Poresu na i para u fañge` debi finenina u komprende i asuntu kabales para u siña umesplika i tinige`ña gi komprendiyun na attura. Gai fotmalidat este i mañgge` ayu mina` mas mapot ke konbetsasion.

Matuge` liñguahi-ta i solu sahyan `nai ma`udai halum i kutturan i tautau gi fitme na pisu. Ha signififika na yangin i patgon siña ha tuge` hila` nanaña pues klaru na ha komprende i liñguahiña mismu.

Kanset: Hu huñgog guine gi alacha na kumahulu` i numeron tautau-ta ni man-nina`ye kanset. Esta namanman dispues hu asimula haf` este siha na chinatsaga. Ha inklusu kanset pachot, guetgueru, susu, matris yan gofes. I kanset pachot gaige na sumigugundu.

I satbasion gaige gi para ta suhaye todu bisiu ni dañosu. Taya` rason na para ta usa sigariyu `sino otru traidot na attikulu. Mientras mas un` chagu`e mas hau libre ginen pipinu` na chenot kanset.

Hu huñgog lokue` na gi nubenta na tautau-ta ni man-estaba Guam guine gi mapos na semana, mayotmente pot chenot kanset. Gaige obligasion inadahe giya hagu mismu. Fana`gue lokue` famaguon haf` mauleg na pinetsige pot hinemlu` niha.

Yine`ase`: Trabiha taya` atparehuña natibu gi bandan yine`ase` yan pininiti. Pot ihemplo: `nai mabisita i kumeke matai na malañgu gi ICU mapacha papa` dispues mafaisen “Mamauleg ha?” Yangin mauleg i malañgu u gaige mohon gi ICU?

Dispues, man-huyuñg ya masañgane i familia, “Ta aksepta ha`!” Kulan mohon gi tumohgeña gi halum ICU kumonbetsasion yan i Saina ya matagu` para unotisia i familia na una` fañgonfotme siha. Haf` mohon? Diberas!

Sensia: Teñga hu dandan suabe na piano `sino gitala para una katma hinasog-hu mientras hu tataitai siha i gaseta gi taftaf oga`an. Ha sedeyu` umanalisa haf` i asuntu yan presentasion ideu ginen todu atmos banda.

Nachatsaga para ta soda` na i rumepresesenta hit gi lehislatura ti makomprende konseptun “supremu na lai” segun USPL 94-241. Estague` inakonfotman i Covenant. Todu maprebeniye kontodu pot relasion-ta yan federat. Puru che`chu` kinibrutu! Diberas! Haf` mohon na taiguine este?

Famaguon: I amot binenu (shabu shabu) yan otru mafanana`an “opioid”, amot para puti kulan ma-offisiona usuña ni famaguon na tiempu. Yangin ti ma-ataha i patgon ginen este na binenu pues siempre hahatme che`chu` man-aña (violence) pat mas seriosu na che`chu` kriminat.

Debi i dos saina u sattun gi todu aktibidat famaguon niha para u listu lumi`e haye kulan inipus matulaika desde palabraña esta haf` ha petsisige diariu. I patgon ha nesessita ayudu `an enfin humalum guine na chatche`chu`. Obligasion-ta umesgaihon siha ginen este na tinailaye. Mauleg malistuye pot futtunan famaguon-ta.

Peska: I tasin sanhalum (laguna) entalu` Oleai yan Garapan lugat peskan panag antes gi lalahen mame Lali Fo`. Sessu gi lemlem tautau yan uttimun semana man-panag para usun familia. Ti man-malefa ni kustumbren makana` guihan gi troñku para i man-mofo`na na peskadot.

Pa`gu na biahe huli`e este na modun peska ginen i chagu`. Man-hanau esta para i deskansun niha ayu siha na tropan peskadot. Kase machule` hanau este na modun peska hombre tatnai tali`e na tiempu. Tinayuyot para siha pot mauleg yan grasiosiu na amesta antes.

Asme: `An monhayan magugan i mai`es, entre mamulinu para atmayas pat guleg para titiyas `sino ma-asme para usun dispues. Este hagas kustumbre `nai metgot i che`chu` fangualu`an gi natibu. Kulan maliñgu este na tiempu pot hasan esta i tautau-ta man-gualu`.

Presetbasion neñkanu` entre matala`, ha`me, pa`gu `an guiha, ma-asnentukun. Macho`gue antes pot appenas ice box. Gi hinalum este na traste hasan lokue` tali`e este na modun presetbasion. Debi hagu mismu un` chogue manala` `sino man-ha`me gi kusinan sanhiyuñg.

Mercedarian: Kase nobenta años tatte, man-mattu i primet na grupon madren Mercedarian guine. Gi hilu` pinepble ha dopbla siha umekstende ayudu gi mas mammopble na tautau-ta. Dañkulu na sakrifisiu mas ke haf` siña ta deskribe pot kinimiten sattun na kilisyanu.

Dañkulu na saludu para siha pot gi hilu` pinasensia man-mafana`gue hit dottrinan i Saina desde ayu na tiempu. Dos gi halum siha umayudayu` gi karerahu: Sister Madre Pia yan Sister Mary Louise. Maseha esta man-hanau este siha na maestrag-hu, tatnai fatta gi tinayuyot-hu agradesimientu pot pinasensian niha gi todu leksion relihion Katoliku.

Si Sister Pia i tumuge` kanta-ta “Hagu Inan I Lañget” un` ma`ug na sunidu gi tautau-ta. Si Sister Mary Louise i numa`e-yu` klaru na esplikasion dottrinan I Saina. Gi hilu` pinasensia ha fana`gue manadan famaguon-ta guihe na tiempu. U felis hinanau miyu yan Si Yuus Maase`!